அன்பான ஒன்றை நினைத்து அன்பில்லாமல் போக முடியுமா ?
பழநி ஒட்டன்சத்திரம் அருகே அமைந்துள்ளதே ஸ்ரீபிரம்மராம்பிகை சமேத மல்லிகார்ச்சுனேஸ்வரர் அருளும் கொண்டராங்கி சிவத்தலம் ஆகும். 2023ம் ஆண்டு தமிழ்ப் புத்தாண்டு சோபகிருது வருடப் பிறப்பு தினத்தன்று, அதாவது 14 ஏப்ரல்2023 வெள்ளிக்கிழமை அன்று வழிபட வேண்டிய மூர்த்தியே கொண்டராங்கி ஸ்ரீமல்லிகார்ச்சுனேஸ்வரர் என்று சித்தர்கள் அறிவிக்கிறார்கள்.
இதுவரை நாம் கேள்விப்பட்டிராத, அறிந்திராத ஒரு தெய்வீக சித்தாந்தத்தை நம் சற்குரு புத்தாண்டு பரிசாக அருள்கின்றார் என்பதே கொண்டராங்கி திருத்தல வழிபாட்டின் முக்கியத்துவங்களில் ஒன்றாகும். “We are perennial waters !” (நாங்கள் என்றும் வற்றாத ஜீவ ஊற்று...) என்று நம் சற்குரு அடிக்கடி பிரயோகம் செய்யும் சொற்றொடரின் மகத்துவம் கொண்டராங்கி திருத்தலத்தில் பிரதிபலிக்கின்றது.

திருஅண்ணாமலையின் உயரம் மனித கண்ணுக்குப் புலனாகும் வகையில் சுமார் 1500 அடி என்று சொல்வது வழக்கம். உண்மையில் திருஅண்ணாமலையின் உயரம் எல்லையில்லாமல் விரிந்து சென்று கொண்டே இருப்பது. மகாவிஷ்ணுவும் பிரம்மாவும் இறைவனின் அடி முடி தேடிய வைபவத்தை இங்கு நினைவு கூர்க. நம் கோவணாண்டி, சிறுவன் வெங்கடராமனை தன்னுடன் அழைத்துக் கொண்டு திருஅண்ணாமலையின் மேலே பல்லாயிரம் மைல்கள் உயரத்திற்கு பறந்து சென்ற ஆன்மீக அனுபவத்தை, தெய்வீக சிவானுபூதியை நாம் அடிமை கண்ட ஆனந்த நிகழ்ச்சியாக இரசித்திருக்கிறோம்.
திருஅண்ணாமலையில் பூமியிலிருந்து சுமார் 6000 மைல்கள் உயரத்தில் அமைந்துள்ளதே கொண்டராங்கி சக்திகள். இந்த கொண்டராங்கி சக்திகளே கைலாயத்தின் உச்சிவழுதி சக்திகள் பூமியில் ஐயர்மலையாக உருவெடுத்ததைப் போல கொண்டராங்கி மலையில் ஸ்ரீமல்லிகார்ச்சுனேஸ்வரர் சிவாலயமாக உருவெடுத்து உள்ளன.
இது சம்பந்தமான ஆன்மீக வரலாற்றை அறிந்து கொள்வோமா?
பாண்டவர்களின் வனவாசத்தில் தர்மர், பீமசேனர் முதலிய அனைவருமே தாங்கள் ஏதாவது ஒரு தவத்தை, வழிபாட்டை இயற்றியவாறே இருந்தனர். இந்த வழிபாட்டின் பலன்கள் எல்லாம் மக்கள் சமுதாயத்திற்கே பகவான் கிருஷ்ணரால் அளிக்கப்பட்டன என்பதை நாம் அறிவோம். பீம சேனன் நரகாசுரனைக் கொன்று மக்களுக்கு தீபாவளி பண்டிகையை பெற்றுத் தந்தது முதல், சிவபெருமானிடமிருந்து பாசுபத அஸ்திரத்தை அர்ச்சுனன் பெற்றது போன்ற பல அரிய சேவைகள் யாவும் பஞ்ச பாண்டவர்களின் வனவாசத்தில்தான் அமைந்தன.

எப்படி ராமபிரான் தன்னுடைய வனவாசத்தில் ஆயிரக் கணக்கான ரிஷிகளுக்கு அனுகிரகம் அளித்து, பல கொடிய தீய சக்திகளை அரக்க சக்திகளை மாய்த்தாரோ அதே போல பஞ்சபாண்டவர்களின் வனவாசமும் இத்தகைய ஒரு வேள்வியாக அமைந்தது என்பதே நாம் புரிந்து தெளிய வேண்டிய தெய்வீகமாகும்.
பாண்டவர்களின் வனவாசத்தில் ஒரு நாள் பகவான் கிருஷ்ணர் அர்ச்சுனனை தனியாக அழைத்து அவனிடம் கொண்டராங்கி மலையின் மகத்துவத்தை விவரித்தார். கொண்டராங்கி சக்திகளை திருஅண்ணாமலையிலிருந்து ஈர்த்து அந்த சக்திகளை மக்கள் வழிபாட்டிற்காக சிவலிங்க வடிவில் அமைக்கும் சேவையைப் புரியவல்லவன் அர்ஜுனர் ஒருவனே என்று விவரித்து அவன் திறமையையும் எடுத்துக் கூறி தக்க வழிகாட்டுதலை அளித்தார். பகவான் கிருஷ்ணர் கூறிய வண்ணம் தொடர்ந்து திருஅண்ணாமலையை கிரிவலம் வர ஆரம்பித்தான் அர்ச்சுனன்.
ஒவ்வொரு முறை கிரிவலம் நிறைவடைந்த பின் பகவான் கூறியபடி தன்னுடைய அஸ்திரத்தில் ஒரு மல்லிகைப் பூவை வைத்து திருஅண்ணாமலை உச்சியை நோக்கி எய்வான். அந்த அஸ்திரம் பல மணி நேரங்கள் கழித்து மீண்டும் தரைக்கு இறங்கி வரும். அப்போது அந்த அஸ்திரத்தில் அர்ச்சுனன் தொடுத்த மல்லிகைப் பூ இருக்கிறதா என்று பார்க்க வேண்டும். அவ்வாறு அந்த அஸ்திரத்தில் மல்லிகைப்பூ இருந்தால் திருஅண்ணாமலையான் அந்த மல்லிகைப்பூவை ஏற்கவில்லை என்று பொருள்.
அர்ச்சுனன் அந்த மல்லிகைப்பூவை இறைப் பிரசாதமாக தன் வலது காதில் அணிந்து கொண்டு தொடர்ந்து திருஅண்ணாமலையாரை கிரிவலம் வர வேண்டும். இவ்வாறு அர்ச்சுனனின் கிரிவலம் கிட்டத்தட்ட ஒரு வருட காலத்திற்கு தொடர்ந்து கொண்டே இருந்தது. இறுதியில் ஒரு நாள் அர்ச்சுனன் இவ்வாறு திருஅண்ணாமலையை கிரிவலம் வந்து மலையை நோக்கி மல்லிகைப் பூவை தொடுத்து அஸ்திரத்தை எய்தான். என்ன ஆச்சரியம் ... அந்த அஸ்திரம் புறப்பட்டது முதல் திருஅண்ணாமலையின் உச்சியை நோக்கி செல்லச் செல்ல எத்தனையோ விதவிதமான தெய்வீக காட்சிகள் அர்ச்சுனனுக்கு தெளிவாகத் தெரிய ஆரம்பித்தன. எல்லையில்லா பரவசம் அடைந்தான் அர்ச்சுனன்.
இறுதியில் அந்த அஸ்திரம் மல்லிகைப்பூவை இறைவனின் திருவடிகளில் சமர்ப்பித்து விட்டு அஸ்திரம் மட்டும் தனியாக இறங்கிய தெய்வீகக் காட்சியில் தன்னையே மறந்து நின்றான் அர்ச்சுனன். அந்த திவ்ய தரிசனக் காட்சியில், இறைவன் அளித்த பரமானந்தத்திலிருந்து மீண்டும் பூலோகத்திற்கு வர பல மணி நேரம் ஆயிற்றாம்.

காலச் சக்கரம் சுழன்றது ...
மகாபாரத யுத்தம் ஆரம்பித்து உச்சகட்டத்தில் நடந்து கொண்டிருந்தது. அப்போது அஸ்வத்தாமன் பிரம்மாஸ்திரத்தை வானில் எய்து விட்டான். அதற்கு எதிராக அர்ச்சுனனும் ஒரு பிரம்மாஸ்திரத்தை வானில் எய்து விட்டான். சரியாக அத்தருணத்தில் தேரோட்டியான பகவான், “அர்ச்சுனா, ஒப்பற்ற வீரனான நீ இத்தகைய ஒரு தகாத காரியத்தைச் செய்து விட்டாயே. இரு பிரம்மாஸ்திரங்கள் வானில் சஞ்சரிக்கலாமா? பிரபஞ்சம் என்னாவது?” என்று கேட்கவே, செய்வதறியாது திகைத்தான். இப்போது என்ன செய்வது? இந்த இக்கட்டான சூழ்நிலையில் தன்னையும் பிரபஞ்சத்தையும் காத்தருளுமாறு பகவானிடம் சரணடைந்தான். “மா சுச..., வருந்தாதே குந்தி மைந்தா...”, என்று கூறி பகவான் அர்ச்சுனனுக்கு ஆறுதல் அளித்து அர்ச்சுனன் விடுத்த பிரம்மாஸ்திரத்தை மீண்டும் பெற்றுக் கொள்ளுமாறு அறிவுறுத்தினார் பகவான்.
மீண்டும் திகைத்தான் அர்ச்சுனன். பிரம்மாஸ்திரத்தை எய்வதற்கு மட்டும்தான் அர்ச்சுனனுக்கு தெரியுமே தவிர அதை மீண்டும் பெறும் முறையை அவனுடைய குருநாதர் அவனுக்கு கற்பிக்கவில்லை. எய்த பிரம்மாஸ்திரத்தை மீண்டும் தன்னிலைக்கு கொண்டு வர முடியும் என்ற இரகசியம் தனுர் வேதத்தில் கூட இருப்பது போல் அவனுக்குத் தோன்றவில்லை. அர்ச்சுனனின் இந்தக் குழப்பமான மனோ நிலையை அறியாதவனா மாயக் கிருஷ்ணன். அப்போதுதான் பகவான் திருஅண்ணாமலை கொண்டராங்கி சக்திகளை அர்ச்சுனனுக்கு விளக்கி இவ்வாறு பிரம்மாஸ்திரத்தையும் தன்னிலைக்கு கொண்டு வரும் சக்தி பெற்றவையே கொண்டராங்கி சக்திகள் என்று எடுத்துக் கூறவே மறுவிநாடி அர்ச்சுனன் திருஅண்ணாமலையாரை தியானித்து பிரம்மாஸ்திர தேவதைகளிடம் வேண்டுகோளை சமர்ப்பிக்க மகுடிக்கு கட்டுப்பட்ட பாம்பு போல வானில் சீறிப் பாய்ந்த பிரம்மாஸ்திரம் அமைதி அடைந்து அர்ச்சுனனின் அம்பாரத் துணியில் வந்து அமர்ந்து கொண்டது.
மகாபாரத யுத்தத்தில் கோடிக் கணக்கான போர் வீரர்கள் மரணம் அடைந்தனர், கோடிக் கணக்கான குடும்பங்கள் தங்கள் ஆதரவை இழந்து தவித்தன என்று நாம் எத்தனையோ துன்பங்களைப் பற்றி கூறினாலும் இந்த யுத்தத்தில் விளைந்த பல அற்புதங்களில் ஒன்றே நாம் கொண்டராங்கி ஈசனை வழிபடும் சந்தர்ப்பத்தை பெற்றோம் என்பதை மறக்கக் கூடாது. சுமார் 6000 மைல்கள் உயரத்தில் திருஅண்ணாமலையில் வியாபித்து இருந்த சிவ சக்திகளை மக்கள் வழிபாட்டிற்காக பெற்றுத் தந்த பெருமை அர்ச்சுனனைத்தானே சாரும். அதனால் இத்தல ஈசனின் இயற்பெயர் ஸ்ரீபிரம்மதேவ ஈசன் என்பதாக இருந்தாலும் அர்ச்சுனனின் தியாகத்தைப் பாராட்டும் விதமாக ஸ்ரீமல்லிகார்ச்சுனேஸ்வரர் என்றே இத்தல ஈசன் அழைக்கப்படுகிறார்.
கொண்டராங்கி சக்திகள் என்பவை பிரம்மாஸ்திரத்தையும் தன்னிலைக்கு கொண்டு வரும் சக்தி பெற்றவை என்பதை நாம் இப்போது அறிவோம். ஆனால், இந்த சக்திகளை மனிதர்கள் எப்படிப் பயன்படுத்திக் கொள்வது? இதை விளக்கவல்லவர் நம் சற்குரு ஒருவரே. வரும் சோபகிருது வருட புத்தாண்டு வழிபாடு இந்த கொண்டராங்கி சக்திகளை மனிதர்கள் பெறும் முறையை விவரிக்கிறது. இதன்படி இந்த சோபகிருது வருட கிரக சஞ்சார படத்தை பச்சரிசி மாவால் ஒரு மாம்பலகையில் அல்லது வாழைஇலையில் வரைந்து வைத்துக் கொள்ள வேண்டும். இதன் அருகில் அவரவர் தங்கள் முழங்கை நீளம் குறுக்களவாக, விட்டமாக அமையும் ஒரு மூங்கில் சட்டத்தை அமைத்துக் கொள்ள வேண்டும். இதன் மேல் ஒரு மூங்கில் கூடையை அமைத்துக் கொள்ள வேண்டும். இந்த மூங்கில் கூடையைச் சுற்றி அவரவர் கையால் தொடுத்த மல்லிகைப் பூச்சரங்களை கூடை முழுவதும் மறையும் அளவிற்கு நன்றாகச் சுற்ற வேண்டும். இவ்வாறு மூங்கில் கூடை மேல் சுற்றப்பட்ட மல்லிகைப் பூச்சரங்களே கொண்டராங்கி சக்திகளை ஈர்க்கவல்லவை.

கொண்டராங்கி திருமலை
கொண்டராங்கி மலைக்கு நேரில் சென்று இறைவனை தரிசிக்கக் கூடியவர்கள் மேற்கூறிய முறையில் மல்லிகைப் பூக்களைத் தொடுத்து இறைவனுக்கு அர்ப்பணிக்கலாம். பல்வேறு காரணங்களால் கொண்டராங்கி மலைக்கு செல்ல முடியாதவர்கள் அவரவர் இல்லத்திலேயே புத்தாண்டு வழிபாடுகளை மேற்கொள்ளலாம். தேங்காய், வெல்லம், முந்திரிப் பருப்பு அல்லது இதற்கு மேலும் அவரவர் விருப்பம் போல் பொருட்களை சேர்ந்து இனிப்பு பதார்த்தங்களை தயார் செய்து கிரக சஞ்சாரத்தின் கோலத்தின் முன்பும் இந்த ‘கொண்டராங்கி மலையின்’ முன்பும் நைவேத்யமாக படைத்து புத்தாண்டு வழிபாட்டை சிறப்பாக நிறைவேற்றும்படிக் கேட்டுக் கொள்கிறோம்.
சோபகிருது தமிழ்ப் புத்தாண்டு 14 ஏப்ரல் 2023 வெள்ளிக் கிழமை மதியம் 3 மணி அளவில் தோன்றுவதால் இந்த முகூர்த்த நேரத்தில் மேற்கூறிய முறையில் வழிபாடுகளை நிகழ்த்தி பயன்பெறுமாறு அடியார்களை கேட்டுக் கொள்கிறோம். பஞ்சாங்க படன வழிபாட்டை வருடப் பிறப்பு மாலையோ அல்லது புத்தாண்டு உதயத்தின்போதோ வைத்துக் கொள்வது அவரவர் விருப்பத்தைப் பொறுத்தது. நவமி திதி, திருவோண நட்சத்திரம், சாத்திய யோகம், கரசை கரணம், மரண யோகம் போன்ற கால அம்சங்களுடன் தோன்றுவதால் இத்தகைய கிரக சஞ்சார அமைப்பில் தோன்றும் தீய சக்திகளை நசிக்கவும், நற்சக்திகளை பெருக்கவும் மேற்கண்ட வழிபாடு அடியார்களுக்கு உறுதுணையாக அமையும்.
பொதுவாக, ஒரு புத்தாண்டு பிறக்கும் பலனை அதன் நவநாயகர்களை வைத்தே முடிவு செய்வது வழக்கம். அம்முறையில் சோபகிருது தமிழ்ப் புத்தாண்டு ராஜா புதன், மந்திரி வெள்ளி, சேனாதிபதி குரு என்றவாறு சுப கிரகங்களின் அருளாட்சியுடன் தொடங்குவது என்பது நாம் பெற்ற பெரும் பேறாகும்.
வைரத்தில் blue jager என்ற ஒரு வகை வைரம் உண்டு. இது தற்போது அரிதாகி விட்டது, சில குடும்பங்களில் இத்தகைய வைரங்கள் இன்றும் பரம்பரை சொத்தாக பாதுகாத்து வைக்கப்பட்டுள்ளன. இத்தகைய வைர ஆபரணங்களை நன்றாக சுத்தம் செய்து முதல் நாள் இரவில் மல்லிகைப்பூ கலந்த நீரில் வைத்திருந்து மறுநாள் இத்தகைய வைர ஆபரணங்களை கொண்டராங்கி மலைக்குச் சூட்டி வழிபடுவது என்பது வாழ்வில் கிடைத்தற்கரிய பேறே. மல்லிகைப்பூ ஊறிய தீர்த்தத்தை சிறிதளவு பிரசாதமாக அருந்தி மிச்ச தீர்த்தத்தை தென்னை போன்ற பால்விருட்சங்களில் சேர்த்து விடலாம்.
வழிபாட்டிற்குப் பின் இத்தகைய ஆபரணங்களை நாள் முழுவதும் தாங்கள் அணிந்து இறை மூர்த்திகளை வணங்குவதால் கிட்டும் பலன்கள் அற்புதமே.

கொண்டராங்கி திருமலை
புத்தாண்டு தினத்தன்று கொண்டராங்கி மலையை தரிசனம் செய்ய முடியாவிட்டாலும் இந்த சோபகிருது வருட உத்தராயண காலத்திற்குள் அதாவது ஆனி மாத இறுதிக்குள் திருஅண்ணாமலையை கிரிவலம் வந்து தரிசனம் செய்து, கொண்டராங்கி ஈசனை அடிவாரத்தில் இருந்தோ, அல்லது மலையேறிச் சென்றோ தரிசனம் செய்து, மீண்டும் திருஅண்ணாமலையை கிரிவலம் வந்து இவ்வாறு அரிதிலும் அரிய கொண்டராங்கி சக்திகளைப் பெற்றுத் தந்த நம் சற்குருவிற்கும், நம் மூதாதையர்களுக்கும் நன்றி கூறி வழிபடுவதே மனிதக் கடமையாகும். திருஅண்ணாமலையை கிரிவலம் வரும்போது குபேர லிங்கப் பகுதியிலிருந்து திருஅண்ணாமலையை நோக்கி ஆறு முறை சாஷ்டாங்கமாக தரையில் விழுந்து வணங்கி வழிபடுவது சிறப்பு.
மூங்கில் சட்டங்கள், மூங்கில் குச்சிகள் கொண்டு இங்கு விவரித்த முறையில் கொண்டராங்கி சிறுமலையை உருவாக்கி மல்லிகைப் பூச்சரங்களால் சுற்றி வழிபாடுகள் இயற்றியபின் அந்த கொண்டராங்கி மூங்கில் மலையை வைத்து மேலும் பல வழிபாடுகளை மேற்கொள்ளலாம். இந்த கொண்டராங்கி மூங்கில் மலையை விரும்பினால் ஆறு போன்ற நீர் நிலைகளில் விசர்ஜனம் செய்து விடலாம். இந்த மலையை வைத்து தொடர்ந்து வழிபாடுகளை இயற்ற விரும்புபவர்கள் இந்த மலையைச் சுற்றி கீழே குறித்த வண்ணம் பலவண்ண காகிதப் பட்டைகளால் அலங்கரித்து அதன் நடுவில் வண்ண விளக்குகள், பல டிசைன் மின்விளக்குகளை ஏற்றி தங்கள் வாசலில் உயரமான இடத்தில் கட்டி வைத்தும் தொடர்ந்து வழிபடலாம்.
கொண்டராங்கி ‘சிறுமலை’ அளவுகள் நமக்கு பிரமிப்பு ஊட்டுபவையே. அவரவர் முழங்கை நீளத்திற்கு குறுக்கு சட்டத்தை அமைத்துக் கொள்ள வேண்டும். முழங்கை நீளம் என்பது அவரவர் கைக்கு இரு சாண் நீளம் உடையதே. இந்த சிறுமலையின் உயரம் மூன்று சாண் அளவிற்கு அமைத்துக் கொள்ள வேண்டும். சிறுமலையின் பிரதிபலிப்பும் மூன்று சாண் அளவிற்கு அமையுமே. இவ்வாறு தோற்றமும் பிரதிபலிப்பும் சேர்ந்த ஆறு சாண் உயரமே உலக்கை வடிவில் திகழும் நம் பூமி ஆகும். இவ்வாறு பூமியின் வடிவை உலக்கை என்று எதிர்கால விஞ்ஞானம் உணர்ந்து, புரிந்து கொள்ள வேண்டிய காலம் நிச்சயம் வரும் என்று நம் சற்குரு உரைத்தாலும், அதுவரையில் இந்த உலக உலக்கை வடிவு அளிக்கும் அனுகிரகத்தை இழந்து விட வேண்டுமா என்ன? இத்தகைய ஒரு பேரிழப்பை அடியார்கள் பெறக் கூடாது என்ற நல்லெண்ணத்தின் அடிப்படையில் எழுந்ததே, நீங்கள் உருவாக்கப் போகும் சிறுமலை கொண்டராங்கியே இதற்கு சான்று ஆகும்.

கொண்டராங்கி சிறுமலை
சாண் அளவு என்றவாறு மனிதனின் கட்டை விரலுக்கும் சுண்டு விரலுக்கும் இடையே அமைவதுதானே பிரம்ம தீர்த்தம் பொலியும் உள்ளங்கை. இந்த உள்ளங்கையில் குருவின் நித்திய தத்துவமாக ஆயுள் ரேகை, இதய ரேகை, புத்தி ரேகை என்ற மூன்று முக்கியமான ரேகைகள் அமைவதும் குருவின் வழிகாட்டுதல் நம் வாழ்க்கையுடன் எந்த அளவிற்கு பின்னிப் பிணைந்துள்ளது என்பதற்கு மற்றுமோர் சான்றாகும்.
பல்வேறு காரணங்களால் எட்டு பட்டைகள் உடைய கொண்டராங்கி மலை இங்கு நம் சற்குருவால் விளக்கப்படுகிறது என்றாலும் அடியார்கள் தங்கள் விருப்பம்போல் ஆறு, எட்டு, பத்து, பன்னிரெண்டு பட்டைகள் உடைய மலைகளைக் கூட உருவாக்கி பலன் பெறலாம். நாம் நினைப்பது போல் மல்லிகை மலர்களால் அலங்கரிக்கப்பட்ட இந்த பட்டைகள் நடுவே தோன்றுவது சாதாரண வெற்றிடம் அல்ல.
இந்த வெற்றிடத்தில் துலங்கும் நம் கற்பனையை மிஞ்சும் அதீத ஆன்மீக சக்தியைப் பற்றி நம் சற்குரு பலமுறை விவரித்து உள்ளார். நாம் இரு உள்ளங்கைகளைக் குவித்து ஒருவரை வணங்குகிறோம். அவ்வாறு வணங்கும்போது இரு உள்ளங்கைகளின் இடையே தோன்றும் வெற்றிடம் நம் இதயத்தில் உறையும் ஆன்ம சக்தியுடன் தொடர்பு கொண்டு அது நாம் வணங்கும் உயிரின் ஆன்மா சக்திகளுக்கு உரிய மரியாதையை, வணக்கத்தை தெரிவித்து விடுகின்றது. இந்த உள்ளங்கை சக்திகளை மேன்மைப்படுத்தவே, மேலும் மேலும் தூய்மைப்படுத்தவே நாம் ஆசமனம் என்னும் சிறந்த வழிபாட்டை மேற்கொள்கிறோம். ஆசமனத்தின்போது நாம் உள்ளங்கையில் வார்க்கும் ஒரு துளி தீர்த்தமே பிரம்ம தீர்த்தம் எனப்படுகிறது. அதாவது பிரம்ம சக்திகள் நிறைந்த தீர்த்தம், ஒரு ஆன்மா மற்றோர் ஆன்மாவுடன் எளிதாக தொடர்பு கொள்ளும் சக்தி உடைய தீர்த்தம் என்றெல்லாம் புகழப்படுகிறது. இந்த தீர்த்தத்தை மேலும் புனிதப்படுத்தவே உள்ளங்கையில் மூன்று முறை ஊற்றி அச்சுதா, அனந்தா, கோவிந்தா என்ற பெருமாள் நாமங்களால் துதிக்கிறோம்.
இவ்வாறு மனித உடலில் தோன்றும் சிறு அளவு உள்ளங்கை தீர்த்தமே மற்றோர் ஆன்மாவுடன் தொடர்பு கொள்ளும் சக்தி பெற்றது என்றால் கொண்டராங்கி மலை அளவு கொண்ட ‘வெற்றிடம்’ பல லட்சம், பல கோடி ஆன்மாக்களுடன் தொடர்பு கொள்ளும் சக்தியை ஏன் பெறாது என்பதே நாம் சிந்தித்து தெளிய வேண்டிய வினா.
கொண்டராங்கி மலையின் சக்திகள் திருஅண்ணாமலையில் 6000 மைல்கள் உயரத்தில் வியாபித்து உள்ளன என்று நாம் குறிப்பிட்டோம். அவரவர் பக்தி நிலையைப் பொறுத்து, சற்குருவின் மேல் உள்ள ஆழ்ந்த நம்பிக்கையைப் பொறுத்து இந்த கொண்டராங்கி சிறுமலையில் உள்ள ‘வெற்றிடம்’ எந்த அளவிற்கு வேண்டுமானாலும் இந்த பிரபஞ்சத்தையே வியாபிக்கும் சக்தி பெறும். இந்த அபூர்வ சக்தியால்தான் நம் சற்குரு போன்ற உத்தமர்கள் ஒரு அணுகுண்டுவின் அழிக்கும் சக்திகளை ஆக்க சக்திகளாக, உயிர் சக்திகளாக, ஜீவ சக்திகளாக மாற்றி இந்த உலகம் முழுவதிற்கும் அர்ப்பணிக்கின்றனர்.
| சித்திரை | சிவப்பு |
| வைகாசி | வானநீலம் |
| ஆனி | பச்சை |
| ஆடி | வெள்ளை |
| ஆவணி | ஆரஞ்சு |
| புரட்டாசி | சிவப்பு வெண்மை கலந்த நிறம் |
| ஐப்பசி | கருநீலம் |
| கார்த்திகை | மஞ்சள் |
| மார்கழி | கிளிப்பச்சை |
| தை | ரோஸ் |
| மாசி | கரும்பச்சை |
| பங்குனி | மஞ்சள் |
“ஒரு அணுகுண்டு போட்டு லட்சம் பேரை மாய்ப்பது பிரமாதமில்லை, ஒரு குண்டு போட்டு லட்சம் நெல் மூட்டைகளை விழ வைத்தால் அதுவே சாதனை...,” என்பார் கோவணாண்டி. இது ஏதோ ஒரு உயர்ந்த மனத்தில் தோன்றிய ஒரு நல்ல எண்ணம் என்று நாம் நினைக்கலாம். பொழுதுபோக்கிற்காக, விளையாட்டிற்காக தங்கள் வார்த்தைகளையோ, நேரத்தையோ செலவழிப்பவர்கள் அல்ல மகான்கள். எப்போது ஒரு குண்டு போட்டு லட்சம் நெல் மூட்டைகளை விழ வைப்பதே சாதனை என்று கோவணாண்டி கூறி விட்டாரோ அப்போதே அதை நிறைவேற்றுவதற்கான ஆயத்த ஏற்பாடுகளை தன் ஆருயிர் சீடன் செய்து விடுவான் என்று தெரியும் நம் கோவணாண்டிக்கு.

கொண்டராங்கி திருமலை
இத்தகைய அரும்பெருஞ் சாதனைகளை எல்லாம் தான் திருஅண்ணாமலையில் அன்னதானம் நிகழ்த்தியபோதெல்லாம் எவரும் அறியா வண்ணம் பல்லாயிரக் கணக்கான மக்களின் அரும்பசியை இத்தகைய ‘நெல் மூட்டைகளில்’ விளைந்த அன்னப் பிரசாதம் மூலம் போக்கினார் நம் சற்குரு என்பதை ஒரு சில அடியார்களே அறிவர். இத்தகைய அரிய திருப்பணிகள் இனியும் தொடர மக்களும் இத்தகைய அபூர்வ கொண்டராங்கி சக்திகளை குரு பிரசாதமாக அளிப்பதே ஸ்ரீமல்லிகார்ச்சுனேஸ்வரர் வழிபாடு. அவரவர் குருவின் மேல் கொள்ளும் நம்பிக்கையைப் பொறுத்து கொண்டராங்கி மலையாக பாவிக்கும் ஒரு மல்லிகை மலையில் ஒரு மூட்டை என்ன, ஆயிரம் நெல் மூட்டைகள் என்ன, லட்சக் கணக்கான தானிய மூட்டைகளின் தானப் பலன்களை அளிக்கவல்லவரே நம் சற்குரு.
தேவை நம்பிக்கை, குரு நம்பிக்கை ஒன்று மட்டுமே...
மல்லிகைப் பூ மலையை உருவாக்கி புத்தாண்டு தினத்தில் வழிபாடு நிகழ்த்துவதைப் போல மாதப் பிறப்பு நாட்களிலும், அவரவர் பிறந்த நாட்கள், திருமண நாட்கள் போன்ற நாட்களிலும் பூந்தி மலை, தேங்காய் பர்பி மலை, மூன்று பருப்புகள் சேர்ந்த நிலக்கடலை பர்பி மலைகள், ஊத்துக்குளி வெண்ணெய் மலை, உடைத்த முந்திரிப் பருப்பு மலை போன்றவற்றை தயார் செய்து வழிபாடுகள் இயற்றி அவற்றை தானமாக அளித்தலால் கிட்டும் பலன்களை வர்ணிக்க வார்த்தைகளே இல்லை.
இவ்வாறு லட்சக் கணக்கான உயிரினங்களை மாய்க்கும் பிரம்மாஸ்திரத்தின் சக்தியையும் தன்னிலைப்படுத்தி அதை மக்களின் நல்வாழ்விற்காக அளிக்கும் சக்தி கொண்ட நம் சற்குருவின் தியாகச் செயலுக்கு இணையான ஒன்றை இதுவரை நீங்கள் உங்கள் வாழ்க்கையில் கேள்விப்பட்டதுதான் உண்டா? இவ்வாறு அழிக்கும் சக்திகளை, உயிர்களை மாய்க்கும் சக்திகளை புனரமைத்து மக்களின் சீரிய சிறந்த வாழ்விற்கு அர்ப்பணிக்கும் மலையாக கொண்டராங்கி மலை திகழ்வதால் இது கொண்டராங்கி திருமலை என்று சித்தர்களால் புகழப்படுவதில் வியப்பென்ன?

கொண்டராங்கி திருமலை
நம் சபையில் ஒரு அடியார் இருந்தார். மற்ற அடியார்களைப் போல நம் சற்குருவிடம் அடைக்கலம் கொள்ளும் முன் பல ஆன்மீகப் பெரியோர்கள் கூறிய வழிபாட்டு முறைகளைக் கடைபிடித்து வந்தார். அப்போது ஒரு நாள் சென்னை மெரீனா கடற்கரை அருகில் உள்ள ஒரு தியான மண்டபத்தில் தன்னை விட மூத்த அடியார் ஒருவருடன் சேர்ந்து தியானம் செய்து கொண்டிருந்தார். அப்போது தான் நுண்ணிழைப் பயணத்தில் (astral travel) சென்று அருகில் உள்ள மெரீனா கடற்கரை போன்ற இடங்களைப் பார்த்ததாகக் கூறினார். அருகில் இருந்த மூத்த அடியார் இது கேட்டு, தான் ஆஸ்ட்ரல் பயணம் செய்யவில்லை என்றால் தன்னுடைய தகுதியைப் பற்றி பிறர் தவறாக மதிப்பிட்டு விடுவார்களே என்று நினைத்து, தானும் அந்த அடியாரின் அருகிலேயே பறந்ததாகக் கூறினாராம். அடியார் கூறிய இந்த உரைகளை எல்லாம் பொறுமையாகக் கேட்டுக் கொண்டிருந்த நம் சற்குரு பதில் ஒன்றும் அளிக்கவில்லை.
சற்று நேரம் கழித்து அந்த அடியார் அந்த இடத்தை விட்டு அகன்று விட்டார். அப்போது நம் சற்குரு புன்னகையுடன் அருகில் இருந்த அடியாரிடம், “ஏனய்யா, அவன் ஆஸ்ட்ரல் பயணத்தில் செல்வதாக இருந்தால் அருகில் இருக்கும் மெரீனா பீச்சைப் பார்க்க செல்ல வேண்டுமா என்ன? ஐந்து நிமிடம் அங்கிருந்து நடந்தால் வருவது மெரீனா பீச்...”, என்றார். சற்குருவின் விளக்கம் அப்போதைக்கு புரியவில்லை என்றாலும் பல்லாண்டுகள் கழித்தே நம் சற்குரு உரையின் அருமை பளிச்சிட்டது.
எப்போது ?
நம் சற்குரு உடலுடனே கோவணாண்டி பெரியவருடன் திருஅண்ணாமலை உச்சியை நோக்கி பல்லாயிரம் மைல்கள் பறந்து சென்ற அனுபவத்தை பகிர்ந்து கொண்டபோது !
ஆயிரக் கணக்கான மைல்கள் பறந்து சென்றபோது கிடைத்த கொண்டராங்கி என்ற ஒரே ஒரு சக்தியின் வலிமையைக் கொண்டே லட்சக் கணக்கான பசியால் வாடிய வயிற்றுக்கு உணவளிக்க முடிந்தது என்றால், இன்றும் இந்த நற்பணி தொடர நம் சற்குருவின் பயணம் வழிகாட்டுகிறது என்றால், நம் சற்குரு பெற்ற மற்ற தரிசனங்களின் பலன்கள் எப்படி இருக்கும்? அவற்றின் பலன்கள் சமுதாயத்திற்கு என்னென்ன நற்சக்திகளை எல்லாம் கூட்டும்?
அஸ்வத்தாமனின் அருந்தவம்
மகாபாரதத்தில் துரோணாச்சாரியாரின் அருமைப் புதல்வனே அஸ்வத்தாமன், சிரஞ்சீவி. ஆனால், அவன் துரியோதனனிடம் நட்பு கொண்டிருந்தமையால் பாண்டவர்களை ஒழிப்பதில் மிகவும் தீவிரமாக இருந்தான். பாண்டவர்கள் ஐவரையும் அழிக்கத் திட்டம் தீட்டி, அவர்களுக்குப் பதிலாக அவர்கள் புதல்வர்கள் உபபாண்டவர்கள் ஐவரையும் அவர்கள் உறங்கும்போது கொன்று விட்டான். பிரம்மாஸ்திரத்தை ஏவி உலகையே, குறிப்பாக பாண்டவ குலம் அனைத்தையும் நாசம் செய்ய நினைத்து அது முடியாமல் போகவே இறுதியில் பகவான் கிருஷ்ணரிடம் சரணடைந்தான்.
“கிருஷ்ணா, வேண்டியவர்களுக்கு வேண்டியதை தட்டாமல் நீ அளிப்பாய் என அறிந்து உன்னிடம் ஒன்று யாசகமாகப் பெற வேண்டி வந்துள்ளேன். நான் கேட்பதை நீ தருவாயா?” என்று மிகவும் பவ்யமாகக் கேட்டான். மாயக் கிருஷ்ணனிடமே விளையாட்டா? ஆனால், கிருஷ்ண பகவானோ ஒன்றும் அறியாதவர் போல், “அஸ்வத்தாமா, நீ கேட்டு நான் எதையும் மறுப்பேனா என்ன? உனக்கு வேண்டியதை தாராளமாக கேட்டுப் பெற்றுக் கொள்...”, என்று கூறவே, அஸ்வத்தாமன் தைரியம் அடைந்து, “கிருஷ்ணா ... வந்து ... அதாவது ... என்று கூறி பெருத்த பீடிகையுடன் தயங்கி தயங்கி ... உன்னுடைய சுதர்சன சக்கரத்தை எனக்கு தானமாக அளிக்க வேண்டும்...”, என்று கேட்டான்.
பகவான் கிருஷ்ணரோ பலமாக நகைத்து, “என்ன அஸ்வத்தாமா ... இதற்காகவா இவ்வளவு பெரிய பீடிகை ... இதோ நீயே எடுத்துக் கொள்...”, என்று பட்டு பீதாம்பரத்தில் அழகாக அலங்கரிக்கப்பட்டு பிரகாசித்த சுதர்சன சக்கரத்தை சுட்டிக் காட்டினார். எல்லையில்லா ஆனந்தம் அடைந்தான் அஸ்வத்தாமன். ஒரே பரபரப்புடன் அந்த சுதர்சன சக்கரத்தின் மேல் பாய்ந்து அதைக் கையில் எடுக்க முயன்றான் ... ஆனால், என்ன ஆச்சரியம் ... என்ன முயன்றும், தன் பலம் அனைத்தையும் பிரயோகம் செய்த போதும் சுதர்சன சக்கரத்தை இம்மி அளவு கூட நகர்த்த முடியவில்லை ... உடல் முழுவதும் வியர்வையால் நனைய மேல் மூச்சு கீழ் மூச்சு வாங்க அயர்ந்து நின்றான். அனைத்தும் அறிந்த பகவானோ, “என்ன அஸ்வத்தாமா, மிகவும் சோர்வடைந்து விட்டாயே ... வேண்டுமானால் தக்க ஓய்வெடுத்து விட்டு மீண்டும் முயற்சி செய்யலாமே?” என்று கூறி ஊக்கப்படுத்தினார்.
அஸ்வத்தாமனோ தன்னுடைய இயலாமையையும், வானளாவ உயர்ந்து நின்ற பகவான் கிருஷ்ணரின் பெருமையையும் உணர்ந்து கொண்டு பகவானின் திருவடிகளில் வீழ்ந்து வணங்கினான். சரியாக அந்நேரத்தில் அங்கு வந்து சேர்ந்தனர் பஞ்சபாண்டவர்கள். உபபாண்டவர்கள் ஐவரையும், பிரம்மாஸ்திரம் எய்து உத்திரையின் கர்ப்பத்தில் இருந்த சிசுவையும் அழிக்க நினைத்த அஸ்வத்தாமனின் மேல் அவர்கள் உருவிய பட்டாக்கத்தியுடன் பாயவே பகவான் கிருஷ்ணர் அவர்களை தடுத்து நிறுத்தி, “ஒருவன் எவ்வளவுதான் கொலைபாதகனாக இருந்தாலும் அவன் தன்னுடைய தவறுக்காக நினைத்து வருந்தினால் அவனை தண்டிப்பது முறையன்று, மேலும் அவன் உங்களுடைய அஸ்திர குருவின் மைந்தனாக இருப்பதாலும், அவன் குலத்தில் உங்களை விட உயர்ந்த நிலையில் நிற்பதாலும் அவனைத் தண்டிக்க நினைப்பது முறையன்று, ஆனால், அதே சமயத்தில் குறைந்த பட்ச தண்டனையை வழங்காமல் எந்த குற்றவாளியையும் வெறுமனே மன்னித்து விட முடியாது, எனவே அவனுடைய சிகையை, குடுமியை கத்தரித்து அவனை விரட்டி விடுங்கள்...”, என்று ஆலோசனை வழங்கவே, பாண்டவர்கள் பகவானின் உரைக்கு மறுப்பு தெரிவிக்காமல் அஸ்வத்தாமனின் சிகையை மட்டும் கத்தரித்து விட்டனர்.
அப்போது பகவான் கிருஷ்ணர், “அஸ்வத்தாமா, என்னிடம் வாள், கதை போன்ற எத்தனையோ ஆயுதங்கள் இருக்க சுதர்சன சக்கரத்தை மட்டும் கேட்டாயே, அது ஏன் என்று தெரிந்து கொள்ளலாமா?” என்று கேட்டாராம். அஸ்வத்தாமன் சற்று நேரம் மௌனமாக இருந்து விட்டு, “கிருஷ்ணா, உன்னிடம் எனக்கு தீரா பகை, இந்த மகாபாரத யுத்தம் அனைத்திற்கும் சூத்ரதாரி நீயே, அதனால் உன்னை எப்படியாவது அழித்து விட வேண்டும் என்று கங்கனம் கட்டிக் கொண்டு அலைந்தேன், உன்னை அழிக்கக் கூடிய ஒரே ஆயுதம் சுதர்சன சக்கரம் என்பதையும் நான் அறிவேன், அதனால்தான் எப்படியாவது அதை உன்னிடம் இருந்து பெற்று உன்னை ஒழிக்கலாம் என்று திட்டம் தீட்டினேன், ஆனால், அனைத்தும் அறிந்த நீயோ உன்னை அழிக்க, ஒழிக்க ஒருவன் திட்டம் தீட்டி நயவஞ்சமாக உன்னைக் கொல்ல நினைத்தாலும் அவனுக்கும் உதவ நின்ற உன்னுடைய தியாகம் என்னுடைய அகம்பாவத்தை முற்றிலுமாக அழித்து விட்டது, என்னுடைய அறிவுக் கண்கள் உன்னுடைய பெருந்தன்மையால் இப்போது திறந்து விட்டன, இனி எனக்கு எப்போதும் நல்ல காலம்தான்...,” என்று பேருவகையுடன் கூறி பகவானிடம் இருந்து நன்றியுடன் உத்தரவு பெற்றுக் கொண்டான் அஸ்வத்தாமன்.
பாண்டவர்கள், பகவானின் எல்லையில்லா தியாகம் அறிந்து தங்களை மறந்து நின்றனர்.

கொண்டராங்கி திருமலை
“பகவான் கிருஷ்ணரைப் பற்றி யாருமே புரிந்து கொள்ளவில்லை...ஐயா...”, என்பார் நம் சற்குரு. அஸ்வத்தாமனின் சிகையை கத்தரித்து அவனை அவமானப்படுத்தி அனுப்பிய நிகழ்ச்சியையும் இதற்கு உதாரணமாகக் கொள்ளலாம். உலகில் யாருமே நினைத்துப் பார்க்க முடியாத மகா பாதக செயலை எல்லாம் செய்த ஒரு கொடியவனின் சிகையை மட்டும் கத்தரித்து அனுப்பி விடுவது என்பதில் பாண்டவர்களில் எவருக்குமே உடன்பாடு இல்லைதான். ஆனால், கிருஷ்ண பகவானே தலையிட்டு இந்த தண்டனை மட்டும் போதும் என்று நினைக்கும்போது அவர் செயலை மறுத்துக் கூறும், எதிர்த்து வாதாடும் திறன் யாருக்குத்தான் இருக்கிறது?
இங்குதான் கிருஷ்ண பகவானின் தன்னிகரில்லா தனிப் பெருங்கருணை பிரகாசிக்கிறது என்பார் நம் சற்குரு. அஸ்வத்தாமன் வைத்திருந்த சிகையின் பெயர் தேனுபாலகம் என்பதாகும். பிரபஞ்சத்தில் முதன்மையான சிரஞ்சீவி மட்டுமே இந்த சிகையை வைத்துக் கொள்ளும் உரிமை பெற்றவன். இந்த சிகை கற்பனைக்கு எட்டாத பல சிறப்பு அம்சங்களைக் கொண்டது. உதாரணமாக, தேனுபாலகம் சிகை உள்ள ஒருவரைச் சுற்றி 12 மைல் தூரத்திற்கு எந்த விஷ ஜந்துவும் அண்டாது. அப்படி ஒரு வேளை அந்த விஷ ஜந்துகள் இருக்கும் இடத்திற்கு தேனுபாலகம் சிகை அணிந்த சிரஞ்சீவி சென்று விட்டால் அந்த விஷ பூச்சிகள் செயலிழந்து அமைதியாக அமர்ந்து விடும்.
இந்த அற்புதமான சிகையை அஸ்வத்தாமன் இழந்து விட்டான் என்பதை அறிந்த தேள், நட்டுவாக்கிளி, பாம்பு, பூரான் போன்ற அனைத்து பூச்சிகளும் அவனை மொய்த்து கடித்து துன்புறுத்த ஆரம்பித்தன. கடித்தால் மரணம் தராத பல விதமான அரிப்புகளை, ஊறல் உணர்வுகளைக் கொடுக்கும் பல பூச்சிகளும் அவனைக் கடிக்க ஆரம்பித்தன என்பதே அவன் அடைந்த எல்லையில்லா வேதனை ஆகும். சாதாரண மனிதனை அத்தகைய விஷ ஜந்துகளில் ஏதாவது ஒன்று கடித்தாலும் அவன் மரணம் அடைந்து விடுவான் என்றாலும் அஸ்வத்தாமன் சிரஞ்சீவி என்ற காரணத்தால் மரணம் அடையாமல் அந்த விஷ ஜந்துகள் அளித்த வேதனை அனைத்தையும் அவன் பொறுத்துக் கொள்ள வேண்டியதாயிற்று. எத்தனை நாட்களுக்கு, ஒரு வருடமா ... இல்லை இரண்டு வருடமா ? மூவாயிரம் ஆண்டுகளுக்கு ... சற்றே கற்பனை செய்து பாருங்கள் அஸ்வத்தாமனின் பரிதாபகரமான நிலையை.

கொண்டராங்கி திருமலை
கொண்டராங்கி மலையின் சக்திகள் அவனை எத்தகைய விஷ ஜந்துகளின் தாக்குதலிலிருந்தும் காப்பாற்றும் என்பதை அவன் தெளிவாக உணர்ந்திருந்தாலும் அவன் கொண்டராங்கி திருமலையையே நெருங்க முடியாத அளவிற்கு அவன் செய்த கொடிய வினைகள் அவனைத் தடுத்து நிறுத்தி விட்டன. விஷப் பூச்சிகளின் கொண்டாட்டம் ஒரு புறம் என்றால் வியாதிகளின் கொடுமையோ பூச்சிகள் கொடுத்த வேதனைக்கு சற்றும் சளைக்காத தன்மையுடன் இருந்தன. குட்டரோகம், க்ஷய ரோகம் என பூலோகத்தில் மக்கள் கேள்விப்பட்ட, கேள்விப்படாத அனைத்து ரோகங்களும் அவன் உடலில் நிரந்தரமாகத் தங்கி வேதனை அளிக்க ஆரம்பித்தன.
இவ்வாறு வேதனை, வேதனை ... என்பதாக மூவாயிரம் ஆண்டுகளைக் கழித்தான் அஸ்வத்தாமன். பின்னர் இறைவனின் பெருங்கருணையால் அவன் கொண்டராங்கி மலையை நெருங்க முடிந்தது. கொண்டராங்கி மலையை அடைந்த மறுகணம் எந்த விஷ பூச்சிகளும் அவனை தொந்தரவு செய்யவில்லை, மாறாக ஏற்கனவே கடித்த பூச்சிகளின் வேதனைகள் சிறிது, சிறிதாக குறைய ஆரம்பித்தன. ஸ்ரீமல்லிகார்ச்சுனேஸ்வரர் திருத்தலத்திற்கு முன் உள்ள அஸ்வத்தாமன் குகையில் தங்கி மேலும் மூவாயிரம் ஆண்டுகள் தவம் இயற்றத் தொடங்கினான் அஸ்வத்தாமன். இதில் ஆச்சரியம் அளிக்கும் மற்றோர் சம்பவமும் நிகழ்ந்தது.
அஸ்வத்தாமனின் அரிதிலும் அரிய தேனுபாலகம் என்னும் சிகை வளரத் தொடங்கியது. பேரானந்தத்துடன் தேனுபாலகம் சிகையை முடிந்து ஸ்ரீமல்லிகார்ச்சுன ஈசனை நன்றிப் பெருக்குடன் வழிபட ஆரம்பித்தான் அஸ்வத்தாமன். ஒவ்வொரு பௌர்ணமி அன்றும் இவ்வாறு மல்லிகை, கல்கண்டு, தேங்காய் பர்பி போன்ற பல பொருட்களாலும் தன் முழங்கை அளவு குறுக்களவு உள்ள கொண்டராங்கி இனிப்பு மலையை உருவாக்கி இறைவனுக்கு அர்ப்பணித்து வழிபடத் தொடங்கினான். இத்தகைய வழிபாடு மூவாயிரம் ஆண்டுகளுக்குத் தொடர்ந்தது.
அஸ்வத்தாமனின் வரலாற்றிலிருந்து நாம் அறியும் நீதி என்ன?
மனித வரலாற்றில் அஸ்வத்தாமனை விடக் கொடிய மனம் உள்ள, பழி வாங்கும் துரோகச் செயலை இயற்றிய ஒரு ஜீவனை நாம் பார்த்திருக்கவோ, கேள்விப்பட்டிருக்கவோ முடியாது. ஆனால், அத்தகைய கொடுமையான மனம் உடையவனும் திருந்தி விட்டால் அவன் எத்தனை ஆண்டுகள் ஆனாலும் இறைவனை அடைவான் என்பதில் எந்த வித சந்தேகமும் இல்லை.
உணர்ச்சியால் உச்ச கட்டம் எய்தி பாண்டவர்களைப் போல் பட்டாக்கத்தியுடன் பாய்ந்து அஸ்வத்தாமனின் தலையைக் கொய்திருந்தால் அதனால் சமுதாயத்திற்கு கிட்டும் பலன்தான் என்ன? சரியான சமயத்தில் பகவான் கிருஷ்ணர் தலை இட்டதால் ஒரு அருமையான சிரஞ்சீவியை, உத்தம வழிபாட்டு முறையை உலகம் பெற்றது. அஸ்வத்தாமன் அளவிற்கு இல்லை என்றாலும் பழி வாங்கும் உணர்ச்சியால் உந்தப்பட்டு கொடுஞ்செயல்களை இழைக்கும் மனிதர்கள் எத்தனை பேர் இந்தப் பூமியில் உலவுகின்றனர். ஏன், நம் சற்குருவின் அடியார்களில் எத்தனையோ பேர் இத்தகைய பழிவாங்கும் எண்ணத்தால் தாக்கப்படும் சந்தர்ப்பங்கள்தான் எத்தனை, எத்தனை? அனைவர்க்கும் திருந்தி வாழும் ஒரு இனிய சந்தர்ப்பத்தை நல்குவதே கொண்டராங்கி திருமலை ஆகும்.
கெட்டி மல்லி
கொண்டராங்கி திருமலை ஈசன் ஸ்ரீகெட்டி மல்லிகார்ச்சுனேஸ்வரர் என்றும் அழைக்கப்படுகிறார். கெட்டி மல்லி என்றால் என்ன ? ஆன்மீக உலகில் பக்தர்கள் மூன்று கெட்டியான பொருள்களை பெறுவது அவசியம்.
1. முதலில் பக்தர்களின் விந்து கெட்டிப்பட வேண்டும். உடல் வியாதிகளாலோ, மன வியாதிகளாலோ விந்து நீர்த்துப் போய் விட்டால் அவர்களால் நிச்சயம் இறைவனை அடைய முடியாது என்பதில் எந்த வித சந்தேகமும் வேண்டாம். எத்தனை பிறவிகள் ஆனாலும் தங்கள் விந்து கெட்டிப்படும் ஆன்மீக முயற்சிகளை, பயிற்சிகளை அவர்கள் மேற்கொண்டுதான் ஆக வேண்டும்.
2. அடுத்து, இறைவனிடம் பக்தன் கொள்ளும் உறவு கெட்டிப்பட வேண்டும். ‘உறவு கோல் நட்டு உணர்வு கயிற்றினால் முறுக வாங்கி கடைந்தால்தான்...’, இறைக் காட்சி கிட்டும். இதில் சந்தேகத்திற்கு இடமில்லை. அம்மா, நண்பன், காதலன், நம் சற்குருவைப் போல் குருவின் அடிமை என்ற ஏதாவது ஒரு உறவைக் கொண்டு இறைவனை நேசித்தால்தான் உறவு கெட்டிப்படும், இறைவனை நெருங்க முடியும்.
3. மூன்றாவதாக, இறைவனிடம் கொள்ளும் உறவு ‘கெட்டிப்படும்போது’ பக்தனின் உடலிலிருந்து மல்லிகை மணம் வீசும். இந்த மல்லிகை மணத்தில் சுமார் 6000 படித்தரங்கள் உள்ளன. இந்த மல்லிகை மணத்தின் ‘கெட்டித் தன்மை’ (concentration) யின் படித்தரத்தைக் கொண்டுதான் மகான்கள் எந்த அளவிற்கு இறை மார்கத்தில் முன்னேறி உள்ளார்கள் என்ற பக்தியின் திறம் மேலுலகில் நிர்ணயம் ஆகின்றது. என்றாலும் மிக உயர்ந்த நிலையில் உள்ள சித்த பெருமக்கள் இந்த மல்லிகையின் கெட்டித் தன்மை குறித்து விவாதிப்பதே கிடையாது.
ஸ்ரீகெட்டி மல்லிகார்ச்சுனேஸ்வரர் என்றால் திருஅண்ணாமலையில் 6000 மைல்கள் உயரத்தில் துலங்கும் எம்பெருமானின் ‘கெட்டி மல்லி’ என்ற மிக மிக அபூர்வமான சக்திகளை மக்களுக்கு அனுகிரகமாக வழங்கும் இறைப் பரம்பொருள் என்று பொருள்.

கொண்டராங்கி திருமலை
பாதாள லிங்கத்தில் தியானம் மேற்கொண்டிருந்த ரமண மகரிஷியின் உடலிலிருந்து வெளிப்பட்ட இந்த மல்லிகை மணத்தை இனங்கண்டு கொண்டதால்தான் சேஷாத்ரி சுவாமிகள் அடியார்களை அனுப்பி ரமண மகரிஷியை பாதாள லிங்கத்திலிருந்து வெளியே கொண்டு வந்து அவருடைய உடல் புண்களை எல்லாம் ஆற்றி மகரிஷியை இவ்வுலகிற்கு மீட்டுத் தந்தார் என்பது நீங்கள் அறிந்ததே.
கொண்டராங்கி திருமலையில் கண்ணுக்குத் தெரிந்த, தெரியாக பல பல தீர்த்தங்கள் இருந்தாலும் கலியுக வழிபாட்டிற்கு உகந்ததாக சித்தர்கள் இரண்டு தீர்த்தங்களை அறிவிக்கிறார்கள். கெட்டிமல்லி தீர்த்தம் என்பது ஸ்ரீமல்லிகார்ச்சுனேஸ்வரர் ஆலயத்திற்கு அருகிலேயே சுவாமிக்கு இடப்புறம் அமைந்துள்ளது. சூரிய ஒளி படா தீர்த்தம். இந்த தீர்த்தத்தை பாதுகாப்பாக பெற்று திருப்பதி லட்டு போன்ற பிரசாதங்களுடன் கலந்து பக்தர்களுக்கு அளிப்பதோ, அல்லது சர்க்கரைப் பொங்கல் பிரசாதத்தில் மேற்கண்ட தீர்த்தத்தைக் கலந்து தயார் செய்து அதை பக்தர்களுக்கு விநியோகிப்பதும் அற்புத தான முறையே. கெட்டிமல்லி தீர்த்தத்தின் ஒவ்வொரு துளியும் கங்கை தீர்த்தத்தை விடவும் பன்மடங்கு புனித சக்திகளுடன் துலங்குவதால் மிக மிக ஜாக்கிரதையாக இந்த தீர்த்தத்தைப் பயன்படுத்தும்படிக் கேட்டுக் கொள்கிறோம்.
கொண்டராங்கி மலையின் உச்சிப் பகுதி அர்ச்சுனன் வியூகம் என்று அழைக்கப்படுகிறது. சித்த நிலையில் உள்ள மகான்களால் மட்டுமே இந்த ‘வியூகத்தின்’ தெய்வீக சக்திகளை உணர்ந்து கொள்ள முடியும் என்றாலும், ஒவ்வொரு பௌர்ணமி தினத்தன்றும் திருஅண்ணாமலையில் 6000 மைல்கள் உயரத்தில் உள்ள கொண்டராங்கி தெய்வீக கிரண சக்திகள் முதலில் இந்த அர்ச்சுனன் வியூகத்தில்தான் பிரதிபலித்து சிறிது சிறிதாக கொண்டராங்கி திருமலை முழுவதும் வியாபிக்கிறது. பௌர்ணமி நாளில் அர்ச்சுனன் வியூகத்தில் அல்லது ஸ்ரீமல்லிகார்ச்சுனேஸ்வரர் ஆலயத்திற்கும் அர்ச்சுனன் வியூகத்திற்கும் இடையே உள்ள தவளைகள் நிறைந்த அர்ச்சுன சுனை தீர்த்தக் கரையில் அமர்ந்து தியானிப்பதாலோ, அல்லது ஸ்ரீமல்லிகார்ச்சுனேஸ்வரர் ஆலயம் அருகில் அமர்ந்து தியானிப்பதாலோ இந்த கொண்டராங்கி திருமலையின் தெய்வீக சக்திகளை சிறிது சிறிதாக புரிந்து கொள்ள ஏதுவாகும்.
தட்டில் நிறையும் தன சக்திகள்
நம் சற்குரு வெள்ளித் தட்டில் உணவருந்துவதை சிலர் அறிந்திருப்பர். அந்த வெள்ளித் தட்டின் நடுவில் ஒரு தங்கக் காசு பதிக்கப்பட்டிருக்கும். பொதுவாக, வெள்ளிக்கு எந்தவித தோஷமும் கிடையாது என்பதால் குடும்பத்தில் ஒருவர் உபயோகித்த தட்டுகளை, டம்ளர்களை மற்றவர்கள் பயன்படுத்துவதில் எவ்வித தவறும் கிடையாது.
பெரும்பாலான இரசாயண கலப்படங்களால் செறிந்த உணவுகள், இத்தகைய வெள்ளித் தட்டில் உணவருந்துவதால் தங்கள் எதிர்மறை சக்திகளை ஓரளவு இழக்கும் என்பதால் வெள்ளித் தட்டுகளில் உணவருந்துவது மிகவும் சிறப்புடையதாகும்.
கொண்டராங்கி திருமலையில் இத்தகைய வெள்ளித் தட்டுகளை சுவாமிக்கு நைவேத்யமாக அளித்து பின்னர் அவரவர் இல்லங்களில் இந்த வெள்ளித் தட்டுகளை பயன்படுத்துதல் சிறப்பாகும். முதலில் அர்ச்சுனன் வியூகத்தில் இந்த வெள்ளித் தட்டை வைத்து வணங்க வேண்டும். தன சக்திகள் நிறைந்த இத்தகைய வெள்ளித் தட்டுகளை ஸ்ரீமல்லிகார்ச்சுனேஸ்வரர் ஆலயத்தில் தட்டு நிறைய ஆப்பிள் பழங்களை வைத்து சுவாமிக்கு நைவேத்யம் காட்டி, இந்த பழங்களை எல்லாம் பக்தர்களுக்கு பிரசாதமாக அளித்து விட்டு இந்த வெள்ளித் தட்டை வீட்டிற்கு எடுத்து வந்து பயன்பாட்டிற்கு வைத்து கொள்தல் சிறப்பாகும்.
திருமணம், கிரகப்பிரவேசம் போன்ற வைபவங்களில் இத்தகைய வெள்ளி தங்க பிரசாதங்களை அளித்தல் என்பது அளிப்பவருக்கும் பெறுபவருக்கும் கிட்டும் ஒரு சிறந்த பாக்கியமே. இவ்வாறு வெள்ளித் தட்டுகளை அனைவரும் பயன்படுத்த இயலாது என்பதற்காகவே வெள்ளி மாங்கல்யத்தில் தங்க முலாம் பூசி அதை மாங்கல்ய தானமாக தம்பதிகளுக்கு அளித்து விடும் எளிய தான முறையை நம் சற்குரு பல முறை வலியுறுத்தி உள்ளார். எனவே, நம் சற்குருவிற்கு இணை நம் சற்குரு ஒருவரே!
மல்லிகை தூது
அன்னம், புறா, தென்றல் போன்ற பல தூதுக்களை காதலர்கள் அனுப்புவதையும், இறைவனிடம் பக்தர்கள் தூது அனுப்புவதையும் நாம் பண்டைய இலக்கியங்களில் நிறைய இரசித்துள்ளோம். இவ்வாறு தூய அன்பைப் பரிமாற அனுப்ப உதவும் உபகரணங்களில் முதன்மையானதே மல்லிகை ஆகும். தூய அன்பால் நிறைந்த வெண்ணெயால் உருவான சுயம்பு மூர்த்தியான சிக்கல் நவநீத ஈசனின் திருத்தலத்தை அலங்கரிப்பது தலவிருட்சம் மல்லிகைதானே.
இவ்வாறு தம்பதிகளிடையே தூய அன்பு நிலவ வேண்டும், அந்த தூய அன்பின் பிரதிபலிப்பாகவே பக்தி நிறைந்த சந்தானம் உருவாக வேண்டும் என்ற காரணத்திற்காகவே சாந்தி முகூர்த்த வைபவத்தை இன்றும் மக்கள் மல்லிகை பந்தல் நிறைந்த நிழற்கூடத்தில் கொண்டாடி மகிழ்கிறார்கள். எந்த இனிய உறவும் குருவின் அனுகிரகத்தால்தான் பூர்ணம் பெறும் என்பதைக் குறிப்பதற்காக மல்லிகை மலர்களிடையே சில ரோஜா இதழ்களை பரப்பி அலங்கரிப்பதும் உண்டு.

தூய அன்பிற்கு சிறந்த இலக்கணமாக விளங்குவதோடு மட்டுமல்லாது எதிர்மறை சக்திகளை ஈர்த்து பஸ்மம் செய்வதில் மல்லிகை, சம்பங்கி போன்ற வெண்ணிற மலர்கள் பெரும்பங்கு வகிக்கின்றன. இவ்வாறு மலர் மாலைகளை எல்லா சந்தர்ப்பங்களிலும் ஏற்காத நம் சற்குரு கூட சில அடியார்களின் வேண்டுகோளுக்கிணங்க மல்லிகை, முல்லை, சம்பங்கி போன்ற வெண்ணிற மலர் மாலைகள், ஆப்பிள் பழ பூச்செண்டுகளை ஏந்தி காட்சி தருவதும் உண்டு. இக்காரணம் பற்றியே புது மணத் தம்பதிகள் ஆப்பிள் பழ பூச்செண்டுடன் திகழும்படி சிபாரிசு செய்வார். ஸ்ரீபூண்டி மகான், சிங்கம்புணரி ஸ்ரீவாத்யார் ஐயா, காஞ்சி கனிந்த கனி போன்ற உத்தமர்களின் மலர்மாலை தரிசனம் சமுதாயத்தில் நிலவும் பல தீய எண்ணங்களையும், எதிர்மறை சக்திகளையும், பழிவாங்கும் பகைமை உணர்ச்சிகளைக் களையும் சக்தி பெற்றதாகும்.
அடியார்களைப் பொறுத்த வரை காட்சிக்கு அப்பாற்பட்ட இறைவனிடம் விடும் தூதாக மல்லிகை அமைகிறது என்பதால்தான் கொண்டராங்கி திருமலையில் ஈசனுக்கு முதலில் மல்லிகை மலர்களாலான மலையை தாமே உருவாக்கி அர்ப்பணிக்கும்படி நம் சற்குரு வழிகாட்டுகிறார். இந்த மல்லிகையைத் தொடர்ந்து அடுத்தடுத்த பௌர்ணமி தினங்களில் கல்கண்டு மலை, பூந்தி மலை, வெண்ணெய் மலை போன்ற பல்வேறு சுவையான மலைகளை உருவாக்கி அதன் மூலம் அடியார்கள் தங்கள் பக்தியை வெளிப்படுத்தலாம்.

சிக்கல்
சமீபத்தில் ஒரு அடியார் இறைவனின் திருவடியை அடைந்து விட்டார். அந்த அடியாரின் மரணத்திலும் தகனத்திலும் சில முரண்பாடுகள் இருந்தன. இது குறித்து நம் சற்குரு அளித்த விளக்கத்தை இங்கு அளிக்கிறோம். சுமார் 30 ஆண்டுகளுக்கு முன் பிரெஞ்சு அரசாங்கத்தில் உயர் பதவி வகித்து ஓய்வு பெற்ற ஒரு அதிகாரி நம் ஆஸ்ரமத்திற்கு சேவைக்காக வந்திருந்தார். அவரிடம் நம் சற்குரு, “சார், பொதுவாக அடியேனின் சீடர்கள் எவரும் திரும்ப பிறவி எடுப்பதில்லை (அதாவது முக்தி அடைந்து விடுவார்கள்!). நீங்கள் மட்டும் இதற்கு விதி விலக்கு. உங்களுடைய மறுபிறவியில் உங்களுக்கு ஆறு வயது நடக்கும்போது அடியேன் உங்களை ஆட்கொள்வேன்,” என்றார்.
இதிலிருந்து நாம் அறியும் விளக்கம் என்ன? நம் சற்குருவின் அடியார்களுக்கு மறுபிறவி கிடையாது, அவர்கள் இப்பிறவி நிறைவில் முக்தி அடைந்து விடுவார்கள்.
ஒரு அடியாரின் பிறவியில் பல இரகசிய முடிச்சுகள் இருந்தாலும் அவை அனைத்தையும் உரிய காலத்தில் உரிய முறையில் சரி செய்யும் சக்தி நம் சற்குருவிற்கு உண்டு. இத்தகைய பிறவி இரகசியங்கள் நிறைந்த ஒரு அடியார் இன்றும் நம் சபையில் இருக்கிறார். அவரின் ஆகாசிக் ரெகார்டிலேயே பல மாறுதல்களை ஏற்படுத்தி அவரை இன்றளவும் காத்து வருகிறார் நம் சற்குரு.
ஒரு அடியாரின் வாழ்க்கையில் எத்தகைய தவறுகள் நடந்தாலும், அவை அனைத்தையும் ஏதாவது ஒரு கால கட்டத்தில் சரிப்படுத்தி அவர் இறுதியில் இறைவனை அடையும்போது அந்த அடியாரை அப்பழுக்கற்ற தூய மல்லிகையாக மாற்றி இறைவனின் திருவடிகளில் சமர்ப்பிக்கும் அற்புத திருப்பணியை நிறைவேற்றக் கூடியவரே நம் சற்குரு. இதை நிறைவேற்ற நம் சற்குரு அனுபவிக்கும் மாளாத் துயரங்களை, மீளா வேதனைகளை அருகிலிருந்து உணரும் சந்தர்ப்பம் பெற்ற ஒரு சில அடியார்களே அறிவர். ஆரம்பத்தில் நம் சற்குருவின் வார்த்தைகளில், தான தர்மமே கலியுலகின் உண்மையான கர்ம வினைக் கழிப்பிற்கு உகந்த சாதனம் என்ற உரையில் நம்பிக்கை கொள்ளாத ஒரு மடத்தின் சன்னிதானம் இறுதியில் அந்த மடத்தின் கஜானாவே காலியாகும் அளவிற்கு அன்னதான காரியங்களை நிகழ்த்தி அவர் இறைவனுடன் கலந்த அற்புத வரலாற்றை ஒரு சில அடியார்கள் அறிவர்.
ஒரு அடியாரின் மரணத்தில் எத்தகைய முரண்பாடுகள் தோன்றினாலும், ஒரு அடியாரின் தகனத்தில் எத்தகைய முரண்பாடுகள் கொழுந்து விட்டு எரிந்தாலும், அந்த அடியார் நம் சற்குருவை நம்பி தன் வாழ்க்கையை நடத்தி வந்திருந்தால் போதும், அல்லது கடைசி நொடியில் நம் சற்குருவிடம் ஆழ்ந்த நம்பிக்கை கொண்டு அடைக்கலம் பெற்று விட்டால் கூட போதும் அந்த அடியார் முக்தி என்பதை குரு பிரசாதமாகப் பெறுவார் என்பது உறுதி. பூஜைக்காக வில்வ தளங்களை அளித்தான் ஒரு இளைஞன் என்ற ஒரே காரணத்திற்காக அவனுக்கு முக்தி வழங்கிய கனிந்த கனியின் இனிய செயலை நாம் ஏற்கனவே விளக்கியுள்ளோம். அவ்வாறிருக்க தம் அருமை சீடனுக்கு முக்திப் பரிசை நல்காமல் இருப்பாரா நம் சற்குரு?
நம் சற்குருவைப் பார்க்காத பல அடியார்களுக்கும் நம் சற்குருவின் இந்த உரை எத்தகைய ஆறுதலை அளிக்கும்?! நம் சற்குரு மீண்டும் பிறப்பெடுத்து இப்பூமியில் உலவுவதைக் கண்ணால் காணும் பாக்கியம் பெறும் அளவிற்கு அடியார்கள் உயர்ந்த நிலையை அடைய முடியாது என்றாலும் தன்னை நம்பும் உண்மையான சீடர்களை இனங் கண்டு கொண்டு அவர்களுக்கு முக்திப் பரிசை குரு பிரசாதமாக அளிக்க நம் சற்குரு காத்திருக்கையில் நமக்கு ஏன் வீண் கவலை?

கொண்டராங்கி திருமலை
இவ்வருட புத்தாண்டு தினத்தன்றோ அல்லது எந்த சந்தர்ப்பத்திலும் ஸ்ரீமல்லிகார்ச்சுனேஸ்வர ஈசனை வழிபடும்போது கெட்டிமல்லி தீர்த்தத்தால் அபிஷேகம் நிறைவேற்றுவது சிறப்பாகும். இந்த தீர்த்தத்தில் ஒரு குட தீர்த்தத்திற்கு இரண்டு மூடி Kachi kalli என்ற மல்லிகை நறுமணத்தையும், ஒரு மூடி Rose SP என்ற நறுமணத்தையும் கலந்து அபிஷேகம் நிறைவேற்றுவது சிறப்பாகும். நம் சற்குரு திருக்கோயில்களில் உழவாரப் பணிகள் நிறைவேற்றும்போதெல்லாம் திருப்பணி நிறைவில் ஒரு குடம் திருக்குள தீர்த்தத்தில் கங்கை, காவிரி போன்ற நதி தீர்த்தங்களை கலந்து, அத்துடன் நறுமணத்தையும் கலந்து இறை மூர்த்திகளுக்கு அபிஷேகம் நிறைவேற்றுவார்.
அபிஷேகத்திற்குப் பின் நறுமணம் கலந்த சாம்பிராணி, சந்தனத்தூள் கொண்டு தூபம் எழுப்பி திருக்கோயில் அனைத்திலும் கெட்டியாக சாம்பிராணிப் புகையால் நிறைப்பார். பல திருத்தலங்களிலும் 1000 வாட்ஸ் மின் பல்புகள் பிரகாசித்தாலும் நம் சற்குரு எழுப்பும் நறுமணப் புகையில் அந்த விளக்குகளின் பிரகாசமே தெரியாது என்றால் அந்த தூபம் எத்தகைய ‘கெட்டியாக’ திகழும் என்பதை ஊகித்துக் கொள்ளுங்கள்.
எனவே கெட்டி மல்லி ஈசனுக்கும் இவ்வாறு அடர்த்தியான சாம்பிராணி புகை இட்டு வணங்குவது மிகச் சிறப்பாகும். ஸ்ரீமல்லிகார்ச்சுனேஸ்வரர் ஆலயம், உச்சியில் அர்ச்சுன வியூகம் போன்ற இடங்களில் நறுமண அபிஷேகத்தையும், இத்துடன் அஸ்வத்தாமன் தவ பீடத்தில் கெட்டியாக சாம்பிராணி புகை போடுதல் மிகச் சிறந்த வழிபாடாகும். நறுமண அபிஷேகம் நமக்கும் ஈசனுக்கும் உள்ள பிணைப்பை மேம்படுத்தும் என்பதும், சாம்பிராணி தூப வழிபாடு இறைவனின் அனுகிரகத்தை, அரிதிலும் அரிதான தூய கொண்டராங்கி சக்திகளை இந்த பிரபஞ்சம் முழுவதும் வர்ஷிக்கும் என்பதே இந்த தலத்தில் பொலியும் தூய சக்திகளின் மகிமையாகும்.
இத்தகைய அபிஷேக ஆராதனைகளுக்குப் பின் அஸ்வத்தாமன் தவ பீடத்தில் இயன்ற அளவு நேரம் அமர்ந்து தியானம் இயற்றுதலும், அவரவர் தங்கள் இல்லம் திரும்பியவுடன் தங்கள் இல்லத்திலோ அல்லது திருத்தலங்களிலோ இத்தகைய தியானத்தை தொடர்வதும் சிறப்பாகும். தியானத்திற்கு முன்னும் பின்னும் இங்கு அளித்துள்ள இசையைக் கேட்பதால் சிறந்த மனத் தெளிவைப் பெறுவர். விஷக் கடிகள், உடலில் தோன்றும் ஊறல், நமைச்சல் போன்ற தோல் நோய்களைத் தீர்க்கும் வல்லமை இந்த இசையின் மகத்துவங்களில் ஒன்றாகும்.
காலடியில் அரையடி
ஒவ்வொரு திருத்தல படிக்கட்டுகளுக்கும் ஒரு சிறப்பான மகிமை உண்டு. படியாய்க் கிடந்து நின் பவள வாய் காண்பேனா என்று ஆழ்வார்கள் எல்லாம் தவம் கிடப்பதே திருமலை படிக்கட்டுகள். அதே போல் ஸ்ரீஅகஸ்தியர் உட்பட அனைத்து மகரிஷிகளும், மகான்களும், யோகிகளும் அடுத்தடுத்த தினங்களில் இந்த பிரபஞ்சத்தில் நடைபெற வேண்டிய நிகழ்ச்சிகள் பற்றி விவாதிப்பதே ஐயர் மலை திருத்தலமாகும். மாலை நேரத்தில் பக்தர்கள் நடமாட்டம் குறையும்போது இத்தல படிக்கட்டுகளில் ஸ்ரீஅகஸ்தியர் உட்பட பல மகரிஷிகள் தத்தம் சுயம் உருவங்களில் தோன்றி உலக விஷயங்களை விவாதிப்பார்களாம்.

ஐயர்மலை
உதாரணமாக, ஒரு ரோஜா செடியிலிருந்து ஒரு ரோஜா மலர் தரையில் விழுவதாக வைத்துக் கொண்டால் அந்த மலர் எத்தனை நாட்கள் செடியில் இருக்க வேண்டும், எந்த நேரத்தில் செடியிலிருந்து பிரிந்து தரையில் விழ வேண்டும், அவ்வாறு கீழே விழும்போது அந்த ரோஜா மலர் எத்தனை இதழ்களாகப் பிரிய வேண்டும், பிரிந்த இதல்களில் ஒவ்வொன்றும் எங்கே, செடியிலிருந்து எவ்வளவு தூரம் தள்ளி விழ வேண்டும், அவ்வாறு விழும் இதழ்களில் எத்தனை இதழ்கள் அங்கேயே கிடக்க வேண்டும், எத்தனை இதழ்கள் மனிதர்கள் காலால், விலங்கினங்களால் மிதிபட வேண்டும், எத்தனை இதழ்கள் வாயு பகவானால் மீண்டும் அங்கிருந்து எடுத்துச் செல்லப்பட வேண்டும் என்றெல்லாம் கணக்கை நிர்ணயிப்பவர்கள் சித்தர்கள், மகான்களே.
பஞ்ச பூதங்களும் நாம் நினைப்பது போல் சுதந்தரமாகச் செயல்படுவதில்லை. பஞ்சபூத தேவதைகளும் சித்தர்களின் ஆளுகைக்கு உட்பட்டவையே. இதைத்தான் அவனன்றி ஓர் அணுவும் அசையாது என்று நம் முன்னோர்கள் சாதாரணமாகக் குறிப்பிட்டார்கள்.
இவ்வாறு கொண்டராங்கி திருமலைப் படிக்கட்டுகளின் மகிமையையே காலடியில் அரையடி என்று சித்தர்களின் பரிபாஷையாகக் குறிப்பிடுகிறார்கள். கொண்டராங்கி திருமலையின் உயரம் முதலில் ஆறாயிரம் மைல்கள் உடையதாக வானளாவ நின்றது. அக்காலத்தில் கந்தர்வர்கள், தேவர்கள், பாரிகாலம் என்ற வானில் சஞ்சரிக்கும் சக்தி பெற்ற தேவதைகள் மட்டுமே கொண்டராங்கி ஈசனை வழிபட்டு வந்தனர். இந்த தேவதைகள் எல்லாம் தங்கள் வழிபாட்டுப் பலன்களை எல்லாம் சதாஸ்து தேவதைகளிடம் அர்ப்பணிக்க இந்த அனுகிரக சக்திகளை சேஷாத்ரி சுவாமிகள் போன்ற சக்தி பெற்ற மகான்கள் இந்த தேவதைகளின் அருட்கடாட்சம் மூலம் மக்களுக்கு அர்ப்பணித்து வந்தனர்.
அர்ச்சுனன் தன் தவ வலிமையால் கிருஷ்ண பகவானைத் தொடர்ந்து பிரார்த்திக்க கொண்டராங்கி மலையின் உயரம் 6000 மைல்கள் உயரத்திலிருந்து வெகுவாகக் குறைந்து, வெறும் 6000 படிக்கட்டுகள் கொண்ட மலையாக அமைந்தது. பின்னர் அஸ்வத்தாமனின் அருந்தவப் பிரார்த்தனைக்கு மகிழ்ந்து இறைவன் ஸ்ரீமல்லிகார்ச்சுனேஸ்வரர் தற்போது உள்ள 3000 படிக்கட்டுகள் மட்டுமே கொண்ட மலையாக பக்தர்களுக்கு காட்சி அளிக்கிறார்.

‘அரை மாத்திரையில் அடங்கும் அடி...’, என்று அப்பர் பெருமான் இறைவனின் திருவடி மகிமையை புகழ்ந்து பாடுகிறார். இங்கு ‘அரை’ என்பது கால அளவா, தேச அளவா, அல்லது இரண்டும் கலந்த தெய்வீக அளவா என்பதை அறிய விழைவோர், கொண்டராங்கி திருமலைப் படிக்கட்டுகளில் தொடர்ந்து வழிபாடு இயற்றுவதன் மூலம் மட்டுமே அறிந்து கொள்ள முடியும் என்பதே கொண்டராங்கி திருமலையின் காலடியில் அரையடி படிக்கட்டுகள் சுட்டிக் காட்டும் மகிமையாகும்.
இவ்வாறு காலடியில் அரையடி நல்கும் சக்திகளை பிராணாயாமம் மூலம் பெறும் முறையையும் கற்பிக்கிறார் நம் சற்குரு. இதன்படி கிழக்கு அல்லது வடக்கு நோக்கி ஒரு கெட்டியான போர்வையில் அல்லது துணியில் பத்மாசனம் அல்லது அர்த்த பத்மாசனம் இட்டு அமர்ந்து கொள்ளவும். முதலில் வலது மூக்கின் வழியே சிறிது சிறிதாக மூச்சை உள்ளே இழுக்கவும். பெண்களாயின் மூச்சை முதலில் இடது மூக்கின் வழியாக உள்ளே இழுக்கவும். போதுமான அளவு மூச்சுக் காற்றை இழுத்த பின் அந்த மூச்சுக் காற்றில் பாதியை விழுங்கி விடவும், மீதியை வெளியே அனுப்பி விடவும். அடுத்து இடது மூக்கின் வழியாக மூச்சை உள்ளே இழுக்கவும், போதுமான அளவு காற்றை இழுத்த பின், இழுத்த காற்றில் பாதியை விழுங்கி விடவும், மீதி காற்றை வெளியே விட்டு விடவும். இது ஒரு சுற்று பிராணாயாம முறையாகும்.
இவ்வாறு குறைந்தது 51 சுற்றுகள் பிராணாயாமத்தை நிறைவேற்றுதல் சிறப்பாகும். இதனால் பரவெளியில் பதிந்துள்ள கெட்ட எண்ணங்கள், பழி வாங்கும் பகைமை உணர்வுகள் சிறிது சிறிதாக நம்மை அடைவது குறையும். இதன் பின்னரே வெளி எண்ணங்களால் நம் ஒளி வட்டம் (aura) மாசு அடைவதை உணர்ந்து அதை நாம் தூய்மையாக்க முடியும். இதன் அடுத்த கட்டமாக, நம் உள்ளே தோன்றும் தீய எண்ணங்களையும், மாசு படிந்த தீய உணர்வுகளையும் இனம் கண்டு கொண்டு அவற்றைத் தூய்மை செய்ய இயலும்.
இத்தகைய தூய்மையான ஒளி வட்டம் உடையவர்களே நுண்ணிழைப் பயணம் என்ற ஆஸ்ட்ரல் பயணத்திற்கு தகுதி உடையவர்கள் ஆகிறார்கள். அவர்களுக்கு, அவர்கள் சஞ்சாரத்திற்கு எந்த லோகத்திலும் எந்தவித தடங்கல்களும் முளைப்பதில்லை. இத்தகைய தகுதியை வெகுவிரையில் நாம் பெறக் கூடிய ஒரே திருத்தலம் கொண்டராங்கி திருமலை என்பதே இதன் சிறப்பாகும்.

திருநல்லூர்
இந்த நிலைக்கு ஒருவர் உயர்ந்து விட்டால் என்றால் அவர் இறை தரிசனத்தைப் பெறும் தூரம் வெகு தொலைவில் இல்லை என்பதை அறிந்து கொள்ளலாம். அவரவர் இல்லங்களில், திருத்தலங்களில் இந்த பிராணாயாம முறையை மேற்கொள்ளலாம் என்றாலும் கொண்டராங்கி மலையின் சிறப்பம்சமாக பல மாதங்கள் கிட்டும் உடல், மன உள்ளத் தூய்மையை ஒரு சில நாட்கள் பயிற்சியிலேயே பெற்று விடலாம் என்பதே. இந்த பிராணாயாம பயிற்சியை அர்ச்சுன வியூகத்தில் நிறைவேற்றி, தங்கள் சொந்த ஊரில் தொடர்வது என்பது அனைத்து அடியார்களும் நிறைவேற்றக் கூடிய ஒரு பிராணாயாம முறையே.
இவ்வாறு 3000 காலடிகள் உயரத்தில் அமையும் அர்ச்சுன வியூகத்தில் அமையும் ஒரு வழிபாட்டின் மூலம் 6000 மைல் உயரத்தில் திருஅண்ணாமலையில் நிலவும் கொண்டராங்கி சக்திகளை மக்களுக்கு ஒரு சாதாரண வழிபாட்டின் மூலம் பெற்றுத் தருபவர் மட்டும் அல்ல நம் சற்குரு. பக்தர்கள் கால் இடரி அதள பாதாளத்தில் விழுந்து விடாமல் தக்க தருணத்தில் கை கொடுத்து நம்மை காப்பாற்றுவதும் சற்குருவின் கருணையே!
எப்படி ?
சமீபத்தில் இறைவனடி சேர்ந்த ஒரு அடியாருக்கு ஒரு மகரிஷியின் பட்டத்தைத் தேர்ந்தெடுத்து அளிப்பதாக சில அடியார்கள் ஒன்று சேர்ந்து இந்த ‘பட்டத்தை’ அளிப்பதற்காக மற்றோர் அடியாரிடம் இந்த நிகழ்ச்சியை நடத்தித் தருமாறு கேட்டுக் கொண்டனர். இது ஒரு சீடரைக் கௌரவிக்கும் நல்ல எண்ணம் என்றாலும் இது சரியான எண்ணமா? இது சம்பந்தமாக நம் சற்குரு அளிக்கும் வழிகாட்டுதலை இங்கு அளிக்கிறோம்.
நம் சற்குரு பூமியில் 51 பிறவிகள் எடுத்துள்ளார். இவ்வாறு 51 மனிதப் பிறவிகள் எடுத்து பூமியில் மனிதனாக வாழ்ந்த காலம், அவை ராமானுஜரைப் போல் பூரண மனித ஆயுளுடன் திகழ்ந்தாலும், 6120 வருடங்களுக்கு மிகைப்படாது. திருஅண்ணாமலை சிவசக்தி ஐக்ய தரிசனத்தின் எதிரே அமைந்துள்ள ஜீவ சமாதியே நம் சற்குருவின் 51வது ஜீவ சமாதியாகும். தஞ்சாவூர் பகுதியை ஆண்ட மன்னன் மாறன்பெருந்துறையான், ராஜராஜ சோழன் தாயாரின் மெய்க்காப்பாளனாக அமைந்த பிறவி, கேப்டன் கந்தர்வாவாக இந்திய இராணுவத்தில் பணியாற்றிய காலம் இவை அனைத்தின் இறுதியிலும் ஒவ்வொரு ஜீவ சமாதி உருவாகி பூமியை நிறைத்தது என்பதை நாம் மறுக்க முடியாது.

நம் சற்குருவைப் போன்ற சித்தர், சித்தராகத் தோன்றி இருந்தாலும், அல்லது 63 நாயன்மார்களைப் போல் மனிதனாகத் தோன்றி இறை தரிசனம் பெறுமளவிற்கு உயர்ந்திருந்தாலும் அவர்கள் ஆயுட்காலம் கோடானு கோடி ஆண்டுகளுக்கு பரவி விரிந்திருக்கும் என்பது திண்ணம். அப்படியானால் இந்த கோடிக் கணக்கான ஆண்டுகளில் நம் சற்குரு எடுத்த சித்த பிறவிகள், மகானாய்த் தோன்றி அருள் பொழிந்த காலம், யோகியாய்த் துலங்கி கர்மத்தைக் களைந்த ஆண்டுகள் எத்தனை எத்தனை என்று எப்படிக் கூற இயலும்?

இதுவே நம் சற்குரு வெளியிடும் அரிதிலும் அரிய சித்த இரகசியம். ஸ்ரீஅகஸ்திய விஜயத்தில் வெளியிடப்பட்டுள்ள நிலாபுரந்தர வாசுமாமுனி, பட்டாம்பூச்சி சிறகடி சித்தர், கஜதூளி பாத சித்தர் போன்ற எண்ணற்ற அரிய சித்தர்களைப் பற்றி நாம் கேள்விப்பட்டிருக்கவே முடியாது. காரணம் என்ன? இவை அனைத்தும் நம் சற்குரு முந்தைய பிறவிகளில் பூமியில் எடுத்த அவதாரங்களே ! அப்படியானால், ஒரு சீடருக்கு ஒரு மகரிஷியின் நாமத்தை அளிக்க முயலும்போது, அந்தச் சீடருக்கு நாம் நம் சற்குருவின் நாமத்தை அளிக்க அல்லவா முற்படுகிறோம்?! அதனால், நாம் சற்குருவின் சீடரைப் பற்றியும் அறிந்து கொள்ளவில்லை, சற்குருவைப் பற்றி துளியும் புரிந்து கொள்ளவில்லை என்றுதானே அர்த்தமாகிறது...?
“குரு குருதான், சீடன் சீடன்தான்...”, என்பார் நம் சற்குரு. விவேகானந்தரும், “ஆயிரமாயிரம் விவேகானந்தர்கள் வந்தாலும் எம் சற்குருவான ராமகிருஷ்ண பரமஹம்சர் பாத தூளியின் ஒரு கோடியில் ஒரு அணுத் துகளுக்கு நிகராக முடியாது...,” என்று பணிவுடன் கூறுவார். இதுவே உண்மையான சீடனின் மாண்பு.
ஒரு முறை சற்குருவுடன் வடஇந்திய யாத்திரை சென்றபோது கேதார்நாத் திருத்தலத்திற்கு செல்லும் வாய்ப்பு கிடைத்தது, அவ்வாறு அடியார்கள் மிகவும் சிரமத்துடன் ஸ்ரீகேதார ஈசனை வணங்கித் திரும்பியவுடன் பலருக்கும் இவ்வளவு சிரமப்பட்டு, உயிரையே பணயம் வைத்து, ஒரு யாத்திரையை அடியார்கள் மேற்கொண்டால் அவர்களுக்கு ஈசன் அளிக்கும் அனுகிரகம் யாதோ என்று நம் சற்குருவைக் கேட்டனர். நம் சற்குருவோ வழக்கமான புன்னகை உதட்டில் தவழ, “உங்களை எல்லாம் பாதுகாப்பாக ஈசன் திரும்ப உங்கள் ஊருக்கு கொண்டு போய்ச் சேர்க்கிறான் அல்லவா, அதுதான் நீங்கள் கேதார்நாத் யாத்திரையில் பெறும் பலன்...”, என்று கூறினார்.
அப்போது பல அடியார்களால் இந்த பதிலில் பொதிந்திருந்த இறை கருணையை, சற்குருவின் வழிகாட்டுதலை புரிந்து கொள்ள முடியவில்லை என்பது உண்மைதான். ஆனால், பல்லாண்டுகள் கழித்து இன்று ஓரளவு தெளிந்த அறிவை குரு அருளால் பெற்ற அடியார்கள் கொண்டராங்கி திருமலைக்கு ஒரு அடியார் சென்று சிரமமில்லாது திரும்பி வருகிறார் என்றால் அது ஈசனின் பெருங்கருணையால்தான், தொடர்ந்து வரும் நம் சற்குருவின் வழிகாட்டுதலால்தான் என்ற பேருண்மையை உணர்ந்து கொள்ள வழிவகுக்கிறது. அதள பாதாளத்தில் சீடன் விழுந்து விடாமல் என்றும் அவனைக் காப்பது சற்குருவின் வலிமை மிகுந்த கரங்களே என்று உணர்த்துவதே கொண்டராங்கி வழிபாடாகும்.
கொண்டராங்கி சிறுமலையில் விளக்கேற்றி தொடர்ந்து இந்த ஒளிப் பிரகாசத்தை தரிசனம் செய்து வணங்கி வந்தால் நம் உள்ளத்தில் ஒளிரும் சற்குருவின் பேரொளியை என்றாவது ஒரு நாள் நாம் தரிசித்து எல்லையில்லா ஆனந்தத்தை அடைய முடியும்.

சதுரகிரி
ஒரு முறை ஒரு அடியாரின் திருமணத்திற்காக மதுரை சென்றிருந்தபோது அங்குள்ள சதுரகிரி மலையை தரிசனம் செய்து வருவதற்காக சில அடியார்கள் சேர்ந்த குழு ஒன்று புறப்பட்டது. அவர்கள் புறப்படும்போது மதிய நேரம் கடந்து விட்டதால் அவர்கள் சதுரகிரி மலையில் இறைவனை தரிசனம் செய்து திரும்புவதற்குள் நன்றாக இருட்டி விட்டது. ஒரு சிலர் வைத்திருந்த டார்ச் உதவியால்தான் அவர்கள் அடுத்த காலடியையே வைக்கும் அளவிற்கு அந்த மலைப்பகுதி இருட்டாக இருந்தது.
ஒருவர் கையை ஒருவர் பிடித்துக் கொண்டு சில ஓடைகளை அவர்கள் கடக்கும்படியும் ஆகி விட்டது. ஆனால், அவர்கள் புறப்பட்டது முதல் அடிவாரத்தை அடையும் வரை எட்டு பைரவ மூர்த்திகள் நாய் வடிவில் அவர்களைத் தொடர்ந்து வந்து கொண்டே இருந்தனர். அடிவாரம் வந்த பின் அந்த பைரவ மூர்த்திகள் எங்கோ சென்று மறைந்து விட்டனர். இது பற்றி நம் சற்குருவிடம் கேட்டபோது தமக்கே உரிய பாணியில் சிறுநகையுடன், “அவர்கள் வேறு யாரும் அல்ல, பைரவ மூர்த்திகள்தான் உங்களுக்கு வழி காட்டியது... அஷ்ட பைரவ மூர்த்திகளையே தரிசிக்கும் பேறு உங்களுக்குக் கிட்டி விட்டது என்றால் நீங்கள் இப்பிறவியில் இனி சாதிக்க வேண்டியது என்ன? பெற வேண்டிய இறை அனுகிரகம் தான் என்ன?” என்றார்.
இதைக் கேட்ட அடியார்கள் எல்லாம், அதிலும் சதுரகிரிக்குச் சென்ற அடியார்கள், பிரமிப்பின் எல்லைக்கே சென்று விட்டார்கள்.
சற்குரு தொடர்ந்தார், “அதனால் இந்த அடியார்கள் எவரும் இனி சதுரகிரி மலைக்குச் செல்ல வேண்டிய அவசியம் இல்லை...”, என்றார். அஷ்ட பைரவ மூர்த்திகளை இனங் கண்டு கொண்டு அவர்களைப் புகழ்கிறார் என்றால் நம் சற்குரு சாட்சாத் சிவபெருமானைத் தவிர வேறு யாராக இருக்க முடியும்?
இதோ என்றோ நடந்த குருவின் அடிமைகள் கண்ட ஆனந்த அற்புதம் கிடையாது. இன்றும் நம் அடியார்கள் கொண்டராங்கி திருமலைக்குச் சென்றபோது அவர்களை வழிநடத்திச் சென்றன மூன்று நாய்கள் என்றால் குருவின் கருணைக்கு எல்லைதான் ஏது, அண்ணாரின் அனுகிரகத்திற்கு ஈடு இணைதான் கூற முடியுமா?

கொண்டராங்கி சிறுமலையை அமைக்கும் விதத்தை இங்குள்ள வீடியோவில் காணலாம். மாதிரிக்காக இங்கு மல்லிகை மலர்ச்சரங்கள் சற்றே இடைவெளி விட்டு அமைத்திருந்தாலும் மலர்ச் சரங்களை எவ்வளவுக்கெவ்வளவு இடைவெளி இன்றி கெட்டியாக அமைக்கிறோமோ அந்த அளவிற்கு சிறுமலையின் உள்ளே அமையும் ‘வெற்றிடம்’ சக்தி உள்ளதாக அமையும். அதேபோல இந்த லிங்கத்தின் பட்டைகளை 8, 12, 16 என்ற விதத்திலும் அமைத்துக் கொள்ளலாம். குரு மங்கள கந்தர்வ அம்சங்களை குறிப்பதாக மல்லிகை, செவ்வந்தி, விருட்சிப்பூ என்ற மூன்று வாசமுள்ள மலர்கள் இங்கு அலங்காரத்திற்காக பயன்பட்டாலும் மல்லிகையுடன் அவரவர் வசதி, வாய்ப்புக்கேற்ற விதத்தில் மற்ற வாசமுள்ள மலர்களைப் பயன்படுத்துவதும் தவறு கிடையாது.
அவரவர் இல்லங்களில் அமைக்கும் சிறுமலையை மட்டும் இவ்வாறு திருஅண்ணாமலையாரின் சித்திரத்தின் கீழ் அமைத்துக் கொள்தல் சிறப்பு. திருத்தலங்களில், கொண்டராங்கி மலைத் தலத்தில் இந்த மலர்க் கூண்டுகளை அமைக்கும்போது அந்த இறை மூர்த்திகளே கொண்டராங்கி சக்திகளை வர்ஷிக்கும் சக்தி பெற்றுள்ளதால் அங்கு இது பற்றி கவலை கொள்ள வேண்டாம்.
ஒரு முறை கும்பகோண மகாமக வைபவத்தின்போது நம் சற்குரு கும்பகோணத்தில் ஒரு வார காலத்திற்கு அன்னதான கைங்கர்யங்களை நிகழ்த்தினார். அன்னதானம் எல்லாம் நிறைவேறிய பின் மகாமக தீர்த்தத்தை நம் சற்குருவே அடியார்கள் தலையில் எல்லாம் ஒரு கமண்டலம் மூலம் வட்ட வடிவில் ஊற்றி அனுகிரகத்தை அள்ளி வழங்கினார். இந்த குரு அனுகிரகம் சாதிக்கும் பல சாதனைகளில் ஒன்றே அடியார்களின் திருவாசி பெருகுவதாகும்.

திருச்சி அருகே உள்ள திருவாசி திருத்தலத்தைப் பற்றி நாம் அறிவோம். மக்கள் சூட்சும சரீரத்தைச் சுற்றி உள்ள திருவாசியைப் பெருக்குவதே ஒவ்வொரு இறை அடியாரின் கடமை ஆகும். இந்த திருவாசி என்னும் ஒளிவட்டம் எந்த அளவிற்கு பெருகி உள்ளது என்பது அவர்களின் சிற்றறிவிற்கு எட்டாது எனினும் சற்குருவின் மேல் உள்ள ஆழ்ந்த நம்பிக்கையைப் பொறுத்து அவர்கள் நிறைவேற்றும் நற்காரியங்கள் மூலம் மட்டுமே இந்த திருவாசியின் ஒளி வட்டம் பெருகும். இந்த அற்புதத்தை தொட்டுக் காட்டிய வித்தையாக தம் அடியார்கள் அனைவருக்கும் வழங்கியவரே நம் சற்குரு.
சற்குருவைக் காணாத தற்போது உள்ள அடியார்கள் என் செய்வது? அவர்களுக்கும் அருள் புரிவதே கொண்டராங்கி மலையில் நாம் இயற்றும் வழிபாடுகளாகும். கொண்டராங்கி சிறுமலையில் நாம் உச்சியில் சுற்றும் மஞ்சள் நிற செவ்வந்திப் பூக்களே சற்குருவின் அனுகிரகத்தை திருவாசி அனுகிரமாக அடியார்களுக்கு வழங்கும் என்பதே சற்குரு சுட்டிக் காட்டும் ஆன்மீக இரகசியமாகும். இந்த அனுகிரகத்தை அதிக அளவில் பெறுவதற்காகவே கொண்டராங்கி சிறுமலையைச் சுற்றி எவ்வளவுக்கு எவ்வளவு மல்லிகைச் சரங்களை நெருக்கமாகச் சுற்ற முடியுமோ அந்த அளவிற்கு நெருக்கமாகச் சுற்றி உள்ளே அமையும் ‘வெற்றிடத்தின்’ சக்திகளைப் பெருக்குமாறு வலியுறுத்துகிறோம்.
இதில் மற்றோர் அம்சம் என்னவென்றால் விட்டில் பூச்சியைப் பற்றிக் கேள்விப்பட்டு இருப்பீர்கள். சற்று காலம் முன் வரை மழை காலத்தில் அதிக அளவில் தோன்றிய விட்டிப் பூச்சிகள் தற்போது பெருமளவு குறைந்து விட்டன. சரி, விட்டது தொல்லை ... என்று பலர் நினைக்கலாம்.
எப்போது?
விட்டில் பூச்சிகளின் சேவையைப் பற்றி நாம் அறியாதபோது ...
விட்டில் பூச்சிகள் ஒரு விளக்கைச் சுற்றி 30 டிகிரி கோண அளவில் சுற்றி வருகின்றன. மேலும் அவை தீபத்தை நெருங்கும் விதமும் குருவிற்கு உரித்தான பொன் விகிதத்தில் (golden ratio) அமையும். இதனால் பெருகும் நற்சக்திகளின் விளைவால் தொற்றுநோய்களின் பாதிப்பு பெருமளவில் குறையும். விட்டில் பூச்சிகளின் நடமாட்டம் தற்போது குறைந்து விட்டதால் தொற்றுநோய்களின் தாக்கமும் அதிகரித்துள்ளதை நீங்கள் உணர்வீர்கள். அதே போல் கழுகுகள், கருடன்கள் போன்ற பறவைகளும் தங்கள் இரையை நெருங்கும்போது பொன் விகிதத்தில்தான் பறக்கின்றன என்பதே நம்மை பிரமிக்க வைக்கும் ஆன்மீக விந்தையாகும்.
கொண்டராங்கி சிறுமலையை வழிபாட்டிற்காக பயன்படுத்திய பின் அந்த கூண்டில் வண்ண வண்ண விளக்குகளை ஏற்றி வைத்து தங்கள் வீட்டின் முன் தொங்க விட வேண்டும் என்று சிபாரிசு செய்வது இவ்வாறு சமுதாயத்தில் தோன்றும் தொற்றுநோய்களின் பரவலைத் தடுத்து நிறுத்துவதற்காகவும் என்பது இப்போது புரிகின்றது அல்லவா?
கொண்டராங்கி குருவர்ஷம்
திருத்தலங்களில் பரிவட்டம் சார்த்துவதை நீங்கள் அறிந்திருப்பீர்கள். பங்குனி உத்திரம், திருவாதிரை, கும்பாபிஷேகம் போன்ற திருவிழாக்களின் போது அந்த உற்சவங்களுக்கு பொருளுதவி அளித்து அல்லது பலவகைகளில் உதவி புரிந்த பெரியோர்களுக்கு, கனவான்களுக்கு திருக்கோயில் சார்பாக அளிக்கப்படும் மரியாதையே பரிவட்டம் சார்த்துதல் என்பதாகும்.

போக்க சங்கிலி, எங்களுக்கு என்ன என்று
அர்ச்சுன வியூகத்தில் இளைப்பாறும்
பைரவ மூர்த்தி
குரு வருடமான 1992ம் ஆண்டு நம் சற்குரு திருத்தவத்துறை லால்குடியில் உழவாரப் பணிகள் நிறைவேற்றியபோது சற்குருவிற்கு கோயில் சார்பாக பரிவட்டம் சார்த்தி மரியாதை வழங்கப்பட்டது. அப்போது திரண்ட சக்திகளை எல்லாம் ஸ்ரீஸ்ரீமதி அம்மன் திருத்தலத்தில் பெற்று அதை லட்சுமி கடாட்ச சக்திகளாக இந்த பூவுலகு அனைத்திற்கும் அருளியவரே நம் சற்குரு. அற்புதமான இந்த நிகழ்ச்சியை தரிசிக்கும் வாய்ப்பு பெற்ற பலர் இப்போது இருந்தாலும் அந்த அரிய வாய்ப்பை தவற விட்டவர்களுக்கும் துணைபுரிவதே இந்த சோபகிருது வருடத்தில் நாம் கொண்டராங்கி திருமலையில் நிகழ்த்தும் வழிபாடுகளாகும்.
சோபகிருது ஆண்டில் மேக கந்தர்வர்கள் என்ற அரிய கந்தர்வர்கள் நம் சற்குருவிற்கு குருமங்களகந்தர்வ லோகத்தில் அளிக்கும் இந்த அற்புத மரியாதையை நாம் தரிசிக்கும் தகுதி பெறா விட்டாலும், இந்த சோபகிருது வருடம் முழுவதும் இந்த வழிபாட்டில் திகழும் லட்சுமி கடாட்ச சக்திகளை குறித்த வழிபாடுகளின் மூலம் பெறலாம் என்பதே இந்த சித்த மரியாதையின் பின்னணியில் அமைந்த இரகசியமாகும்.
நம் சற்குருவிற்கு பூலோகத்தில் அமைந்த 51 ஜீவ சமாதிகளையும் நாம் தரிசிப்பது என்பது சற்றும் இயலாத காரியம். இந்த ஜீவ சமாதிகளின் இருப்பிடத்தையே நாம் தெரிந்து கொள்ள முடியாதபோது அவைகளைத் தரிசிப்பது என்ற பேச்சிற்கே இடமில்லை அல்லவா? ஆனாலும் இந்த ஜீவ சமாதிகளில் நாம் வழிபட்ட பலன்களை குருவர்ஷமாக இந்த சோபகிருது வருடத்தில் அளிப்பதே நம் சற்குருவின் பெருங்கருணை மழையாகும்.
இந்த கருணை மழையில் நனைய விரும்புவோர் இந்த சோபகிருது வருடம் முழுவதும் அர்ச்சுன வியூகம் என்னும் மலை உச்சியில் அட்ட நமஸ்காரம் என்ற நமஸ்கார பத்ததியை மூன்று முறை நிகழ்த்தி வழிபடுவதாகும். 3 x 8 = 24 = 6, 51 = 5+1 = 6 என்பதே நம்மை பிரமிக்க வைக்கும் எண் கணித சூத்திர இரகசியமாகும். கிழக்கு, தெற்கு, மேற்கு, வடக்கு, தென் கிழக்கு, தென் மேற்கு, வட மேற்கு, வட கிழக்கு என்ற திசைகளை நோக்கி சாஷ்டாங்கமாகவோ, அல்லது ஸ்வஸ்தி நமஸ்கார பத்ததியிலோ வணங்கி பயன்பெறலாம்.
பல வருடங்களுக்கு முன்னர் கணவன் மனைவி ஒற்றுமையை வளர்க்கும் ஒரு தியான முறையை நம் சற்குரு அளித்திருந்தார். அதை திருமணம் ஆகாதவர்களும், கணவன் அல்லது மனைவியை இழந்தவர்களும் எப்படி பயன்படுத்துவது என்ற ஒரு சில அடியார்களின் கோரிக்கையை கருத்தில் கொண்டு தர்ப்பாசயன தியான முறை என்பதாக அளித்துள்ளார். இம்முறையை கைக்கொள்ள விரும்பும் திருமணம் ஆகாத அடியார்களும் மற்றவர்களும் கொண்டராங்கி திருமலையில் அர்ச்சுன வியூகத்தை மேற்குறித்த முறையில் தரிசனம் செய்து தங்கள் இல்லங்களில் நம் சற்குரு அருளிய அப்தோர்யாம தியான முத்திரையை தொடர்ந்து பழகி வந்தால் அவர்கள் நல்ல முன்னேற்றம் காண்பார்கள்.
இவ்வாறு தம்பதிகள் இருவர் நிறைவேற்றக் கூடிய ஒரு தியான முறையை ஒருவர் மட்டுமே பயன்படுத்தி அருள்பெறும் முறையை நமக்கு அளித்த நம் சற்குரு தன்னுடைய எத்தனை வருட புண்ணிய சக்திகளை தாரை வார்த்து இறைவனுக்கு அளித்தார் என்பது அந்த அண்ணாமலையாருக்கே வெளிச்சம் !
எண்சீர் கெடிலம் நெடிலம்
திருப்பதி திருமலையில் ஸ்ரீவெங்கடாஜலபதி பெருமாள் அருளும் அனுகிரகமே ஏழுமலையான் எண்சீர் நெடில் சக்திகள் என்பதை நீங்கள் அறிவீர்கள். அபூர்வமான இந்த சக்தியை திருமலையில் மட்டுமல்லாது கொண்டராங்கி திருமலையிலும் பெற நம் சற்குரு வழிவகுக்கிறார் என்பதாலும் கொண்டராங்கி மலை திருமலை என்று சித்தர்களால் அழைக்கப்படுகிறது.
கொண்டராங்கி திருமலையில் அர்ச்சுன வியூகத்தை எட்டு திசைகளிலிருந்து அஷ்ட நமஸ்கார பத்ததி முறையில் வணங்கும்போது பரிமாணங்கள் கடந்த நிலை உண்டாகின்றது. இதை சற்றே விளக்குவோம். ஒரு வட்டமான ரப்பர் டயரை எட்டு வடிவில் வளைத்தால் அதில் இரண்டு பூஜ்யங்கள் உண்டாகின்றன. ஆனால் இந்த இரண்டு பூஜ்யங்கள் வழியாக பார்வையை ஓட்டிக் கொண்டே ஆரம்ப இடத்திற்கு வந்தால் அங்கு ஒரு பூஜ்யம் மட்டும்தானே மிஞ்சும். இந்த இணைப்பே அட்ட நமஸ்கார பத்ததியில் இணையும் நான்கு நமஸ்காரங்கள் ஆகும். நான்கு நமஸ்காரங்கள் இடையே இணையும் நான்கு நமஸ்காரங்கள் இரண்டு பூஜ்யங்களின் இணைப்பாக அமைகின்றது.

திருத்தலத்தில் புத்தாண்டு வழிபாடு
திருவதிகை திருத்தலத்தில் பொலியும் கெடிலம் நதி தென் கங்கை என்று அழைக்கப்படுகிறது. வடக்கே பாயும் கங்கை நதி தெற்கே பாயும் இந்த கங்கைக்கு இணையானது என்பது இதன் ஒரு பொருள் ஆயினும் குருவின் அனுகிரகமான, தெற்கு நோக்கி அருளும் தட்சிணா மூர்த்தியின் அருள் பிரவாகம் என்பதையும் இது குறிக்கும் அல்லவா? இந்த கண்ணோட்டத்தில் பார்த்தால்தான் எப்படி அஷ்ட நமஸ்கார பத்ததி பூஜ்யம் என்பது நேர்கோடு என்ற சித்த வாக்கியத்தின் பிரவாகமாக அமையும் என்ற சுவையும் தெரிய வரும்.
கொண்டராங்கி திருமலையில் பொலியும் இந்த நெடில் சக்திகளைப் பூரணமாக பெற விரும்பும் அடியார்கள் கொண்டராங்கி திருமலையில் அர்ச்சுன வியூகத்தில் அஷ்ட நமஸ்கார பத்ததியில் வணங்கி வழிபாடுகள் இயற்றிய பின்னர் தங்கள் இல்லங்களில் அல்லது திருத்தலங்களில் விடியற்காலை பிரம்ம முகூர்த்த நேரத்தில், அதாவது காலையில் 3.30 மணி முதல் 5.30 மணிக்குள் குறைந்தது 8 x 8 = 64 முறைக்குக் குறையாது பிரம்ம காயத்ரீ மந்திரத்தை ஜபித்தல் நலமே. இதற்கு மேலும் காயத்ரி ஜபத்தை தொடர்வதும் ஏற்புடையதே. இதனால் 8 x 8 x 8 ... என்பதாக மந்திரத்தின் பலன்கள் பெருகி அதன் விளைவாக பிறவிகளும் மாயும் என்பதே நம் சற்குரு பரிந்தளிக்கும் அனுகிரகமாகும்.
பெருமாளின் ஆறாவது அவதாரமான பரசுராமர் அவதாரம் தன் தந்தையின் உத்தரவின்படி தன் தாயின் தலையையே பரசு ஆயுதத்தால் துண்டித்த அவதாரமாகத் துலங்கியது என்பதை நாம் அறிவோம். இதன் பின்னணியில் அமைந்த ஆயிரமாயிரம் தெய்வீக மகத்துவங்களை சாதாரண மனிதர்கள் புரிந்து கொள்ள முடியாவிட்டாலும் ஸ்ரீரேணுகா தேவி என்பதாக பாரதம் முழுவதிலும் அன்னை பராசக்தியின் அம்சமாக வழிபடப்படுகிறாள் என்பதே நாம் அறிந்து கொள்ள வேண்டிய செய்தியாகும். கொண்ட ராங்கி, அதாவது தான் ஈசனின் மனைவி என்ற கௌரவம் மேலிட, அதுவே அனைவரும் வணங்க வேண்டிய சக்தி அம்சமாக உருவெடுத்த திருமலையே கொண்ட ராங்கி என்பதற்கு எடுத்துக் காட்டாக குரோம்பேட்டை சென்னையில் ஸ்ரீரேணுகா தேவியின் திருத்தலத்தில் இந்த சோபகிருது புத்தாண்டு வழிபாடு வைபவம் நிகழ்ந்ததை பறைசாற்றுகிறது.
நம் சற்குருவால் புனருத்தாரணம் இயற்றப்பட்ட சக்தி திருத்தலமே இது என்பதே நம்மை மெய்சிலிர்க்க வைக்கும் ஒரு அனுபூதியாகும்.
உயிரில் உறையும் உடலுக்குச் சேவையே தீபசேவை!
தீபங்களில், தீப சக்திகளில் பல உட்பிரிவுகள் உண்டு. அதே போல குசா சக்திகளிலும் பல உட்பிரிவுகள் உண்டு. குசா சக்தியில் உள்ள 108 உட்பிரிவுகளில் உள்ள ஒரு உட்பிரிவே தீப சக்திகளாகும். இதில் அசல தீபம், குசல தீபம், கண்ட தீபம், கொண்ட தீபம், தீர்க தீபம் என்பவை ஒரு சில நன்மையே செய்யும் தீப சக்திகளாகும். இத்தகைய நன்மையே செய்யும் தீப சக்தியான குசல தீபம் பிரகாசிக்கும் ஆண்டே இந்த சோபகிருது ஆண்டு ஆகும்.
பழநி ஒட்டன்சத்திரம் அருகில் உள்ள கொண்டராங்கி திருமலையில் குசல தீபத்தை ஏற்றி அதை பிரபஞ்சத்தின் நன்மைக்காக அளிக்க சித்தம் கொண்டுள்ள மூர்த்திகளே
1. வியாச மகரிஷி
2. மகாபலி சக்கரவர்த்தி
3. பரசுராமர்
4. விபீஷணன்
5. ஆஞ்சநேயர்
6. கிருபாச்சாரியார்
7. அஸ்வத்தாமன்
என்ற ஏழு சிரஞ்சீவி மூரத்திகள் ஆவர். வெறும் ஏழே ஏழு சிரஞ்சீவி மூர்த்திகள்தான் இந்த பிரபஞ்சத்தில் இதுவரை தோன்றியுள்ளார்களா என்று உங்களுக்கு கேட்கத் தோன்றலாம். நிச்சயமாக இல்லை. எப்படி 63 நாயன்மார்கள் என்று நாம் வழக்கில் குறித்தாலும் நாயன்மார்கள் நூற்றுக்கும் மேல் உண்டு. சிரஞ்சீவிகளும் அவ்வாறே.
தன் ஒரே மகனின் கழுத்தை அறுத்து கறி சமைத்து ஒரு சிவனடியாருக்குப் படைத்தார் ஒரு நாயன்மார், ஆடாது அசையாது 30 வருடங்களுக்கு மேல் அமர்ந்து இதயத்தில் கோயில் கட்டி அதில் இறைவனை எழுந்தருளச் செய்து வழிபட்டார் ஒரு நாயன்மார். இவையெல்லாம் பக்தி இலக்கணங்களை கற்பிக்கும் தத்துவங்களே, இந்த தத்துவங்களை ஏற்று செயல்படுத்தி அதை உலகிற்கு வெளிப்படுத்திய உத்தமர்களையே நாம் நாயன்மார்கள் என்று அழைக்கிறோம்.
அது போல் என்றும் எங்கும் விளங்கும் தெய்வ தத்துவத்தை உலகிற்கு வெளிப்படுத்த தோன்றியவர்களே சிரஞ்சீவி மூர்த்திகள். இவர்கள் ஏழு பேர் வெளிப்படுத்திய தத்துவத்தையே மேற்குறித்த சிரஞ்சீவி மூர்த்திகளாக நம் சற்குரு அருளியுள்ளார். உண்மையில் கலியுகத்தில் தோன்றிய மார்க்கண்டேயரைப் போன்ற சிரஞ்சீவிகள் ஆயிரம் ஆயிரமே. இது சோபகிருது தமிழ் வருடத்துடன் 2023 என்ற ஆங்கில வருடத்தின் ஏழைக் குறிக்கும் சக்திகள் இணைவதால் ஏழு சிரஞ்சீவ சக்திகளை முன் வைத்து சிரஞ்சீவிகள் அனைவரும் திருஅண்ணாமலையை கிரிவலம் வந்து வழிபட்டு, இந்திர லிங்கம் முதலான அஷ்ட லிங்கங்களில் வழிபாடுகளை இயற்றி அந்த சக்திகளை எல்லாம் கொண்டராங்கி திருமலையில் ஏற்றப்படும் குசல தீபத்தில் சிரஞ்சீவித்துவ அனுகிரகமாக அளிக்கின்றார்கள் என்பதே நம் சற்குரு நமக்காக அருளும் சித்தர்கள் மட்டுமே அறிந்த இரகசியமாகும்.
18.11.2023 சனிக் கிழமை முதல் அனைத்து சிரஞ்சீவிகளும் திருஅண்ணாமலையை தொடர்ந்து கிரிவலம் வந்தவாறு இருப்பார்கள். எட்டாம் நாள் சனிக் கிழமை அன்று அஷ்ட லிங்கங்களிலும் வழிபாடுகளை இயற்றி தங்கள் வழிபாட்டுப் பலன்கள் அனைத்தையும் உலக நன்மைக்காக 26.11.2023 ஞாயிற்றுக் கிழமை அன்று ஏற்றப்படும் கொண்டராங்கி குசல தீபத்தில் அர்ப்பணித்து விடுவார்கள் என்பதே நம் சற்குரு தெரிவிக்கும் தீபப் பலன்கள். இப்போது உங்களுக்கு ஒரு சந்தேகம் தோன்றலாம். சிரஞ்சீவியாக இருந்தாலும் மகாபலி சக்கரவர்த்தி தன்னுடைய இருப்பிடமான பாதாள லோகத்தை விட்டு வெளியே வர முடியாது. ஆஞ்சநேய மகாபிரபு தன்னுடைய தவபீடமான சாந்தவெளி இமயமலைப் பகுதியிலிருந்து சாதாரணமாக வெளியே வருவது கிடையாது. இந்நிலையில் அனைத்து சிரஞ்சீவிகளின் அருட்கடாட்சத்தையும் நாம் எப்படி பெற முடியும்?
உங்கள் ஆத்ம விசார வழிபாடாக திருஅண்ணாமலையை வலம் வரும் காலம் முழுவதும் இது போன்ற சிரஞ்சீவி சக்திகள் எவ்வாறு பொலியும் என்பது குறித்து ஆத்ம விசாரம் செய்து வந்தால் நீங்கள் இந்த கேள்விகளுக்கான விடைகளைப் பெற முடிகிறதோ இல்லையோ நிச்சயம் உங்கள் வாழ்வில், உங்கள் சந்ததிகளுக்கு நிரந்தர சிரஞ்சீவித்துவ சக்திகளைப் பெற்றுத் தந்தவர்கள் ஆவீர்கள். இதை விடச் சிறந்த ஒரு செல்வத்தை, சொத்தை, ஐஸ்வர்ய கடாட்சத்தை உங்களுக்கும், உங்கள் குடும்பத்திற்கும், உங்கள் பரம்பரைக்கும் பெற்றுத் தர முடியுமா?
பரிமாணம் கடந்த பரிணாமம்
ஒரு முறை நம் சற்குருவைக் காண 120 கொலைகள் புரிந்து ஒரு ‘உத்தமர்’ வந்திருந்தார். சாதாரண வேலையில் சேர்ந்த அந்த அரசு அதிகாரி தன்னுடைய ‘திறமை’ மூலமாக பலரை எமலோகத்திற்கு அனுப்பி விட்டு அதன் ‘பயனாய்’ பல பதவி உயர்வுகளை அடுத்தடுத்து பெற்று விட்டார். இப்போது தன்னுடைய திறமையைக் காட்ட தன்னுடைய ‘தர்ம பத்தினி’ என்று கூட்டி வந்த ஒரு விலைமாது மூலமாக தன்னுடைய காரியத்தை சாதிக்க அவர் தயாராக இருந்தார். நம் சற்குருவும் இதற்காகப் பச்சைக் கொடி காட்டவே அந்த அதிகாரி தன் ‘மனைவியின்’ மூலம் பதவி உயர்வைப் பெற்று விட்டார்.

நம் சற்குருவின் இந்த அரிய சேவைக்காக அவருக்கு நன்றி தெரிவிக்க அந்த அதிகாரி நம் சற்குருவின் இல்லத்தை அடைந்தபோது கோவணாண்டிப் பெரியவரோ, “டேய், நீ மறஞ்சுடுடா...”, என்று கூறவே நம் சற்குருவும் அந்த அதிகாரியின் பார்வையிலிருந்து மறைந்து விட்டார். பூமியிலுள்ள எந்தப் பொருளும் நான்காவது பரிமாணத்திற்குச் சென்று விட்டால் அது மனிதக் கண் பார்வையிலிருந்து மறைந்து விடும். இவ்வாறு தன்னுடைய ‘மறைவை’ தன்னுடைய சுயநலத்திற்காகப் பயன்படுத்தாமல் மற்றவர் நலனுக்காகப் பயன்படுத்தியதே நம் சற்குருவின் உயர்ந்த செயல்.
ஒருமுறை நம் சற்குரு உட்பட மூன்று பெயர் சென்னையில் ஒரு சந்தடி மிகுந்த சாலையின் வழியாக சென்று கொண்டிருந்தபோது ஒரு ‘பிளேடு’ அவர்கள் எதிரில் வந்து விட்டார். கார்த்திகை தீப அன்னதானத்திற்கு நன்கொடை பெறுவதற்காக ஒரு பிரமுகரைச் சந்திக்க அவர்கள் சென்று கொண்டிருந்தனர். அந்த அடியார் நம் சற்குருவைக் காணப் போவதாகவும் அந்த இரண்டு பேரும் தன்னுடன் வருவதாக இருந்தால் வரலாம்..., என்று ஒரு ‘அன்பு’ அழைப்பையும் விடுத்தார். அப்போதுதான் அந்த அடியார்களுக்கே தெரிய வந்தது. நம் சற்குரு அந்த அடியாரின் பார்வையிலிருந்து மறைந்து விட்டதால்தான், சாலையில் சென்று கொண்டிருந்த மூன்று நபர்கள் இரண்டு நபர்களாக அந்த அடியாரின் பார்வைக்குத் தெரிந்தனர் என்ற இரகசியம்.
இத்தகைய பரிமாணம் கடந்த பரிணாம இரகசியங்களை நம் சற்குரு எப்படி எல்லாம் அடியார்களின் நன்மைக்காக பயன்படுத்துவார் என்பதையும் நாம் ஏற்கனவே விவரித்துள்ளோம். குசல தீபம் என்னும்போது அது இத்தகைய பரிமாணம் கடந்த பரிணாம இரகசியங்களை நம் சற்குருவை நம்பும் உத்தமர்களுக்கு தீபப் பிரகாச பலன்களாக நல்கும் என்பதே குசல தீபத்தின் மகத்துவமாகும்.
இந்த சோபகிருது வருடம் கார்த்திகை தீபத்தின் உற்சவ தினங்களில் திருஅண்ணாமலையை வலம் வரும் சிரஞ்சீவிகள் அனைவரும் ஏதாவது ஒரு குசல சக்தியை தங்கள் அனுகிரகமாக அளிக்க வேண்டும் என்பது கார்த்திகை தீப கிரிவல விதியாக இருப்பதால் இந்த உற்சவ நாட்களில் வலம் வந்து கொண்டராங்கி குசல தீபத்திற்கு ஏதாவது ஒரு வகையில் உறுதுணையாய் இருப்பவர்களுக்கு, நிற்பவர்களுக்கு இந்த குசல சக்திகள் உறுதுணையாய் நின்று பொலியும் என்பது உறுதி.
குசல சக்தியால் என்ன பயன்?
மனித கற்பனைக்கு எட்டாத எத்தனையோ பயன்கள் குசல சக்தியால் விளையும் என்றாலும் ஒரே ஒரு பயனைப் பற்றி மட்டும் இங்கு விளக்குகிறோம். ஒரு முறை ஐந்து நதிகள் பாயும் திருவையாறு திருத்தலத்திற்கு வருகை தந்த நம் சற்குரு அங்குள்ள காவிரி ஆற்றில் அடியார்கள் சூழ நீராடிக் கொண்டிருந்தார். அப்போது அங்குள்ள அடியார்களிடம் இரகசியமாக ஒரு அடியாரைச் சுட்டிக் காட்டி, “அவன் மேல் வேண்டும் அளவிற்கு தண்ணீரை வாரி இறையுங்கள்...” என்று கூறி விட்டு நைசாக நீரிலிருந்து வெளியேறி விட்டார்.
இது போதாதா நம் அடியார்களுக்கு? காவிரி ஆற்றில் இருந்த தண்ணீரை எல்லாம் ஏதோ விளையாடுவதுபோல் அந்த அடியாரைச் சுற்றி நின்று கொண்டு அந்த அடியார் மேல் கையால் வேகமாக தள்ளத் தொடங்கி விட்டனர். அனைத்து அடியார்களும் சேர்ந்து கொண்டதால் அந்த அடியார் திக்குமுக்காடிப் போனார். சிறிது நேரம் பொறுத்துப் பொறுத்துப் பார்த்தார். அவரால் இந்த ‘தண்ணீர்’ தாக்குதலை சமாளிக்க முடியாமல் போன போது சட்டென்று கோபக் கனல் வீச ஆற்றிலிருந்து வெளிவந்து விட்டார். இந்த நிகழ்ச்சிக்குப் பின் அவர் நம் சற்குரு இருக்கும் திசையில் தலை வைத்து கூடப் படுக்க வில்லை.
“நல்லவர்கள், தெய்வ பக்தி மிக்கவர்கள் என்று நினைத்த அடியார்களே இவ்வாறு எனக்கு மூச்சுத் திணறுகிறது என்று தெரிந்தும் என் மேல் தண்ணீர் அடித்து, குருநாதர் முன்னிலையிலேயே விளையாடுகிறார்களே, இவர்களுடைய சத்சங்கத்தில் இனிமேல் இருந்து என்ன பயன்?” என்று அந்த அடியார் நினைத்து விட்டார்.
நம் சற்குரு தம் சத்சங்கத்திலிருந்து ஒரு அடியார் பிரிந்து விட்டார் என்பது பற்றி சற்றும் கவலைப்படவில்லை. காரணம், அந்த அடியாருடைய மூதாதையர்களின் வேண்டுகோளை தம்மால் நிறைவேற்ற முடிந்தது. அது போதும், மற்ற விஷயங்களைப் பற்றி கவலைப்பட வேண்டியது அந்த அடியாரின் பித்ருக்களே.
அந்த அடியாருக்கு முற்பிறவிகளில் செய்த காரியங்களின் விளைவால் தண்ணீரில், அதுவும் ஐந்து நதிகள் பாயும் நதியில், உயிர் போக வேண்டும் என்பது விதி. அதை தம் அடியார்கள் மூலம் தடுத்து விட்டார் நம் சற்குரு. இதே அற்புதம்தான் மேற்கூறிய அதிகாரியின் பதவி உயர்விலும் நடந்த உன்னதம். ஒரு கொலைகாரனுக்கு நம் சற்குரு உதவினார் என்பது இங்கு விஷயமல்லை, அந்த அதிகாரிக்கு அவர் பதவி உயர்வைப் பெற்றுத் தரவில்லை என்றால், அது உலகத்தவர் ஏற்கும் முறையில் இல்லாவிட்டாலும் கூட, அவருக்கு மேல் உள்ள அதிகாரியின் உயிர் பறி போயிருக்கும், இதைத் தடுக்கவே நம் சற்குருவின் ‘தகாத’ செயல்.
இந்த இரண்டு அற்புதங்களையும் நினைத்துப் பாருங்கள், இணைத்துப் பாருங்கள், நீங்கள் என்றுமே சற்குருவின் நிழலை விட்டுப் பிரிய மாட்டீர்கள்!

ஒரு முறை திருக்கோஷ்டியூர் பெருமாள் தலத்திற்கு நம் சற்குரு சென்றிருந்தார். ராமானுஜ ஆச்சாரியார் ‘ஓம் நமோநாராயணாய’ என்ற தம் சற்குரு உபதேசமாக அளித்த எட்டெழுத்து மந்திரத்தை குரு ஆணையை மீறி அனைவருக்கும் அளித்த உத்தம விதானத்தை நம் சற்குரு அடைந்தபோது பலரும் அவரைப் பின் தொடர்ந்து சென்றனர். அது குறுகிய பாதையாக இருந்ததால் ஆண் பெண்கள் சேர்ந்த அடியார்கள் குழுவில் மிகுந்த குழப்பம் ஏற்பட்டது.
“அடியேன் ஒருவன் பார்த்தால் போதும் என்ற எண்ணம் ஏன் இவர்களுக்கு வரவில்லை?” என்று நம் அடியார்களைப் பார்த்து நொந்து கொண்டார் நம் சற்குரு. நம் குருநாதர் ஒரு இடத்தைப் பார்த்தால் அந்த இடத்து தரிசன பலன்களை எல்லாம் தம் அடியார்களுக்கு தாரை வார்த்து அளித்து விடுவார், தமக்கு என்று எதையும் வைத்துக் கொள்ள மாட்டார், என்ற நம்பிக்கை ஏன் நம் அடியார்களுக்கு ஏற்படவில்லை என்பதே நம் சற்குருவின் மனக் குறை. அதுபோல் குருமங்களகந்தர்வ லோகத்தை நாம் அடைய முடியாவிட்டாலும் அந்த குரு லோகத்தைச் சேர்ந்த நம் சற்குரு தன் அனுகிரகத்தை எல்லாம் தம் அடியார்களுக்கு எல்லாம் பகிர்ந்தளிப்பார் என்ற எண்ணத்தை நாம் வலுப்படுத்திக் கொள்ள உதவுவதே கொண்டராங்கி திருமலையில் பொலியும் குசல தீபத்தின் மகிமைகளுள் ஒன்றாகும்.
நான்காம் பரிமாணத்தில் துலங்கும் ஒரு பலனே நம் உயிரையும் காக்கவல்லது என்றால் மற்ற பரிமாணங்களை ஊடுருவும் சக்தி பெற்ற நம் சற்குரு நமக்காக அளிக்கக் கூடிய பலன்களை வார்த்தைகளால் விவரிக்க முடியுமா?
நம் சற்குரு மணமுள்ள மலர்களை மட்டுமே இறைவனுக்கு அர்ப்பணிக்க வேண்டும் என்று கூறுகிறார். அரவிந்த மாதாவோ காகிதப் பூவையும் கடவுளுக்கு அளிக்கலாம் என்று சிபாரிசு செய்கிறார். இரு குருநாதர்களுக்கு இடையே ஏன் இந்த முரண்பாடு என்பது நம் அடியார் ஒருவரின் ஐயப்பாடு.
ஐயம், சந்தேகம், முரண்பாடு எல்லாம் அடியார்களின் மனதில்தானே தவிர குருமார்களின் கருத்துக்களில் எந்த காலத்திலும் முரண்பாடுகள் இருந்ததில்லை, இருக்கவும் முடியாது, காரணம் கடவுள் ஒன்றே. ஒன்றே பரம்பொருள்.
கன்னியாகுமரி விவேகானந்தர் பாறையில் இருக்கும் ராமகிருஷ்ண பரமஹம்சர் திருஉருவத்திற்கு பிளாஸ்டிக் தாமரை மாலையை சார்த்தி இருப்பார்கள். தினமும் விவேகானந்தர் பாறைக்குச் சென்று இங்குள்ள பரமஹம்சரின் திருஉருவப் படத்தை பக்தர்கள் தரிசனம் செய்ய முடியாது. அதனால் பிளாஸ்டிக் மாலையை அவருக்குச் சார்த்தி இருப்பார்கள். ஆனால், அந்த மாலையைப் பார்க்கும் நம் அடியார் தான் எந்த ஊரில் இருந்தாலும் கடவுளுக்கு என மலர் மாலையை அணிவிக்க எண்ணும்போது ரோஜா, மல்லிகை, சம்பங்கி என்ற மணம் மிகுந்த மாலையையே தேர்ந்து எடுத்து வாங்குவார்.
அதே போல் அமிர்தானந்தா அன்னைக்கு பிளாஸ்டிக் மாலையை விலை கொடுத்து வாங்கி சார்த்துவார்கள். அது பிளாஸ்டிக் மலர் மாலை என்றாலும் அந்த விற்பனையில் கிட்டும் பணம் கொண்டு அன்னை அடியார்களுக்கு சுவையான, சூடான உணவைத்தானே அளிக்கிறார்கள்? அடியார்கள் மணம் மிகுந்த வாழ்வை மேற்கொள்ள வழிகாட்டுகிறார்களே அன்னை. இதற்கும் இந்தப் பணம் பயனாகுமே.
எனவே சற்குருமார்கள் மனம் வைத்தால் முள்ளும் மலராகும், பிளாஸ்டிக் மலரும் மணக்கும், கல்லும் கனியாகும். காரணம், எந்தப் பலனையும் எதிர்பார்த்து இறைவனிடம் கையேந்துபவர்கள் கிடையாது மகான்கள், அனைவர் உள்ளும் நிலை கொண்ட இறைவனை அவரவரே உணர்ந்து அவர்களே மணம் வீச அவர்களுக்கு துணையாய் நிற்பவர்களே சற்குருமார்கள்.
சாதாரணமாக மனிதர்களுக்கு நல்ல பல் முளைப்பதற்கு கிட்டத்தட்ட 10 ஆண்டுகள் ஆகும் என்பது நீங்கள் அறிந்ததே. அது போல் சங்குகள் உருவாவதற்கு ஒரு ஆண்டு காலம் முதல் சங்கின் தன்மையைப் பொறுத்து நூற்றுக் கணக்கான ஆண்டுகள் கூட எடுத்துக் கொள்ளும். ஒரு அடியார் வீட்டில் மழை பெய்த போது அங்கிருந்த துளசிச் செடியைச் சுற்றி நூற்றுக் கணக்கான சங்குகள் ஒரு இரவு மழையில் தோன்றி விட்டன. இது எப்படி சாத்தியாமாகும்?
யாருடைய நிர்வாணம் பார்ப்பவர்கள் மனதில் அசூயையான எண்ணங்களைத் தோற்றுவிக்கவில்லையோ, அவர்களே உண்மையான அவதூத நிலையை எட்டியவர்கள். மனிதனும் தெய்வமாகலாம் என்ற நிலை.
உதாரணம் – ஸ்ரீகசவனம்பட்டி சித்தர், ஸ்ரீதட்சிணாமூர்த்தி சுவாமிகள், நம் சற்குருவின் சமாதிக்கு முந்தைய நிலை
அந்த அடியார் வீட்டிற்கு பல முறை நம் சற்குரு விஜயம் செய்து இருந்தார். ஒவ்வொரு விஜயத்தின் போதும் பல சங்கு சக்திகளை அந்த இல்லத்தில் நிரவிட அந்த சங்குகள் எல்லாம் சிறிது சிறிதாக வளர்ந்து விட்டன. ஆனால் அந்த சங்குகள் எல்லாம் மனிதக் கண்களுக்குத் தெரியாத பரிமாணத்தில் திகழ்ந்தன. நம் சற்குரு எப்போது அந்த சங்குகளை சங்பல்பித்தாரோ அப்போது உடனே அந்த சங்குகள் அந்த அடியார் வீட்டில் தோன்றி விட்டன. இதுவும் பரிமாணம் கடந்த பரிணாமமே.
இத்தகைய அற்புதங்களை எல்லாம் நம் சற்குரு குறித்த அடியார்கள் இல்லத்தில் மட்டும்தான் நிகழ்த்துவார், குறித்த அடியார்கள் வாழ்வில் மட்டும்தான் இத்தகைய அற்புதங்கள் எல்லாம் நிகழும் என்று குறுகிய வட்டத்திற்குள் சுற்றுபவரா நம் சற்குரு. இல்லவே இல்லை, இந்த பிரபஞ்சம் அனைத்திலும் உள்ள மனிதர்கள், விலங்குகள், தாவரங்கள் என்று மட்டுமல்லாது புழு பூச்சிகள் என்ற அனைத்திற்கும் சொந்தமே நம் சற்குரு. அவரவர் கொண்ட நம்பிக்கையைப் பொறுத்து நம் சற்குருவின் மகிமைகளை நாம் உணர வழிவகுப்பதே கொண்டராங்கி குசல தீபமாகும்.
திருக்கழுக்குன்றம் சங்கு தீர்த்தத்தில் 12 வருடங்களுக்கு ஒரு முறை ஒரு சங்கு தோன்றும். மேள தாளங்களுடன் அந்த சங்கை எடுத்து வந்து அதற்கு பூஜை ஆராதனைகள், வழிபாடுகள் செய்து மகிழ்வார்கள் பக்தர்கள் என்பது நீங்கள் அறிந்ததே. 12 வருட காலத்திற்கு அந்த சங்கு எங்கிருந்தது? இதுவே சங்கின் தோன்றாநிலையை நாம் காணும் நிலை வரை சங்கு தீர்த்தத்தில் மறைத்து வைத்திருந்து நமக்கு முன்னரே அந்த சங்கிற்கு பூஜை ஆராதனைகளை செய்து நமக்காக அர்ப்பணிப்பவர்களே சித்தர்கள்.
உண்மையில் ஒவ்வொரு 60 வருட தமிழ் வருடத்தின் ஆரம்பத்திலும் திருக்கழுக்குன்ற சங்கு தீர்த்தத்தில் ஒரு சங்கு தோன்றும். இவ்வாறு தோன்றும் சங்குகளை 12 வருடத்திற்கு ஒரு முறை மட்டுமே நம் கண்ணிற்கு புலனாகும் வரையில் அதற்கு பூஜைகள் இயற்றி சங்கின் புனிதத்துவத்தை நிலைநிறுத்துவார்கள் சித்தர்கள் என்பதே நம் சற்குருவின் தெளிவுரை.
எதற்காக திருக்கழுக்குன்ற சங்கிற்கு இத்தகைய வர்ணனை? இதை ஆத்ம விசாரத்தின் ஆரம்பமாகக் கொண்டு முன்னேறினால் நீங்கள் எளிதில் கொண்டராங்கி குசல சக்திகளின் மகத்துவத்தை புரிந்து கொள்ளலாம். கொண்டராங்கியில் தீபம் ஏற்றும்போது அது அடிவாரத்திலிருந்து பார்க்கும்போது மலை உச்சியில் ஒரு சிறிய அகல் விளக்கு தீபம் ஒளிர்வதுபோல்தான் தோன்றும். ஆனால் இதன் பரிமாணம் 2000 மைல்கள் குறுக்களவிற்கும் 6000 மைல் உயரத்திற்கும் கொண்டராங்கி குசல தீப சக்திகளாக வியாபித்து இருக்கும் என்பதே நம் சற்குருவின் தெளிவுரை.
இப்போது பளிச்சென ஒரு தெய்வீக இரகசியம் புரிந்திருக்குமே? ஆம், அதுவே கொண்டராங்கி மலை திருஅண்ணாமலையிலிருந்து 6000 மைல்கள் உச்சியில் பொலிகின்றது என்பதாகும். எனவே நாம் கார்த்திகை தீபத்தன்று கொண்டராங்கியில் மலை உச்சியில் ஏற்றும் தீபம் திருஅண்ணாமலையில் 6000 மைல் உயரத்திற்கு வியாபிக்கும் என்றால் இதனால் பஸ்மமாகும் கர்ம வினைகளை, மக்களுக்கு மற்ற உயிர்களுக்கு கிட்டும் அனுகிரக சக்திகளை எழுத்தால் வர்ணிக்க இயலுமா என்ன?
ஒரு முறை திருஅண்ணாமலை கார்த்திகை தீப அன்னதானத்தின்போது மேள தாள இசையுடன் ஒரு அடியார் 120க்கும் மேற்பட்ட இராகங்களில் அருணாசல சிவ, அருணாசல சிவ என்ற அருணை மந்திரத்தை இரவு முழுவதும் ஓதிக் கொண்டே இருந்தார். திருஅண்ணாமலையில் மிகவும் சுத்தமான மனதுடன், சற்குருவின் திரண்ட ஆசியுடன், மேள தாள இசையுடன், அங்கு அருணாசல கீதமும் இசைக்கப்பட்டால் அதன் மகிமைதான் என்னே என்னே?
நம் சற்குரு எந்த காரியத்தைச் செய்தாலும் அதன் பின்னணியில் ஆயிரமாயிரம் அனுகிரக சக்திகள் சமுதாயத்திற்கும், அடியார்களுக்கும் திரளும் என்பதை பன்முறை வலியுறுத்தி வந்திருக்கிறோம் அல்லவா? இந்த அருணாசல கீத இசையின் பின்னணி சக்திகள் என்ன? ஒருவர் தன் உயிரை விடும்போது பூமியிலிருந்து ஒரு சாண் உயரத்திற்குக் கூட அவருடைய ஆன்மா எழுவதில்லை என்பதே நம் சற்குரு தெரிவிக்கும் இரகசியம். அவ்வாறு எழும் ஆன்மா உடனே அடுத்த பிறவியை பூமியில் பெற்று விடுகிறது. புனரபி ஜனனம், புனரபி மரணம் என்பதாகத்தானே பூமி மக்களின் வாழ்வு பூமியில் தொடர்கிறது.
இதை தடுத்து உயர்ந்த நிலையான பித்ரு தேவர்களின் நிலையையாவது அடைய வேண்டுமானால் இதற்காக மனித ஆன்மா பூமியிலிருந்து 3000 யோசனை தூரம் உள்ள பித்ரு மண்டலத்தை அடைந்தாக வேண்டும்.
ஒரு சாண் அளவு கூட உயரே செல்ல முடியாத மனித ஆன்மா என்று பித்ரு மண்டலத்தை அடைவது? இதற்கு நம் சற்குரு அருளும் குறுக்கு வழியே, சுருக்கு வழியே இவ்வாறு அருணாசல கீதத்தை பல இராகங்களில் இசைத்து அவ்வாறு இசைக்கப்பட்ட தீப பிரசாதத்தை அடியார்களுக்கு வழங்குவதாகும். கொண்டராங்கியில் தீபம் பிரகாசிக்கும்போது இவ்வாறு அருணாசல கீதத்தை தீபம் முன்னிலையில் பல ராகங்களிலும் இசைப்பதும் கிடைத்தற்கரிய பேறே. இதனால் கொண்டராங்கி குசல தீப சக்திகள் 6000 மைல் உயரத்தில் உள்ள கொண்டராங்கி பர்வதத்தை அடைய வழிவகுத்தவர்கள் ஆவோம். ஆஹா, என்ன சுகம், இந்த சுகம்?!
இரண்டு வெள்ளை யானைகளுக்கு நடுவில் தீபம் பிரகாசிப்பதாக தியானித்தல் எத்தகைய பலன்களை நல்கும் என்று ஏற்கனவே விளக்கியுள்ளோம். அதுபோல் இந்த சோபகிருது வருட தீப தியானமாக 6000 மைல் உயரமும் 2000 அடி குறுக்களவும் உள்ள கொண்டராங்கி குசல தீபத்தின் நடுவில் நீங்கள் அமர்ந்திருப்பதாக தியானித்தால் கிட்டும் பலன்கள் அமோகமே. இனி நாம் எடுக்க வேண்டிய எத்தனையோ பிறவிகள் இந்த தீப அக்னியில் எரிந்து பஸ்மமாகும் என்பதே இந்த அனுகிரகத்தின் சுருக்கமான விளக்கமாகும்.
அருகில் செல்லவே முடியாத அளவிற்கு கொழுந்து விட்டு எரியும் கார்த்திகை தீப அக்னியின் நடுவே அமர்ந்திருப்பது எந்த அளவிற்கு சாத்தியம் என்று நீங்கள் நினைக்கலாம். இது பல காலங்களாக திபெத்திய லாமாக்களால் நிறைவேற்றப்படும் ஒரு தியான முறையே. குழந்தை பிறந்தவுடன் பனிக் கட்டி மூடியிருக்கும் ஒரு குளத்தின் ஐசை உடைத்து அதன் உள்ளிருக்கும் குளிர்ந்த நீரில் குழந்தையை ஒரு முக்கு முக்கி எடுப்பார்கள். இவ்வாறு தயாராகும் குழந்தை வளர்ந்து பெரியவன் ஆகியதும் இத்தகைய குளத்து நீரில் நனைத்த துண்டை உடலில் போர்த்தி ஒரு இரவுக்குள் மூன்று தடவை தன்னுடைய உடல் வெப்பத்தால் அந்த துண்டை உலர வைக்க வேண்டும். அப்போதுதான் அவர்கள் தியானத்திற்கு தகுதி பெறுகிறார்கள்.
இவ்வாறு தியானம் பழகும்போது தன்னைச் சுற்றிலும் கொழுந்து விட்டு எரியும் அக்னி சுற்றிக் கொண்டிருப்பதாக அவர்கள் தொடர்ந்து நினைத்துக் கொண்டே இருக்க வேண்டும். அப்பர் சுவாமிகள் கூறும் மாசில் வீணை என்ற குளிர் தென்றலும் இவ்வாறு கொழுந்து விட்டு எரியும் நெருப்பை பொய்கையின் குளிர்ச்சியாக தியானம் செய்த முடிந்ததன் விளைவுதானே?
அங்கிங்கெனாதபடி ஆனந்த வெள்ளமாய் அருட் பிரகாசமாய் தோன்றுவது இறைப் பரம்பொருள் என்பர் பெரியோர். இத்தகைய இறை அனுபவம் காயுமானவருக்கு மட்டும்தான் சொந்தமா என்ன? நிச்சயம் கிடையாது, நம் அடியார்களும் இந்த எல்லையில்லா ஆனந்தப் பெருவெளியை அடைய நம் சற்குருவால் சுட்டிக் காட்டப்படுவதே இந்த ‘குசல தீபப் பிரவேசம்’.
குசல சக்தி வாழ்வில் என்றும் அசல சக்தியாய் நின்று ஒளி வீச அருள்வதே கொண்டராங்கி குசல தீபம் !
குசல சக்தி என்னும் பதத்திற்கு ஆயிரமாயிரம் விளக்கங்கள் உண்டு. அதில் ஒன்றே ராமகிருஷ்ண பரமஹம்சர் அருளும் மூவித கவர்ச்சிகள் ஆகும்.
கு .. உத்தம தாய்க்கு தன் குழந்தை மேல் உள்ள கவர்ச்சி
ச .. கற்புடைய மங்கைக்கு தன் காதலன் மேல் உள்ள கவர்ச்சி
ல .. லோபிக்கு உலகப் பொருட்கள் மேல் உள்ள கவர்ச்சி
இந்த மூன்று கவர்ச்சிகளும் ஒருங்கிணைந்து ஒரு பக்தனுக்கு அமையுமானால் அவன் விரைவில் இறைவனை அடைந்து விடுவான் என்பார் பரமஹம்சர். எப்படி இத்தகைய கவர்ச்சிகளை ஒன்றாய் ஒருங்கிணைப்பது என்று உங்களுக்கு சந்தேகம் எழலாம்.
கவலையை விடுங்கள், கொண்டராங்கி குசல தீபத்தை ஏற்றி பிரகாசிக்க முழு மூச்சாக உங்களால் முடிந்த சேவைகளை நிறைவேற்றுங்கள். நிரந்தர குசல சக்திகளைப் பெறுவீர்கள். அதன் பலன் கடவுள் உள்ளங்கை நெல்லிக் கனியே!
வியாச மகரிஷி முதல் பல சிரஞ்சீவிகளும் திருக்கார்த்திகை தீப வைபவத்தை ஒட்டி கிரிவலம் வருவதாக அளித்திருந்தோம். இத்தகைய பெரியோர்களை தரிசிக்கும் அளவிற்கு நாம் தெய்வீகத்தில் முன்னேறா விட்டாலும் இந்த மகான்கள் அளிக்கும் அனுகிரக சக்திகளை நிச்சயமாக நாம் குறித்த தான தர்மம் மூலமாகப் பெற முடியும் என்பதே நம் சற்குரு அளிக்கும் உத்திரவாதம். இவ்வாறு சிரஞ்சீவிகள் ஆற்றும் கிரிவலத்தில் திரளும் பலன்களை நம் அடியார்களுக்கு அளிப்பதே கீழே விவரித்துள்ள தான முறையாகும்.
| 18.11.2023 சனிக்கிழமை | கம்பளி ஆடைகள், போர்வை, ஸ்வெட்டர், தொப்பி போன்ற ஆடைகள் குறிப்பாக முதியோர்க்குத் தானம் |
| 19.11.2023 ஞாயிற்றுக்கிழமை | பால்பொருட்கள் தானம் - பால்கோவா, குழந்தைகளுக்கு பால் பவுடர், கெட்டிப்பால் (milk maid), தயிர், வெண்ணெய் போன்றவை (நெய் தவிர்த்து) |
| 20.11.2023 திங்கட்கிழமை | பிளாஸ்டிக் கூடைகளில் ஒன்பது சுற்று முறுக்கு அல்லது அதிசரம் வைத்து தானம் |
| 21.11.2023 செவ்வாய்க் கிழமை | கைத்தடிகள், ஏற்கனவே பரிசோதனை செய்தவர்களுக்கு கண் கண்ணாடி, மூன்று செல் டார்ச் தானம் |
| 22.11.2023 புதன் கிழமை | எழுது பொருட்கள், அதாவது இங்க் பேனா, நோட்டு புத்தகம், கைக்கடிகாரம் போன்றவை படிக்கும் மாணவர்களுக்கு மட்டும் |
| 23.11.2023 வியாழக் கிழமை | வெள்ளிக் குங்குமச் சிமிழ்களில் தாமே தயாரித்த மஞ்சள், குங்குமம் தானம் |
| 24.11.2023 வெள்ளிக் கிழமை | ஒன்பது கஜ புடவை, எட்டு முழ வேட்டி தம்பதிகளுக்கு மட்டும் தானம் |
| 25.11.2023 சனிக் கிழமை | அட்டலிங்கங்களில் ஏதாவது ஒரு லிங்கத்திற்கு, குறிப்பாக எமலிங்கத்திற்கு அபிஷேக ஆராதனை |
சென்னையில் ஒரு திருத்தலத்தில் நம் சற்குரு உழவாரத் திருப்பணிகள் ஆற்றிக் கொண்டிருந்தபோது நம் சற்குருவின் அருகில் எட்டுப் பனைமரம் உயரம் உள்ள மார்க்கண்டேய மகரிஷி எழுந்தருளி அந்த உழவாரத் திருப்பணிகளை இரசித்துக் கொண்டிருந்தார். இதை அறிந்த நம் சற்குரு எல்லையில்லா ஆனந்தத்துடன் நம் அடியார்களுக்கு மார்க்கண்டேய மகரிஷியின் தரிசனப் பலன்களை சுருக்கி, அதாவது எட்டுப் பனைமரம் உயரத்தை குறுக்கி, வாங்கித் தர வேண்டும் என்று துடித்தாராம்.
ஆனால், மார்க்கண்டேய மகரிஷியோ தன் உதட்டில் கைவைத்து ‘உஷ்...’ என்றாராம், அதாவது அடியேனுடைய வருகையை யாருக்கும் தெரிவிக்க வேண்டாம் என்பதற்காக. அன்றிலிருந்து இவ்வாறு சிரஞ்சீவிகளின் அனுகிரகத்தை எப்படியாவது நம் அடியார்களுக்கு வாங்கித் தர வேண்டும் என்று அரும்பாடுபட்டு வந்தார் நம் சற்குரு. அதனால் கனிந்த அரும்பயனே இந்த சோபகிருது வருட அருணாசல கிரிவலம். எத்தனை வருடங்கள் ஆனாலும் சரி, ஒரு சிரஞ்சீவி என்ன பல சிரஞ்சீவி உத்தமர்களின் அனுகிரகத்தை பெற்றுத் தருவதாக அமைவதே இந்த கார்த்திகை தீப கிரிவலமாகும். எனவே நம் அடியார்களின் குரு நம்பிக்கையைப் பொறுத்து, ஆன்மீக முன்னேற்றத்தைப் பொறுத்து பல சிரஞ்சீவிமார்களின் தரிசனத்தை ஏதாவது ஒரு வழியில் பெற உதவுவதே தான தர்மத்துடன் இணையும் மேற்கூறிய கிரிவல முறையாகும்.
இயற்கையான பிரசவத்தை சுகப் பிரவசம் என்றே அழைப்பர். இதிலிருந்தே இதன் மகத்துவத்தை நாம் புரிந்து கொள்ளலாம். பிரசவத்தில் கர்ப்பிணிப் பெண்கள் மிகுந்த வேதனை அடைகின்றனர் என்பது மக்களின் பொதுவான கருத்து. ஆனால், சித்தர்கள் கூறுவதோ சுகப் பிரசவத்தில் பெண்கள் ஈடு இணையற்ற ஆனந்தத்தை அடைகிறார்கள் என்பதே! சுகப் பிரசவத்தில் பிறந்த குழந்தைகளும் பிறக்கும்போது வேதனையை அடைந்தாலும், இந்த வேதனை எதிர்காலத்தில் அவர்கள் எத்தகைய நெருக்கடியான சூழ்நிலைகளையும், கடுமையான வியாதிகளையும் எதிர்த்து வெற்றி கொள்ள உறுதுணையாக அமையும்.
விதிவசமாக இத்தகைய சுகப் பிரசவம் பெற முடியாத பெண்களுக்கும், சிசேரியன் ஆபரேஷன் மூலமாக பிறந்த குழந்தைகளுக்கும் ஓரளவு நிவர்த்தி நல்குவேதே 25.11.2023 சனிக் கிழமை அன்று அஷ்டலிங்க மூர்த்திகளுக்கு இயற்றும் அபிஷேக ஆராதனையாகும். சுத்தமான பவள பஸ்மம் கலந்த பஞ்சாமிர்தத்தால் இறைவனுக்கு அபிஷேகம் இயற்றி இந்த பிரசாதத்தை கிரிவலம் வரும் பக்தர்களுக்கு அளிப்பதால் கிட்டும் பலன்கள் அமோகமே. இந்த அபிஷேக ஆராதனைக்குப் பின் கொண்டராங்கி குசல தீபத்தை தரிசிக்கும்போதுதான் ‘குசல’ என்ற பதம் அளிக்கும் பொருளை ஓரளவு, ஓரளவே உணர்ந்தவர்கள் ஆவோம்.
கடவுள் கருணையால் சுகப் பிரசவம் பெற்ற பெண்களும் சற்குரு விளக்கும் இந்த ‘எல்லையில்லா ஆனந்தத்தை’ பிற்காலத்தில் இறை தரிசனமாக அடைவதற்கும் இந்த அஷ்டலிங்க வழிபாடு உறுதுணையாக அமையும்.

ஐயர்மலை தரிசனம் முசிறி
நம் சற்குரு திருஅண்ணாமலை ஆஸ்ரமத்தில் ஒரு அறையில் தங்கி இருந்தார். சில வருடங்கள் கழித்து அந்த அறையை விட்டு வேறு ஒரு அறைக்குச் சென்று விட்டார். அந்த அறையில் பௌர்ணமி சேவைக்கு வரும் ஒரு சில அடியார்கள் தங்க ஆரம்பித்தனர். ஒரு நாள் அந்த அறைக்கு வந்த நம் சற்குரு, “அடியேன் உடலை விட்டு விட்டு அடிக்கடி ஆஸ்ட்ரலாக சென்ற அறை, சார், இது. ரொம்ப ஜாக்கிரதையாக பயன்படுத்துங்கள்...”, என்று கூறி சென்று விட்டார்.
அங்கிருந்த அடியார்களுக்கு நம் சற்குரு கூறிய ‘ஜாக்கிரதை’ என்ற வார்த்தையின் பொருள் அப்போது விளங்கவில்லை. வருடங்கள் கழிந்தன. பல வருடங்கள் கழித்தே ஒரு அடியாருக்கு நம் சற்குரு கூறிய ‘ஜாக்கிரதை’ என்ற சொல்லின் பொருள் புரிய வந்தது.
அது என்னவோ?
பல வருடங்களுக்கு முன் ஒரு ஆங்கிலத் திரைப்படம் வந்தது. அதில் ஒருவனுக்கு திடீரென்று சுவர் போன்ற எந்த ஜடப் பொருளையும் கடந்து செல்லும் ஆற்றல் வந்து விடும். அவன் அந்த ‘நோயை’ சரிப்படுத்த வைத்தியம் செய்ய ஆரம்பித்தான். இடையே ஒரு நடிகையின் வீட்டிலுள்ள சுவர்களைக் கடந்து சென்று பாத்ரூமில் அவள் நிர்வாணமாகக் குளிப்பதை இரசிக்க ஆரம்பித்தான்.
இவ்வாறு நடந்து கொண்டிருக்கும்போது அவன் மேற்கொண்ட வைத்தியமும் பலன் தர ஆரம்பித்தது. ஒரு நாள் அந்த நடிகையின் குளியல் அறையில் மறைவாக நின்று கொண்டிருப்பதை அந்த நடிகை பார்த்து அலற ஆரம்பித்து விட்டாள். அதை அறிந்த அவன் வெகுவிரைவாக அங்கிருந்து சுவர்களைக் கடந்து முன்போல் வெளியே வர ஆரம்பித்தான். ஆனால், அவனுடைய வியாதி அவன் மேற்கொண்ட வைத்தியத்தால் முற்றிலும் குணமாகி, அவன் முன் போல திடமான உடலைத் திரும்பப் பெற்று விட்டதால் அவன் சுவர்களைக் கடக்க முடியாமல் போகவே ஒரு சுவற்றின் குறுக்கே அப்படியே மாட்டிக் கொண்டு விட்டான்!
கணவன் மனைவி ஒருவரோடு ஒருவர் சண்டை போட்டுக் கொண்டு ஒரு நிமிடம் பேசாமல் இருந்தால் கூட ஆறு மணி நேரத்துக்கான கர்மா வந்து சேர்கின்றது. மேலும், கணவனின் வருமானம் குறையும். கணவன் மனைவியை அடித்துத் துன்புறுத்தினால் எட்டு மணி நேரத்துக்கான கர்மா வந்து சேர்கின்றது. ஆன்மீகத்தில் முதல் பாடமே கணவன் மனைவி இடையே சண்டையே வராமல் வாழ வேண்டும் என்பதுதான்.
“இப்படி எல்லாம் நடப்பதற்கு வாய்ப்பு உண்டா?” என்று நம் சற்குருவை ஒரு அடியார் கேட்டபோது, நம் சற்குரு சிரித்துக் கொண்டே, “தாராளமாக இத்தகைய அற்புதங்களை நீங்கள் நிகழ்த்தலாம், நீங்கள் நான்காம் பரிமாணத்தில் சஞ்சரிக்க முடிந்தால்... நான்காம் பரிமாணத்தில் சஞ்சரிப்பது எப்படி என்பதை அடியேன் உங்களுக்கு ஒரு நொடியில் சொல்லிக் கொடுத்து விடுவேன். ஆனால், நீங்கள் அடுத்த நொடி ஏதாவது ஒரு நடிகையின் பாத்ரூமில் சென்று நிற்பீர்கள், அல்லது அவளுடைய பெட்ரூமிற்குள் சென்று உடலுறவு காட்சிகளை இரசிக்கத் தொடங்கி விடுவீர்கள்...”, என்றார் வேடிக்கையாக.
மேற்கூறிய இரண்டு விஷயங்களையும் நீங்கள் நன்கு படித்து சிந்தனை செய்தால் இதைப் பற்றி நீங்கள் புரிந்து கொள்ளலாம். அதாவது, நான்காம் பரிமாணத்திற்கு நாம் சென்றால் நம் உடல் மறைந்து விடும்
நான்காம் பரிமாணத்திற்கு செல்ல கடவுள் நம்பிக்கையோ, குரு நம்பிக்கையோ தேவையில்லை
ஆனால், கடவுள் நம்பிக்கையோ, குரு நம்பிக்கையோ இல்லாமல் ஒருவர் நான்காம் பரிமாணத்தில் சஞ்சரித்தால் அவர் தேவையில்லாத கர்ம வினைகளைப் பலனாகப் பெற்று முடிவில்லாத நரக லோகத்தை அடைய நேரிடும்.
உதாரணமாக, சமீபத்தில் அத்தாழநல்லூர் திருத்தலத்தில் தர்ப்பண வழிபாடுகள் இயற்றிய அடியார்களுக்கு குறைந்தது 100 சித்திகள் கைகூடும் என்பதே நம் சற்குரு தெரிவிக்கும் இரகசியம். ஆனால், நம் அடியார்கள் இந்த சித்திகள் எதையுமே தற்போது பயன்படுத்த முடியாமல் அவர்களை ‘கட்டிப் போட்டு வைத்திருப்பது’ அவர்கள் போதிய அளவு குரு நம்பிக்கை பெறாததே ஆகும். குரு நம்பிக்கை பூரணம் பெறாமல் ஒரு அடியார் ஒரே ஒரு பரிமாணத்தைக் கடந்தால் என்னென்ன இடர்களை எல்லாம் அவர் சந்திக்க நேரிடும் என்று மேலே கண்டோம். அவ்வாறு இருக்கையில் 108 பரிமாணங்கள் கடந்து நிற்கும் நம் சற்குரு அளிக்கும் அனுகிரகங்களை முழுமையாகப் பயன்படுத்திக் கொள்ள நம் அடியார்கள் எந்த அளவிற்குப் பாடுபட வேண்டும்.
மேலே விவரித்த அஷ்டலிங்க வழிபாடு நம் சற்குருவிடம் ஆழ்ந்த நம்பிக்கையை வலுப்படுத்திக் கொள்ள உறுதுணை செய்யும்.

உதாரணமாக, நான்காம் பரிமாணத்திற்கு செல்லும் ஒருவர் அல்லது ஆஸ்ட்ரல் பயணம் புரிய வல்லவர்கள் தங்கள் ஆற்றலை எப்படி அடியார்களின் நன்மைக்காகப் பயன்படுத்திக் கொள்வது? அகண்ட காவிரி பாயும் முசிறியில் விசிறி சித்தர் என்று ஒருவர் இருந்தார். கையில் எப்போதும் விசிறியுடன் ஆடையின்றி நிர்வாணமாகத் திகழ்ந்ததால் அவருக்கு இந்த காரணப் பெயர் ஏற்பட்டது. அக்காலத்தில் முசிறிக்கும் அக்கரையில் உள்ள குளித்தலைக்கும் இடையே ஓட வசதி இருந்தது. கட்டிட பாலம் எதுவும் இல்லாத காலம் அது. காற்று அதிகமானாலோ, மழை பெய்தாலோ ஓடம் ஓடாது நிறுத்தப்பட்டு விடும்.
கர்ப்பிணிப் பெண்களோ அல்லது நோயாளிகளோ அல்லது ஏதாவது ஒரு உண்மையான அவசர காரியத்திற்காக அக்கரைக்கு செல்ல வேண்டும் என்று நினைத்து எவராவது முசிறி ஓடக் கரைக்கு வரும்போது அங்கு ஓடப் பயணம் ரத்து செய்யப்பட்டிருந்தால் விசிறி சித்தர் அவர்களுக்கு உதவுவதற்காக தன்னுடைய விசிறியை காவிரி நதி வெள்ளத்தில் போட்டு விடுவார். சித்தரை நம்பி அந்த விசிறியின் மேல் ஏறி நின்று கொண்டால்போதும், நீராவி படகு போல் அந்த விசிறி நீரைக் கிழித்துக் கொண்டு சென்று மறுகரையில் அந்த விசிறியில் ஏறி வந்தவர்களைக் கரை சேர்த்து விடும். இவ்வாறு விசிறி சித்தரின் சேவையால் பலன் பெற்ற நோயாளிகளும் மக்களும் பக்தர்களும் அனேகர்.
ஒரு முறை இந்த சித்தரின் மகிமை தெரியாத ஒரு காவல்துறை அதிகாரி இவ்வாறு நிர்வாணமாக பைத்தியம் போல் தோன்றும் அந்த சித்தரை காவல் நிலையக் காவலில் வைத்து, ஒரு அறையில் பூட்டி வைத்து விட்டார். மறுநாள் காலையில் பார்த்தால் அந்த சித்தரோ அமைதியாக முசிறி கடைவீதி வழியாக நடந்து சென்று கொண்டிருந்தாராம். இதைக் கண்டு அதிசயித்த அந்த காவல்துறை அதிகாரி இவர் ஒரு பெரிய மகானாக இருக்க வேண்டும் என்று உணர்ந்து தன்னுடைய தவறான செயலுக்காக அந்த சித்தரிடம் மன்னிப்புக் கேட்டுக் கொண்டாராம்.
இப்போது உங்களுக்குச் சட்டென புரிந்திருக்குமே. ஆம், ஒரு மனிதர் நீர் மேல் மிதக்கும் விசிறி மேல் நின்று கொண்டு ஓடும் நீரில் பயணம் செய்வதும், மூடிய சிறைக் கதவுகளின் வழியே வெளியே வந்து சுதந்திரமாக, மற்றவர்களின் சேவைக்காக பொது இடத்தில் உலவுவதும், நான்காம் பரிமாணத்தை பயன்படுத்தும் ஒரு தெய்வீக முறையாகும்.
இங்கு அடியார்களுக்கு ஒரு சந்தேகம் தோன்றலாம். நான்காம் பரிமாணத்தில் சஞ்சரிக்கவல்லவர்கள் ஒருவேளை நம் இல்லத்திற்கு வந்து தேவையில்லாத குழப்பங்களை ஏற்படுத்தி விட்டால் என்ன செய்வது? நம் அடியார்கள் நம் சற்குருவின் நிழற்குடையின் கீழ் உறுதியாக நின்றால் நான்காம் பரிமாணம் என்ன, நாற்பதாம் பரிமாணத்தில் இருப்பவர்கள் கூட நம்மை அசைக்க முடியாது.
உறக்கநிலை விழிப்புணர்வு
இரவு உறங்கும் நேரத்தில் பொதுவாக நாம் ஆஸ்ட்ரலாகச் செல்கிறோம், அதனால் இச்சமயத்தில் ‘ஜாக்கிரதையாக’ செயல்பட முடியாமல் போகிறது என்று சிலர் நினைக்கலாம். உறங்கும்போதும் விழிப்புணர்வு நிலையில் இருப்பதுதான் முன்னேறிய ஒரு சாதகனின் நிலை. இந்த உறக்க நிலை விழிப்புணர்வு அனைவருக்கும் அவசியமே. இந்த உறக்க நிலை விழிப்புணர்வை அதிகப்படுத்தும் ஒரு பயிற்சி முறையை அளிக்கிறார் நம் சற்குரு. தனுர் ஆசனத்தில் இருந்து கொண்டு அதே நிலையில் முன்னும் பின்னுமாக ஆட வேண்டும். கை கால்களுக்கு மிகுந்த சிரமம் கொடுக்காமல் சிறிது சிறிதாக பயிற்சியில் முன்னேறவும். அப்போது இறை நாமம் ஜபித்தல் அவசியம். சத்ய சாய்பாபா கூறுவதுபோல் பிராணாயாமம், ஆசனம் போன்ற எந்த யோகப் பயிற்சியின் போதும் இறை நாமம் அவசியமே. இறை நாமம் இல்லாமல் இத்தகைய பயிற்சிகளில் ஈடுபடும் ஒருவர் மிருகமாகத்தான் கருதப்படுகிறார்.
இத்தகைய விழிப்புணர்வு நிலையில் நிலைக்க ஆரம்ப பயிற்சிகளில் ஈடுபடும் அடியார்கள், தம்மையும் அறியாமல் தூங்கி விடும் சந்தர்ப்பமும் உண்டு. ஒருவேளை அவ்வாறு தூங்கி விட்டால் நம்மை எழுப்பி விட ஒருவரை வைத்துக கொள்ள வேண்டும்.
பாதாளச் சிறையில் அடைபட்டிருக்கும் மகாபலிச் சக்கரவர்த்தி எப்படி கார்த்திகை தீபத்தை ஒட்டி திருஅண்ணாமலைக்கு கிரிவலம் வருவார் என்ற கேள்விக்கு சரியான விடையை அளிக்கும் முதல் அன்பரின் சார்பாக கொண்டராங்கி குசல தீபத்திற்கு ஒரு டின் எண்ணெய் வழங்குவதாக ஒரு அடியார் பரிசு மழையை அறிவித்துள்ளார். முந்துங்கள், உடன் பரிசை வெல்லுங்கள்!
‘நான் எந்நேரமும் விழிப்புணர்வு நிலையிலேயே திகழ வேண்டும்,’ என்ற உணர்வை, நினைவை தீவிரமாக ஏற்று அது எப்போதும் மறைந்து விடாதபடி, அதை மறந்து விடாதபடி மனதின் ஒரு மூலையில் வைத்துக் கொள்ளுங்கள். நீங்கள் வேலையில் ஈடுபட்டு இருக்கும்போது உறக்கம் வருவது போல் தோன்றினால் கை கால்களை தளர்த்தி, ஓய்வாக இருக்க முயலுங்கள். கண்களை மூடிக் கொள்ளுங்கள், கை கால்களை நீட்டிக் கொள்ளுங்கள், ஒரு கிளர்ச்சியூட்டும் காட்சியை மனக் கண் முன் கொண்டு வந்து அதைக் கவனியுங்கள். இறை நாமம் குறைந்தது அரை மணி நேரம், முடிந்தால் சப்தமாகக் கூறுவது அவசியமே.
இவ்வாறு அரை மணி நேரம் பயிற்சி செய்தும் நீங்கள் தூக்க நிலையிலிருந்து முழுவதுமாக விடுபட முடியவில்லை என்றால் எழுந்து மெதுவாக நடக்க ஆரம்பியுங்கள். கடவுள் நாமத்தை இடைவிடாது கூறுங்கள். சிறிது வெந்நீர் அருந்தி விட்டு, விட்ட வேலையைத் தொடர்ந்து நிறைவேற்ற முயலுங்கள். அப்படியும் தூக்கம் உங்கள் கண்களைத் தழுவினால் உறங்கச் சென்று விடுங்கள். 1919, 1920 ஆண்டுகளில் முதல் உலக யுத்த காலத்தில் ஷாலின் (Shaolin) மடாலயங்களில் இத்தகைய உறக்கநிலை விழிப்புணர்வு பயிற்சி அளிக்கப்பட்டது. Forest training என்பதாக அடர்ந்த காடுகளில் இரவு நேரங்களில் தங்கும் பயிற்சியும் இத்தகைய விழிப்புணர்வை மேம்படுத்தும்.
செஞ்சி கொல்லி மலைப் பகுதிகளுக்கு நம் கோவணாண்டிப் பெரியவர் சிறுவனை கூட்டிக் கொண்டு சென்றபோது இவ்வாறு விழிப்புணர்வு பயிற்சிகளை அளித்தார். கொடிய விஷ நாகங்கள் நிறைந்த பல பகுதிகள் அங்கு உண்டு. இருவரும் உறங்கிக் கொண்டு இருக்கும்போது யாருடைய நிழலாவது இவர்கள் மேல் பட்டால் கூட பெரியவர் கண்ணைத் திறந்து பார்ப்பாராம். ஒன்றும் பிரச்னை இல்லை என்று உறுதியான பின்னரே மீண்டும் உறங்கச் செல்வாராம்.
ஒரு முறை யாத்திரையாகச் சென்ற பெரியவரும் சிறுவனும் ஒரு பழங்கால கோயில் மண்டபத்தில் உறங்கிக் கொண்டிருந்தார்களாம். அப்போது நள்ளிரவில் ஒரு நட்டுவாக்கிளி பெரியவர் உடலின் மேல் ஊர்ந்து சென்று கடந்து விட்டு, பின்னர் அருகில் இருக்கும் சிறுவனை நோக்கிச் சென்றதாம். அப்போது பெரியவர், “டேய் இட்லி, நட்டுவாக்கிளி ஒன்று உன் மேல் ஏறிச் செல்ல வருகிறது, அசையாமல் படுத்திரு...” என்று கூறவே பெரியவரின் கருணையால் எப்போதும் விழிப்புணர்வுடன் இருக்கும் சிறுவனும் அமைதியாகப் படுத்து விட்டானாம். அந்த நட்டுவாக்கிளி மேதுவாக ஊர்ந்து சென்று நம் சற்குரு மேல் ஏறி, அவரைக் கடந்து அடுத்து அங்கு படுத்திருந்த ஒரு வழிப்போக்கன் மேல் ஏறியது.
அந்த வழிப்போக்கன் என்ன செய்வான்? ஏதோ ஊர்கிறதே என்று நினைத்து அரைத் தூக்கத்தில் அந்த நட்டுவாக்கிளியைத் தொட்டுப் பார்க்க அது அவனைக் கொட்டி விட்டது. அப்புறம் என்ன ... அவன் குய்யோ முய்யோ என்று கதற ஆரம்பித்து விட்டான். இதுவும் விழிப்புணர்வால் நாம் பெறும் பாதுகாப்புகளில் ஒன்றாகும்.
இத்தகைய உறக்கநிலை விழிப்புணர்வை தீப பிரசாதமாக அளிக்கக் கூடியதே கொண்டராங்கி குசல தீபம். பாக்கியம் உள்ள அடியார்கள் இந்த சந்தர்ப்பத்தை நன்கு பயன்படுத்திக் கொள்ளும்படிக் கேட்டுக் கொள்கிறோம். நல்ல திடகாத்திரமான உடல் உள்ளவர்கள், இளைஞர்கள் தீபத்திற்கான எண்ணெய், திரி போன்றவற்றை தங்கள் தோளில் தலையில் சுமந்து சென்று கொண்டராங்கி தீப கைங்கர்யத்திற்காக அளிப்பதும் இந்த விழிப்புணர்வை மேம்படுத்த உறுதுணை செய்யும்.
அங்கிட்டுமா? எங்கிட்டுமா?
பாதாள லோகத்தில் சிறையில் அடைபட்டிருக்கும் மகாபலி சக்கரவர்த்தி எப்படி வரும் கார்த்திகை தீபத்தின் போது திருஅண்ணாமலையை கிரிவலமாக வருவார் என்ற சற்குருவின் கேள்விக்கு அடியார்கள் பல அற்புதமான விளக்கங்களை அளித்துள்ளனர். அவற்றில் நம் சிந்தனையைத் தூண்டும் இரண்டு பதில்கள்,
1. நான்காம் பரிமாணத்திற்கு சென்று மகாபலி கிரிவலம் வருவார்
2. திருஅண்ணாமலை என்பது அனைத்து லோகங்களில் இருப்பதால் தம்முடைய பாதாள லோகத்திலேயே மகாபலி கிரிவலத்தை மேற்கொண்டு விடுவார்.
நான்காம் பரிமாணத்திற்கு நம்மையும் கூட்டிச் செல்ல பயிற்சி அளிக்க முன்வரும் ஒரு அன்பரைப் பற்றி ஒரு அடியார் தெரிவிக்கிறார். அந்த அடியார் நான்காம் பரிமாணத்திற்குச் செல்ல வல்லவரா இல்லையா என்று ஆராய்ச்சி செய்வது நம் வேலை அல்ல, கற்பனைக் கதை என்று கூறி அவர் திறமையை எள்ளி நகையாடுவதையும் நம் சற்குரு அங்கீகரிப்பதில்லை.
ஒரு முறை ஒரு சிறுவன் ஒரு கிராமத்தில் இருந்தான். சாமியார்களைப் பார்த்தால் அவர்கள் நம்மைக் கடவுளிடம் கூட்டிச் செல்வார்கள் என்று யாரோ கூறியதை அப்படியே நம்பி அவனுக்குத் தெரிந்த ஒரு சாமியாரை, அதாவது ஒரு காவி கட்டிய ஆசாமியை சென்று பார்த்தான். அவரோ கடவுளைப் பற்றி எதுவும் தெரியாத ஒரு போலி சன்னியாசி. அந்த சன்னியாசியின் காலில் விழுந்து தனக்கு கடவுளைக் காட்டும்படி வேண்டினான் சிறுவன். சன்னியாசிக்கு ஒன்றும் புரியவில்லை, அதனால் நிலைமையைச் சமாளிக்க “அங்கிட்டும் இங்கிட்டும் போய்க் கொண்டிரு...” என்று கூறி அந்தச் சிறுவனை அனுப்பி விட்டார்.
சிறுவனுக்கு எல்லையற்ற ஆனந்தம் ... ஒரு ஆலமரத்தடியின் அடியில் அமர்ந்து கொண்டு அந்த சாமியார் கொடுத்த ‘மந்திரத்தை’ வாய்விட்டு, “அங்கிட்டும் இங்கிட்டும் போய்க் கொண்டிரு, அங்கிட்டும் இங்கிட்டும் போய்க் கொண்டிரு ...” என்று சொல்ல ஆரம்பித்தான். உணவு, உறக்கத்தை மறந்தான். வாய் மட்டும் அந்த மந்திரத்தை சொல்லிக் கொண்டே இருந்தது.
நாட்கள் வாரமாக, வாரங்கள் மாதங்களாக பல வருடங்களும் கடந்து விட்டன. அந்தச் சிறுவனும் இளைஞன் என்ற தகுதியையும் அடைந்து விட்டான். அப்போது ஒரு நாள் அவன் சொல்லிக் கொண்டிருந்த மந்திரம் சித்தியாகி விட்டது என்பதை உணர்ந்தான். மந்திரம் சித்தியான அடுத்த விநாடி அவனுக்கு பசி வயிற்றைக் கிள்ள ஆரம்பித்தது.

அளிக்கும் ஸ்ரீஅமிர்தானந்த மயி
தன்னுடைய நீண்ட நாள் தவத்திலிருந்து எழுந்து உணவைத் தேட ஆரம்பித்தான். பல வருடங்கள் ஜபித்த பலனாய் அவன் சொல்லிக் கொண்டிருந்த ‘மந்திரம்’ தன்னையும் அறியாமல் தன்னுள் எழுந்து கொண்டிருந்தது. அப்போது அவன் ஒரு பனை மரத்தைப் பார்க்கவே, அது வேரோடு பிடுங்கிக் கொண்டு வந்து அவன் காலடியில் விழுந்தது. அவனுக்கு ஆச்சரியம் தாங்கவில்லை, மீண்டும் அந்த மரத்தைப் பார்த்து மனதிற்குள் அங்கிட்டும் இங்கிட்டும் போய்க் கொண்டிரு என்று கூறவே அந்த பனை மரம் முன்போல் பழைய இடத்திற்கு சென்று விழுந்தது.
ஆச்சரியத்தின் எல்லைக்கே சென்ற அந்த சிறுவன் தன்னுடைய அகோரப் பசியையும் மறந்து விட்டு இத்தகைய வரப் பிரசாதத்தை தமக்கு அளித்த தன்னுடைய குரு நாதரை முதலில் தேடுவோம் என்று நினைத்து அவரைத் தேடோ தேடு என்று தேட ஆரம்பித்தான். பல வருடங்கள் கழிந்து விட்ட காரணத்தால் அவரைத் தேட மிகுந்த சிரமம் ஏற்பட்டாலும், முடிவில் அவரைத் தேடி அவர் காலில் சாஷ்டாங்கமாக விழுந்து தன்னுடைய தவம், மந்திர சித்தி பற்றி எல்லாம் அவரிடம் விவரிக்க ஆரம்பித்தான்.
அந்தச் சாமியாருக்கு சிறுவனின் இந்த உயர்ந்த நிலை எப்படிப் புரியும்? அதனால் அவர் சிறுவனை நம்பாததுபோல் பேச ஆரம்பிக்கவே சிறுவன் தன்னுடைய கூற்றை மெய்ப்பிப்பதற்காக தூரத்தில் இருந்த ஒரு பாராங்கல்லைப் பார்த்து அங்கிட்டும் இங்கிட்டும் போய்க் கொண்டிரு என்று கூறவே மறுநொடி அது அந்த சாமியாரின் அருகில் வந்து ‘மடேர்’ என்று விழுந்தது. பதறி அடித்துக் கொண்டு எழுந்து அந்த சன்னியாசி சட்டென அந்த சீடனின் காலில் விழுந்து, “அப்பா, நீ சொல்வது எதுவுமே எனக்குப் புரியவில்லை, ஆனால், நீ கூறுவது அனைத்தும் உண்மையே என்று நம்புகிறேன்,” என்றார். சிறுவன் இப்போது உயர்ந்த ஞான நிலையை அடைந்து விட்டதால் தான் அடைய வேண்டிய அடுத்த ஆன்மீக நிலை பற்றி தனக்கு உபதேசிக்க முடியுமா என்பது குறித்து அந்த சன்னியாசியிடம் வினவினான். ஆனால், அந்த சன்னியாசியின் இயலாமையை உண்ர்ந்து கொண்ட ‘சிறுவன்’ அவரை விட்டு விலகி தன்னை வழிநடத்தக் கூடிய ஒரு உத்தம வழிகாட்டியைத் தேட ஆரம்பித்தான்.
இந்நிலையில்தான் அவன் நம் சற்குருவை சென்னையில் சந்தித்து தன்னுடைய பிரார்த்தனையை அவரிடம் தெரிவித்தான். நம் சற்குருவும் அவன் கூறியதை எல்லாம் பொறுமையாக கேட்டு விட்டு, “சரி, தமிழ்நாட்டில் எத்தனை சிவாலயங்கள், இதில் எத்தனை பாடல் பெற்ற தலங்கள், எத்தனை சுயம்பு மூர்த்திகள், எத்தனை பெருமாள் தலங்கள், எத்தனை மங்கள சாசனம் பெற்ற தலங்கள் என்பதைக் கண்டு வா...”, என்று கூறவே ஆஸ்ட்ரலாகச் சென்று ஒரே நொடியில் இந்த விபரங்கள் அனைத்தையும் நம் சற்குருவிடம் தெரிவித்து விட்டான்.
“அடுத்து இதில் எத்தனை திருத்தலங்களில் கும்பாபிஷேக திருப்பணிகள் நடந்து கொண்டிருக்கின்றன என்பதைப் பார்த்து சொல்...”, என்று சொல்லவே அந்த தகவலையும் ஒரே நொடியில் சேகரித்துத் தந்து விட்டான். சிறுவன்.
“இப்போது நீ என்ன செய்கிறாய்..., இவ்வாறு கும்பாபிஷேக திருப்பணிகள் நடக்கும் ஆலயங்களில் எல்லாம் சென்று அமர்ந்து கொள். அங்கு தூண்கள், கல் உலோக விக்ரகங்கள், இரும்பு கர்டர்கள் போன்ற மனிதர்களால் எளிதில் தூக்க முடியாத பொருட்களை உன்னுடைய மந்திர சித்தி மூலம் அவற்றை குறித்த இடங்களுக்கு நகர்த்தி கும்பாபிஷேகத் திருப்பணிகளை சிறப்பாக நிறைவேற்றி ஒவ்வொரு கோயில் கும்பாபிஷேகம் நிறைவேறிய பின்னரும் அடியேனை வந்து பார்... ஆனால், நீதான் இந்தத் திருப்பணிகளை எல்லாம் செய்கிறாய் என்பது யாருக்கும் தெரிய வேண்டாம்... உன்னுடைய சேவை மற்றவர் கண்களிலிருந்து மறைத்து துலங்க வேண்டும்...”, என்று கூறினாராம். சுமார் 30 வருடங்களுக்கு முன் நாம் சற்குருவைப் பார்த்தபோது அந்தச் சிறுவன் 75 கோயில்களில் இவ்வாறு கும்பாபிஷேகத் திருப்பணியை முடித்து விட்டிருந்தான்.
இங்கு நாம் அறிந்து கொள்வது நம் சற்குருவின் கருணை கடாட்சத்தின் ஒரு தூசி தூசியே. எனவே நம் அடியார்கள் இத்தகைய அதீத திறமை பெற்றவர்களைப் பற்றி அறிய நேர்ந்தால் நம் சற்குரு காட்டிய வழியில் சென்று அவர்களையும் இந்த கொண்டராங்கி குசல தீப வைபவத்திற்குத் தாரராளமாக பயன்படுத்திக் கொள்ளலாம்.
வஜ்ர சிலையே வாராய் அருள் தாராய் !

இந்த சோபகிருது வருடம் பரணி தீபத்தின் போது பொலியும் அபூர்வ சக்திகளே வஜ்ர சிலா சக்திகள். இத்தகைய சக்திகளின் பிரவாகத்தை நம் சற்குரு தொட்டுக் காட்டிய வித்தையாக தம் அடியார்களுக்கு ஐயர்மலை திருத்தலத்தில் பல வருடங்களுக்கு முன்னரே தெரிவித்திருந்தாலும் சனிக் கிழமையும் பரணி தீபமும் இணையும் சோபகிருது ஆண்டில் மட்டுமே இத்தகைய பேரழகு சக்திகள் பொங்கிப் பொலிவதால் இதை அடியார்கள் நன்முறையில் பயன்படுத்திக் கொள்ளும்படிக் கேட்டுக் கொள்ளப்படுகிறார்கள்.

வஜ்ர சிலா என்றால் என்ன? ஐயர்மலையில் வைரம் போல் ஜொலிக்கும் பேரழகையே, பெண்களின் பிரகாச சக்திகளையே இவ்வாறு வர்ணிக்கிறார்கள் சித்தர்கள். பரணி தீபமும் சனிக் கிழமையும் இணையும் நாளில் அம்பாள் ஸ்ரீசுரும்பார் குழலியின் திருமேனியில் தோன்றும் சக்திகளே இந்த வஜ்ர சிலா சக்திகள். இன்று நாள் முழுவதும், அதாவது குறைந்தது மூன்று மணி நேரம், கரும்பு சாறு கலந்த தேனால் அம்பாளுக்கு அபிஷேகம் நிறைவேற்றி மாலையில் பரணி தீபத்தை தரிசனம் செய்து பின்னர் ஐயர்மலையை கிரிவலம் வருவதால் வழிபாட்டின் பலன் பூரணம் அடைகிறது.
சமுதாயத்தில் நிராகரிக்கப்பட்ட பெண்கள், உதாரணமாக ஊனமுற்ற பெண்கள், ஊமை, குருடர், செவிடர்கள் போன்றோர், உடல் உறுப்புகளை இயற்கையாகவோ விபத்துக்களாலோ இழந்தோர், மிகவும் ஒல்லியாகவோ, குண்டாகவோ இருக்கும் பெண்கள் போன்ற அனைவருமே மேற்கண்ட வழிபாடுகளால் தக்க துணை அமையப் பெறுவர். பெண்களுக்கே இந்த வஜ்ர சிலா சக்திகள் துரிதமாகப் பலன் நல்கும் என்றாலும் தங்கள் நம்பிக்கையின் ஆழத்தைப் பொறுத்து ஆண்களும் இத்தகைய வழிபாடுகளால் நற்பலன் பெறுவர்.
மேற்கூறிய வழிபாட்டின் நிறைவில் சுமங்கலிகளுக்கு கண்ணாடி, வளையல், தேங்காய், பழம், வெற்றிலை, பூச்சரம் போன்ற குறைந்தது ஒன்பது மங்கலப் பொருட்களை குறைந்தது 12 சுமங்கலிகளுக்கு தானமாக அளித்தல் சிறப்பாகும்.
ஐயர்மலையில் 108 வஜ்ர சிலா தரிசனங்கள் உண்டு. ஆனால், இந்த தரிசனங்கள் வஜ்ர யோகம் கூடும் நாட்களில் மட்டுமே கண்களுக்குப் புலனாகும். நம்முடைய சற்குருவோ அல்லது மூதாதையர்களோ இந்த வஜ்ர தரிசனங்களை நோக்கி நாம் வணங்கும் வண்ணம் நமக்கு வழிகாட்டுதலை, அனுகிரகத்தை அளிப்பார்கள். இங்கு அடியார்களின் நன்மைக்காக ஒரே ஒரு தரிசனம் மட்டும் அளிக்கப்பட்டுள்ளது.
திருமணம் தடங்கல்களாக உள்ள பெண்கள் மேற்கூறிய நாளில் ஐயல்மலையை கிரிவலம் வந்து கிரிவலப் பாதையில் குறைந்தது 21 வஜ்ர சிலா தரிசனங்களைப் பெறுதல் வேண்டும். ஆனால், இந்த தரிசனங்களை எப்படி அறிந்து கொள்வது? நம்பிக்கையே மாமருந்தாகும். தங்கள் சற்குருவை, மூதாதையர்களை நம்பி 21 முறை ஐயர் மலை தரிசனங்களில் சாஷ்டாங்கமாக விழுந்து வணங்கி வருதால் அவரவர் பித்ரு மூர்த்திகளின் ஆசியால் அவர்களின் இந்த நமஸ்காரம் சரியான வஜ்ர சிலா தரிசனத்தில்தான் அமையும். பெண்கள் பஞ்ச அங்க நமஸ்காரம் நிறைவேற்றலாம். ஒரு வேளை ஐயர் மலையை வலம் வந்து இத்தகைய நமஸ்காரங்களை நிறைவேற்றிக் கொண்டு வரும்போது 21 நமஸ்காரங்கள் நிறைவேறும் முன்னேரே கிரிவலம் ஒரு சுற்று முடிந்து விடலாம்.
அதனால் எண்ணிக்கையை சரி செய்வதற்காக மீண்டும் வந்த பாதையில் திரும்பி செல்லாமல், அடுத்த சுற்று கிரிவலத்தை ஆரம்பித்து எண்ணிக்கையை பூர்த்து செய்து கொள்ளவும். இதுவும் நம் பூர்வ ஜன்ம வினைப் பயனாய் அமைவதுதான்.
ஆனா ஆவன்னா!
திருமணமான ஆண்களும் பெண்களும் பஞ்ச கச்ச முறை வேட்டி, இடுப்பில் கட்டிய துண்டு, மடிசார் புடவை சகிதம் கிரிவலம் வந்து மேற்கண்ட முறையில் 21 வஜ்ர சிலா தரிசனங்களைப் பெறுவதால் அவர்கள் உறவுக் குழப்பங்களிலிருந்து விடுதலை பெறுவார்கள். பெரும்பாலும் ஒரு மனிதனுடைய வாழ்வில் ஒரே ஒரு முறை கிட்டும் அரிய சந்தர்ப்பம் இது.
உறவுக் குழப்பம் என்றால் என்ன?
பகவான் ரஜ்னீஷ் கூறிய ஒரு ‘கதை’ இது. ஒரு ஆஸ்ரமத்தில் 80 வயதான ஒரு சன்னியாசி இருந்தார். அப்பழுக்கற்ற பிரம்மசர்ய வாழ்வை நடத்தியவர். ஒரு நாள் அதிக காய்ச்சல் தோன்றி உடம்பு முழுவதும் வலிக்க ஆரம்பித்து விட்டது. நிலைமையை அவரால் சமாளிக்க முடியவில்லை. அங்கிருந்த ஒரு இளவயது பெண் சன்னியாசியை அழைத்து தன்னுடைய உடம்பை வலி தீர பிடித்து விடும்படிக் கூறினார்.
அந்தப் பெண் சன்னியாசியும் அவ்வாறே சேவையைத் தொடர்ந்தாள், ஆனால், அது வேறு விதமாக முடிந்து விட்டது.
இரண்டாவது உதாரணம்...
விவசாயி ஒருவர் இருந்தார். அவருக்கு காய்ச்சல் ஏற்பட்டு கடுமையாக உடல் வலிக்க ஆரம்பித்தது. மகன் வயல் வேலைக்குச் சென்று விட்டதால் வீட்டில் இருந்த மருமகளை அழைத்து தலையில், உடலில் தைலம் சிறிது தடவி விடும்படிக் கூறவே, அந்த மருமகளும் மாமனாருக்கு சேவை செய்ய ஆரம்பித்தாள். ஒன்றிரண்டு நாட்களுக்கு நல்ல விதமாக நிறைவேறிய இந்த சேவை, இறுதியில் வேறு விதமாக முடிந்து விட்டது.
இதுவே உறவுக் குழப்பம் என்பது. புனிதமான குரு சிஷ்யை என்ற உறவும், மாமனார் மருமகள் என்ற உயர்ந்த உறவும் கணவன் மனைவி என்ற உறவுக்குத் தாழ்ந்து விட்டது. இலை மறைக் காயாய், வெளியே சொல்ல முடியாத இத்தகைய உறவுக் குழப்பங்களால் பாதிக்கபட்ட குடும்பங்கள் எத்தனை, எத்தனையோ, மறைந்த உயிர்கள் எத்தனையோ?
எதிர்காலத்தில் அதிக எண்ணிக்கையில் தோன்றவிருக்கும் இத்தகைய குழப்பங்களை ‘பூவிற்குள் பூகம்பம்’ என்று வர்ணிக்கிறார்கள் சித்தர்கள். குறைந்தது 100 விதமான ஆன்மீக விளக்கங்களை அளிக்கக் கூடியதே இந்த சித்த வாக்கியம்.
இத்தகைய தவறுகளுக்கும் பிராயசித்தம் நல்குகிறார் நம் சற்குரு. வாழ்வில் ஒரு முறையே சோபகிருது வருடத்தில் கிட்டும் இந்த வாய்ப்பை நன்முறையில் பயன்படுத்திக் கொள்ளும்படி அடியார்கள் கேட்டுக் கொள்கிறார்கள். தங்கள் குடும்பத்தில் இத்தகைய குழப்பங்கள் இல்லாவிட்டாலும் இதனால் பாதிக்கப்பட்டவர்களுக்கு உதவும் பொருட்டும், தங்கள் எதிர்கால பாதுகாப்பை கருத்தில் கொண்டும் இத்தகைய வழிபாடுகளை அனைவரும் இயற்றுதல் சிறப்பே.
இந்த பரணி தீப நாளில் வழிபாட்டை, கிரிவலத்தை ஆரம்பித்து தொடர்ந்து தங்கள் பிரச்னை தீரும் வரை வெள்ளி அல்லது சனிக் கிழமைகளில் வழிபாட்டைத் தொடர வேண்டும். வஜ்ர யோக நாளில் தொடர்ந்து ஒரு யுக காலத்திற்கு ஐயர்மலை ஈசனை வலம் வந்து வணங்கி பக்தர்களுக்கு வஜ்ர சக்திகளை அளிக்க ஈசனருள் பெற்ற அன்னையே சென்னை ராயபுரத்தில் துலங்கும் ஸ்ரீவஜ்ரேஸ்வரி அம்மன் ஆவாள். அதனால் மேற்கூறிய வழிபாடுகள் எத்தகைய சூழ்நிலையிலும் மயங்காத வஜ்ரம் போன்ற மன உறுதியை ஆண்களுக்கும் பெண்களுக்கும் அளிக்கும் என்பது உறுதி.

ஒரு முறை நம் சற்குரு ஆஸ்ரமத்தில் மௌனமாக அமர்ந்திருந்தார். சற்று நேரம் கழித்து நம் சற்குருவின் அன்பு மொழிகள் அங்கு எதிரொலிக்க ஆரம்பித்தன. “சுமார் ஐம்பது ஆண்டுகளுக்குப் பின்னர் கம்ப்யூட்டர் துறையில் இன்னும் அதிக அளவில் முன்னேற்றம் ஏற்பட்டு விடும். எங்கோ தொலைவிலுள்ள ஒரு நாட்டிலிருந்து நம் நாட்டில் உள்ள ஒருவருக்கு ஒருவர் ஒரு செய்தி அனுப்புவார். அவர் அந்தச் செய்தி என்னவென்று பார்க்க முயற்சி செய்யும்போது சக்தி வாய்ந்த லேசர் ஒளியை நம் நாட்டவர் மேல் பாய்ச்சி அவரைக் கொன்று விடும் வாய்ப்பு உள்ளது. இவ்வாறு 50 வருடங்களுக்குப் பின் இப்பூமியில் இருக்கும் நம் அடியார்களை, அடியார்களின் சந்ததிகளைக் காப்பாற்றும் பொறுப்பு அடியேனுக்கு இருக்கிறது அல்லவா? அதனால் அத்தகைய சூழ்நிலையில் நம் அடியார்களை எப்படிக் காப்பது என்பது பற்றித்தான் தற்போது சிந்தித்துக் கொண்டிருக்கிறேன்...” என்றார் தாயினும் சாலப் பரிந்து.
நம் சற்குரு அளிக்கும் இத்தகைய பாதுகாப்பு கவசங்களில் ஒன்றே நாம் இங்கு மேலே காணும் வஜ்ர சிலா தரிசனம். உதாரணத்திற்காக அளிக்கப்பட்ட இது போன்ற தரிசனங்கள் எப்படி நம் உயிரைக் காக்கும் என்று நீங்கள் பிரமிக்கலாம். இந்த வஜ்ர சிலா தரிசனங்களின் உயிர் காக்கும் சக்தியை நாம் இங்கு விளக்கப் புகுந்தால் அதை வைத்து மேலும் பல அபாயங்களை விஷமிகள் உருவாக்கிவிடும் வாய்ப்பு உள்ளதால் வஜ்ர சிலா தரிசனங்களின் மகிமையை இதற்கு மேல் தெளிவாக வெளிப்படுத்த நம் சற்குரு தயாராக இல்லை.
நம் சற்குரு மேல் பூரண நம்பிக்கை கொண்டவர்கள் தொடர்ந்து இந்த வஜ்ர சிலா தரிசனங்களைப் பற்றி ஆத்ம விசாரம் செய்து வந்தால் அவர்களாகவே சிறிது சிறிதாக இதன் மகிமையை உணர்ந்து பயன்படுத்திக் கொள்வார்கள். இவ்வாறு கம்ப்யூட்டர் துறையில் உள்ளோர், வஜ்ர சிலா தரிசனங்களை பாதுகாப்பிற்காக பயன்படுத்த விரும்புபவர்கள் வரும் புத்தாண்டு முதலாக ஆரம்பித்து அடுத்து வரும் ஒவ்வொரு செவ்வாய்க் கிழமையும் ஐயர் மலையை கிரிவலம் வந்து தொடர்ந்து ஒன்பது செவ்வாய்க் கிழமைகளில் கிரிவலம் வந்து ஈசனை வழிபடுதல் நலம். இதுவே உங்களுக்கும் உங்கள் சந்ததிகளுக்கும் பெற்றுத் தரக் கூடிய உண்மையான ‘ஆயுள் காப்பீடு’.
பொதுநல சேவையாக இந்த கிரிவலத்தை ஆற்ற விரும்பும் அடியார்கள் ஒவ்வொரு செவ்வாய்க் கிழமையும் ஒன்பது முறைக்குக் குறையாமல் வலம் வந்து வணங்குதல் சிறப்பு.
சாதகனின் தோல்வியே சற்குருவின் வெற்றி!
சற்குரு தம் சீடனை என்றென்றும் கைவிட மாட்டார் என்பதற்கு மாறாக ‘கை விட்டும் தன் சீடனைக் காப்பாற்றுவார்’என்பதை நாம் ஏற்கனவே கண்டோம். இது என்றோ நடந்த குரு அனுபூதி அல்ல, இத்தகைய நிகழ்ச்சிகள் இன்றும் தொடரும் இனிய வைபவமே என்பதை விளக்குவதே கீழ்க்கண்ட நிகழ்ச்சியாகும்.
ஒரு முறை நம் சற்குரு அடியார் ஒருவரின் இல்லத்திற்கு வந்திருந்தார். அப்போது அந்த அடியாரின் உறவினர் நம் சற்குருவின் தரிசனத்திற்காக வந்திருந்தார். அவருக்கு இன்னும் திருமணமாகவில்லை. தனக்கு வரவேண்டிய மனைவி எப்படி இருப்பாள், அவளிடம் தான் விரும்பும் தகுதிகள் என்ன என்று ஒரு சாதாரண மனிதன் எதிர்பார்க்கும் கேள்வியைக் கூட அவர் நம் சற்குருவிடம் கேட்கவில்லை.
அவருடைய ஒரே குறிக்கோள் தான் எப்படி நிறைய பணம் சம்பாதிப்பது என்பதையே சுற்றி சுற்றி வந்து வெவ்வேறு கேள்விகளைக் கேட்டுக் கொண்டிருந்தார். நம் சற்குருவோ அந்த சாதகர் எப்படி தன்னுடைய தாய் தந்தைக்கு சேவை செய்வது என்பது பற்றியே பல விதங்களில், பல கோணங்களில் சுமார் இரண்டு மணி நேரம் விளக்கிக் கொண்டிருந்தார்.

சற்குருவின் அருகிலிருந்த நம் அடியார்களுக்கோ ஒரே குழப்பம், “என்ன இது, நம் சற்குரு இறைவனைப் பற்றி, இறை வழிபாட்டைப் பற்றி எதுவுமே பேசாமல் தாய் தந்தைக்கு மகன் ஆற்ற வேண்டிய சேவையைப் பற்றி மட்டுமே இரண்டு மணி நேரம் பேசிக் கொண்டிருக்கிறாரே...”, என்று. அந்த சாதகர் விடை பெற்றுப் போன பின், “என்ன சார், அடியேன் இறைவனைப் பற்றி எதுவுமே பேசாமல் தந்தைக்கு மகன் ஆற்ற வேண்டிய சேவையைப் பற்றி மட்டுமே பேசிக் கொண்டிருக்கிறேனே என்பதுதான் உங்கள் சந்தேகம்...,” என்று கேட்டார்.
அனைத்தையும் அறிந்த சற்குரு அடியார்கள் எண்ணத்தை அறியாதவரா என்ன? சற்குருவின் கூற்று சரியே என்பதை ஆமோதித்து அடியார்கள் தலையசைத்தனர். சற்குரு தொடர்ந்தார். “வெறுமனே இறைவனைப் பற்றி பேசுவது மட்டும் ஆன்மீகம் ஆகிவிடாது. யார் எதை ஏற்றுக் கொள்வார்கள் என்பதை அறிந்து அதை அவர்களுக்கு அளிப்பதுதான் ஆன்மீகம். இங்கு வந்த சாதகருக்கு கடவுள் மேல் துளி நாட்டம் கூட கிடையாது, அப்படி இருக்கும்போது அவருக்கு கடவுள் பக்தி என்பது உடனே காய்த்து தொங்கி விடுமா என்ன? நிச்சயம், அது நடக்காது.”
“முதலில் இந்த சாதகனுக்கு அம்மா அப்பாதான் தெய்வம், அவர்களுக்கு ஆற்றும் சேவைதான் உண்மையான சேவை என்பதை உணர்த்த வேண்டும். அதற்கு மட்டுமே அடியேன் இரண்டு மணி நேரம் செலவு செய்தேன். இந்த அடிப்படை உண்மையை உணர்வதற்குக் கூட ஒரு சாதகனுக்கு எத்தனை ஆண்டுகள், எத்தனை பிறவிகள் தேவைப்படும் என்று தெரியாது. நீங்கள் எளிதில் இறை பக்தியைப் பெற்று விட்டதால் உங்களுக்கு இறை பக்தியின் அருமை தெரியவில்லை...,” என்றார்.
நம் சற்குரு தம் பூதஉடலை விட்டு மறைந்த சில வருடங்கள் கழித்துதான் சற்குருவின் உரையின் ஆழ்ந்த அர்த்தத்தை அடியார்கள் ஓரளவு உணர முடிந்தது.
எப்படி?

ஸ்ரீகாஞ்சி கனிந்த கனி
சில ஆண்டுகள் கழித்து அந்த சாதகருக்கு திருமணமாகி குழந்தைகள் எல்லாம் பிறந்து விட்டனர். அவருடைய தந்தையும் காலமாகி விட்டார். அவருடைய தாயின் உடல் நிலை மோசமாகி விட்டது, படுத்த படுக்கை ஆகி விட்டார். இந்நிலையில் தன்னுடைய அருமை தாயை ‘நல்ல விதமாக’ வழியனுப்ப நினைத்த அவர் தாய்க்கு விளக்கெண்ணெய் நிறைய தேய்த்து குளிப்பாட்டி விட்டு, அருந்துவதற்கு இளநீரும் அளித்தார். பொதுவாக, நாம் சினிமா நாடகங்களில் பார்க்கும் இத்தகைய ‘சிகிச்சை’ கூட அவர் தாய் விஷயத்தில் பலனளிக்கவில்லை. சில நாட்கள் கழித்து, வேறு ஒரு உறவினர் முன் வந்து அந்த தாயை ஒரு தனியார் மருத்துவமனையில் சேர்த்த பின்னரே அங்கே அவர் தன் இறுதி மூச்சை விட்டார்.
“ஒருவரை சீடன் என்று ஏற்றுக் கொண்டு விட்டால் இறுதி வரை நாங்கள் அவரை காப்பாற்ற அனைத்து முயற்சிகளையும் எடுத்துக் கொண்டுதான் இருப்போம்...” என்ற நம் சற்குருவின் இந்த வார்த்தைகளை நினைக்கும்போது கண்ணீர் விடாத ஒரு சீடன் இருக்க முடியுமா? அந்தச் சாதகர் நினைத்தபடி அவருடைய தாய் ‘இளநீர் சிகிச்சையில்’ இறந்திருந்தால் அவர் பாதாள நரகத்தில் எத்தனை கோடி ஆண்டுகள் வாடி வதங்க வேண்டி இருக்கும் என்பதை நம் சற்குருவைத் தவிர வேறு யாரால் கூற இயலும். இத்தகைய வேதனையை தம் சாதகன் அடையக் கூடாது என்பதற்காகவே பாடுபட்டு அந்த சீடனுக்கு ‘தோல்வியைத் தேடிக்’ கொடுத்தவரே நம் சற்குரு.
என்றென்றும் வாழ்க வளர்க நம் சற்குருவின் புகழ்!
இவ்வாறு தாய், தந்தை, கணவன், மனைவி, மக்கள் போன்ற நெருங்கிய உறவினர்களையும் கொல்லத் துணியும் அளவிற்கு செயல்படுபவர்கள் தங்கள் தவறுகளை உணர்ந்து தக்க பிராயசித்தம் நாடினால் அவர்களுக்கும் உதவத் தயாராக இருப்பதே நம் சற்குருவின் கருணை. கொண்டராங்கி தீப கைங்கர்யத்திற்கு குறைந்தது மூன்று டின் எண்ணெய் அளித்தலால் அவர்களுடைய தவறுகளுக்கு பிராயசித்தம் உரிய நல்லவர்களால் ஏதாவது ஒரு வடிவில் அவர்களுக்கு கிட்டும். நன்றாக மனதில் கொள்ளவும், கடுமையான தவறுகளுக்கு தீப எண்ணெய் தானம் எக்காலத்தும் உரிய பிராயச் சித்தம் ஆக முடியாது. எத்தகைய கொடுமையான தவறுகளுக்கும் பிராயசித்தம் நல்கும் நல்ல உள்ளங்களை நாம் அடையாளம் கண்டு கொள்ள மட்டுமே இத்தகைய எண்ணெய் தானம் உதவி செய்யும்.
உதாரணமாக, செவ்வாய்க் கிழமை, காஞ்சி பெரியவரின் ஜன்ம நட்சத்திரமான அனுஷ நட்சத்திரம், கோவர்த்தன பூசை, மூன்றாம் பிறை சந்திர தரிசன நாள், சூர சம்ஹார விரத ஆரம்பம் இவை அனைத்தும் சேரும் நாளில் முருக வாகனமான மயில் வர்ஷித்த ஒரு மயிலிறகையே இங்கு காஞ்சி மகானின் திருஉருவத்தை அலங்கரிப்பதாக அளித்துள்ளோம். இத்தகைய நிமித்தங்கள் சேரும் நாளில் நீங்கள் ஒருவரை மனதில் குருவாக வரித்திருந்தால் அவர் நிச்சயமாக உங்களுக்கு உத்தம சற்குருவாய் அமைந்து உங்கள் வாழ்க்கையை பிரகாசிக்கச் செய்வார் என்பதே இத்தகைய நிமித்தங்கள் உறுதி செய்யும் ஆன்மீக விளக்கமாகும்.
பெருமாள்தான் சிவன்!
மகாபலி சக்கரவர்த்தி எப்படி திருஅண்ணாமலைக்கு கிரிவலம் வருவார் என்ற கேள்விக்கு இன்னும் இரண்டு பதில்களை அடியார்கள்அளித்துள்ளனர். இந்த பதில்கள் நம் சற்குரு கூறும் சரியான பதில்களாக இல்லை என்றாலும் இந்த பதில்கள் ஆன்மீக கருத்துக்களை உள்ளடக்கியதால் இவற்றை நீங்களும் தெரிந்து கொள்வது தவறு கிடையாது.
1. மகாபலி சக்ரவர்த்தியால் பாதாள லோகத்தை விட்டு வெளி வர முடியாத சூழ்நிலையில் மகாபலி சக்ரவர்த்திக்கு தினமும் பாதாள லோகத்திற்கு வருகை தந்து தரிசனம் தரும் நாராயண பெருமாளை திருஅண்ணாமலையாராக பாவித்து அவரை வலம் வருகிறார்.
2. ஒருமுறை அர்ஜுனன் சிவ பூஜை செய்வதற்கு தயாராக இருந்த நிலையில் கிருஷ்ணரே தன்னை சிவனாக பாவித்து அர்ஜுனனை பூஜை செய்யும்படிக் கூறினார். அர்ஜுனன் இதை நம்ப முடியாமல் அரைகுறை மனதுடன் கிருஷ்ணனுக்கு அர்ச்சனை செய்ய, பின்னர் கிருஷ்ண பரமாத்மாவுடன் திருக்கயிலாயம் சென்ற போது அங்கே தான் கிருஷ்ண பகவானுக்கு அர்ப்பணித்த மலர்கள் சிவபெருமானின் திருவடிகளை அலங்கரிப்பதைக் கண்டு அர்ச்சுனன் பேராச்சரியம் அடைந்தான்.

மஞ்சளில் மறையுமே!
நம் சற்குருவிடம் ஒரு அடியார் வந்தார். “வாத்யாரே, அடியேன் வீட்டிற்கு ஒரு பூனை அடிக்கடி வந்து வாந்தி எடுத்து விட்டுப் போகிறது. அதனால் வீட்டில் உள்ளவர்களுக்கு ஏகப்பட்ட வேலை வந்து விடுகிறது. இதற்கு என்ன செய்வதென்று தெரியவில்லை...”, என்று மிகவும் சலித்துப் போன குரலில் பேச ஆரம்பித்தார். அவர் கூறியது அனைத்தையும் பொறுமையாக கேட்டுக் கொண்டு வந்த நம் சற்குரு சற்று நேரம் கழித்து, “அந்தப் பூனை ஏன் சார், உங்கள் வீட்டிற்கே வருகிறது, அதற்கு வேறு இடம் கிடைக்கவில்லையா?” என்று ‘அப்பாவித்தனமாகக்’ கேட்டார். இதற்கு அந்த அடியார் என்ன பதில் கூற முடியும்?
நம் சற்குரு சிரித்துக் கொண்டே, “நீங்கள் பூனையின் செயல்பாடுகள் பற்றி கூர்ந்து கவனிப்பதில்லை, அது யார் குற்றம்... சரி போகட்டும்... பூனைகள் நட்டுவாக்கிளி, பாம்பு போன்ற விஷ ஜீவன்களையும் கடித்து விழுங்கக் கூடியவை. அவ்வாறு விழுங்கும்போது பூனைகளை மட்டும் இந்த விஷ ஜந்துக்களில் உள்ள விஷம் பாதிப்பதில்லையா என்ன? நிச்சயம் பூனைகளையும் விஷம் பாதிக்கும். இவ்வாறு விஷத்தின் அளவு மீறும்போது அவை இந்த விஷத்தை முறிப்பதற்கான சக்தி வாய்ந்த மூலிகைகளை உட்கொள்ளுகின்றன, அவ்வாறு ஏற்கும் நிவாரண மூலிகைகளை ஓரளவு ஏற்ற பின் அவற்றை வாந்தியாக வெளியே கக்கும்போது வெளி காற்று மண்டலமும் இத்தகைய மூலிகைகளால் சுத்தம் செய்யப்படுகின்றது. உதாரணமாக, உங்கள் மனைவி இந்த வாந்தியை சுத்தம் செய்யும் பணியில் ஈடுபடும்போது அவளையும் அறியாமல் இந்த மூலிகை கலவையில் இருந்து வெளியாகும் சில ஔஷத சக்திகளை தன் மூச்சுக் காற்றின் மூலம் எடுத்துக் கொள்கிறாள், அதனால் அவளுடைய உடலும் மனமும், அவளுடன் உறவு கொள்ளும் உங்கள் மனமும் உடலும் தூய்மை ஆகின்றது...”, என்றாரே பார்க்கலாம். இதன் ஆழ்ந்த பொருளை உணர்ந்த நம் அடியாரின் பார்வைக் கோணம் இப்போது எப்படி மாறி இருக்கும் என்பதை நீங்கள் ஊகித்துக் கொள்ளலாமே.
கருப்பு என்பது சனீஸ்வரருக்கு உரித்தான வண்ணம், சிவப்பு செவ்வாய் பகவானுக்கு உரித்தான வண்ணம். இந்த இரண்டும் சேர்ந்தால் அது அதீத தீய சக்திகளை சமுதாயத்தில் உருவாக்கும் என்பதால்தான் அந்த நிறங்கள் சேர்ந்த ஆடைகளை அணிய வேண்டாம் என்று நம் சற்குரு நம்மை வழிநடத்துகிறார். அத்தகைய எதிர்மறை சக்திகள் வாய்ந்த வண்டுகள் இயற்கையாக பரவெளியில் உலவும்போது குருவிற்கு உரித்தான மஞ்சள் மலர் சக்திகளால் பரவெளியை தூய்மைப்படுத்தி சமுதாயத்தை காக்கிறார் என்பதே குருமார்கள், மனித சமுதாயம் அறியாது வர்ஷிக்கும் பல நல்லெண்ணக் கதிர்களில் ஒன்றாகும்.

அண்டத்தில் உள்ளது பிண்டத்தில் என்பார்கள். நம் உடலுக்கு வெளியில் திருஅண்ணாமலை இருக்கிறது என்றால் நம் உடலுக்குள்ளும் அண்ணாமலை இருக்கத்தானே செய்யும்? அந்த அண்ணாமலையையே ஆத்ம வலமாக வருகிறார் மகாபலி என்று ஒரு அற்புத பதிலை பல அடியார்களும் அளித்துள்ளனர்.
இந்த பதில் சரிதானா? இது பற்றி நம் சற்குரு தெரிவிப்பதென்ன?
இது போன்ற ஒரு கேள்வியை பிரபலமான ஒரு குரு மகா சன்னிதானம் நம் சற்குருவிடம் பல்லாண்டுகளுக்கு முன் கேட்டார். “இறைவன் அனைவர் உள்ளும் இருக்கிறார் என்று சொல்கிறார்களே, அப்படியானால் நாம் ஏன் கோயிலுக்குச் சென்று இறைவனை வணங்க வேண்டும்?”. இதுவே அந்த சன்னிதானத்தின் கேள்வி.
நம் சற்குரு புன்சிரிப்புடன், “அஹம் பிரம்மாஸ்மி”, அதாவது நான்தான் பரபிரம்மம் என்று வேதம் சொல்கிறது. வேதத்தின் கூற்று எப்படி பொய்யாக இருக்க முடியும். ஆனால், வேதத்தை முழுமையாகப் புரிந்து கொண்ட உத்தமர்களே இவ்வாறு கூற முடியும். இவ்வாறு நான்தான் பரபிரம்மம் என்று கூறினால் அடியேன் ஒரு உலகத்தையே உண்டாக்க வேண்டும், அதை ஒரு நொடியில் அழிக்கும் சக்தி உள்ளவனாகவும் இருக்க வேண்டும். இது எந்த மனிதனாலும் சாதிக்கக் கூடியது இல்லை, அந்நிலையில் சாதாரண மனிதன் எப்படி இறைவன் என்று தன்னைக் கூறிக் கொள்ள முடியும்?”
இது போல் நம் அடியார் ஒரு கேள்வி கேட்டார். ஒரு மைலுக்கு எத்தனை கிலோ மீட்டர்... என்று? இந்தக் கேள்வியைப் பார்த்தவுடன் நம் மனதில் தோன்றும் எண்ணம், “எந்த ஆரம்பப் பள்ளி வாய்ப்பாட்டிலும் இதன் விளக்கம் கிட்டுமே, இதை ஏன் ஒரு ஆன்மீகத் தளத்தில் கேட்க வேண்டும்?” சற்றே ஆழ்ந்து சிந்தித்தால் இதன் உண்மைப் பொருளை நாம் கண்டு கொள்ள இயலும். ஒரு மைலுக்கு 1.6 கிலோ மீட்டர் என்று விளக்கும் ஒரு மனிதனால் ஒரு மைல் அல்லது கிலோ மீட்டர் தூரத்திற்கு நடந்து சென்று சரியான சாலை நீளத்தை அளந்து காட்ட முடியுமா? 12 அங்குலம் ஒரு அடி என்று விளக்கும் மனிதன் துல்லியமாக அந்த நீளத்தை தன் கையால் அளந்து காட்ட முடியுமா?
நிச்சயமாக முடியாது! ஏன், இறைவன் இந்த அடிப்படை அறிவைக் கூட வைத்து மனிதனைப் படைக்கவில்லையா என்ன? எல்லா மனிதர்களுக்கும் இந்த அடிப்படை அறிவு அவர்களுக்குள் உறைந்துதான் கிடக்கிறது, ஆனால், அதை வெளிக் கொண்டு வந்து மக்கள் பயன்பாட்டிற்காக புலப்படுத்தும் மார்க்கங்களைக் கூறும் மகான்களை, உத்தம குருமார்களை நாடி அவர்கள் நிழலில் தங்கி அவர்களின் நல்லறிவை மக்கள் பெறாததே காரணம் ஆகும்.
கொண்டராங்கி குசல தீபம் என்று நாம் கூறும் போது அந்த தீபத்தின் உள்ளே அமர்ந்து சுற்றிலும் ஒளி வியாபித்து இருப்பதாக தொடர்ந்து தியானம் செய்து வருவதால் இத்தகைய ‘அண்டத்தில் உள்ளது பிண்டத்திலும்...’ என்ற அடிப்படை ஆன்மீக அறிவு சிறிது சிறிதாக விருத்தியாகும்.
கைமாகறல் நாயனார்
சோபகிருது வருட திருக்கார்த்திகை தீபத்தை கொண்டராங்கி திருமலையில் ஏற்றி வழிபடும்படி நம் சற்குருவின் அறிவுரையை சிரமேற்கொண்டு அடியார்கள் இதற்கான முயற்சிகளை மேற்கொண்டு வருவது நீங்கள் அறிந்ததே. தீபம் ஏற்றுவதற்காக சுமார் 200 கிலோ எடையுள்ள இரும்பு கொப்பரையை 3000 அடி உயரமுள்ள கொண்டராங்கி மலை மேல் ஏற்றுவது என்பது அவ்வளவு எளிதான காரியமா என்ன? இதற்கான முயற்சிகளை நம் அடியார்கள் மேற்கொண்டாலும் இதில் மறைந்தருளும் குருமார்களின் சேவையைப் பற்றி நாம் அறிந்து கொள்வதும் அவசியமே.

‘அங்கிட்டும் இங்கிட்டும் போய்க் கொண்டிரு’ என்ற சாதாரண வார்த்தைகளையே குரு உபதேசப் பரல்களாக ஏற்று அதை ஜபிப்பதிலேயே இலயித்து கரைசேர்ந்த அடியாரே கொண்டராங்கி திருமலையில் கொப்பரையை ஏற்றும் திருப்பணியில் மறைமுகமாக ஈடுபட்டுள்ளார் என்று தெரிவிக்கிறார் நம் சற்குரு. அவருடைய திருநாமமே கைமாகறல் நாயனார் என்பதாகும். நம் சற்குருவால் 1200வது நாயன்மார் சிவனடியாராக அங்கீகரிக்கப்பட்டவரே கைமாகறல் நாயனார் ஆவார்.
மாகறல் என்றால் உடும்பு என்று பொருள். கை மாகறல் என்றால் இந்த நாயனாருடைய கைப்பிடி உடும்பு போல் அவ்வளவு வலிமை உடையதாக இருப்பதால் இவருக்கு இத்தகைய ஒரு காரணப் பெயர் அமைந்தது. ஆம், கும்பாபிஷேகம் போன்ற திருப்பணிகளில் கனமான கர்டர்கள், தூண்கள், பாறைகள் போன்றவற்றை நகர்த்தும்போது அவை சற்றும் இடமாறி விழுந்து யாருடைய உடலுக்கும் உயிருக்கும் ஆபத்து ஏற்படாதபடி தன் வலிமையான ‘உடும்புப் பிடியால்’ காக்கும் அடியாரே கைமாகறல் நாயனார் ஆவார்.
கும்பாபிஷேகம் மட்டும் அல்லாமல் கப்பல்களில், கல் குவாரிகளில் கிரேன்களில் பணிபுரிவோரும் கைமாகறல் நாயனாரை வேண்டி தங்கள் பணிகளை ஆரம்பித்தால் நல்ல பாதுகாப்பு பெறுவார்கள். இவர்கள் செயலால் மற்றவர்களுக்கு ஏற்படக் கூடிய அபாயமும் கைமாகறல் நாயனார் பிரார்த்தனையால் தவிர்க்கப்படும். உயரமான கட்டிடங்களில் பணிபுரிவோரும் கைமாகறல் நாயனாரை வேண்டி நல்லருள் பெறலாம்.
ஐயர்மலையில் மேலே ஏறிச் செல்லும்போது பக்தர்கள் தங்கள் உடல் வலிமையை இழந்து மிகவும் சோர்வாக இருப்பது போல் தோன்றினால் அவர்களுக்கு ஊக்கம் அளித்துக் காப்பவரே ஐயர்மலையில் அருளும் ஸ்ரீஉகந்தான்படி விநாயகர் ஆவார். அதுபோல் கொண்டராங்கி திருமலையில் படியேறிச் செல்பவர்களும் தீப எண்ணெயை சுமந்து செல்பவர்களும் கைமாகறல் நாயனார் நாமம் போற்றி, கைமாகறல் நாயனார் நாமம் போற்றி என்று கூறிக் கொண்டே சென்றால் சிறுவர்களும் வயதானவர்களும் எளிதாக மலையேறிச் செல்ல முடியும் என்பதே நாம் அறிந்து கொள்ள வேண்டிய சித்த இரகசியம்.
கைமாகறல் நாயனார் அப்பழுக்கற்ற பிரம்மசர்ய விரதம் மேற்கொண்டவர் ஆதலால் பிரம்மச்சர்ய சிறுவர்கள் நல்ல ஒழுக்கத்தையும் வாழ்வில் உயர்நிலை அடையவும் கைமாகறல் நாயனாரின் நாமம் அவர்கள் வாழ்வில் என்றும் துணை நிற்பதாகும்.
கைமாகறல் என்பதற்கு மற்றோர் அர்த்தமும் உண்டு.
கை .. ஒழுக்கமான நடத்தை
மா .. மா என்று அழைக்கப்படும் பசு
கறல் .. தாயிடமிருந்து பாலை அருந்தும் கன்று
அதாவது, கைமாகறல் என்றால் தன்னுடைய தாயான பசுவிடமிருந்து பாலை அருந்தும் கன்றுக் குட்டி என்று பொருள். தாய்ப் பசு தன் கன்றுக்கு பால் ஊட்டுவதற்கு எந்தத் தடையும் விதிப்பதில்லை, மாறாக தன்னுடைய குழந்தையான கன்று பால் அருந்துவதை மிகவும் விரும்புவதே தாய்ப் பசுவின் தன்மை. ஆரம்பத்தில் இறைவனைத் தேடும் பக்தன், பக்தியில் உயர உயர இறைவனே பக்தனின் அன்பிற்காக ‘ஏங்கும்’ நிலை தோன்றி விடுகிறது என்பதை நாம் காஞ்சி கனிகண்ணன் வரலாற்றின் மூலம் அறிந்து கொள்கிறோம். அதுபோல் ஆரம்பத்தில் பாதுகாப்பை அளிக்கும் கைமாகறல் நாயனாரின் மீது தோன்றும் பக்தியானது நாளடைவில் இறைவன் மீது மீளாக் காதலையும் அளிக்கும் என்பதே கொண்டராங்கி குசல தீபத்தின் மகிமையாகும்.

பாதாளச் சிறையில் அடைபட்டிருக்கும் மகாபலி எப்படி திருஅண்ணாலையை கிரிவலம் வருவார் என்ற நம் சற்குருவின் கேள்விக்கு, “அவர் நம் ஆஸ்ரமத்தில் இருக்கும் பரகாய பிரவேச கோபுரம் வழியாக திருஅண்ணாமலையை கிரிவலம் வருவார்...,” என்று ஒரு அடியார் கூறியுள்ளார். கொக்கு தலையில் வெண்ணெய் வைத்து பிடிப்பதைப் போன்றது இது.
செவ்வாய் கிரகத்திலிருந்து திருஅண்ணாமலைக்கு கிரிவலம் வரும் ஓருவர் தன்னுடைய இயல்பான உடல் உஷ்ணமான 5000 டிகிரி சென்டிகிரேட் வெப்பத்துடன் கிரிவலம் வர முடியாது என்பதால் அவர் பரகாய பிரவேச கோபுரத்தில் தன்னுடைய உடலை கிடத்தி விட்டு பூமிக்கு உரிய மனித வெப்பநிலையான 96 டிகிரியில் கிரிவலம் வருவார். பர காய பிரவேசம் என்றால் வேறொரு உடலுக்குள் புகுதல் என்று பொருள். இதுபோலவேதான் எட்டு பனை மரம் உயரம் உடைய மார்க்கண்டேயர் திருஅண்ணாமலையை கிரிவலம் வருவதும்.
நம் சற்குருவின் கேள்வியோ திருஅண்ணாமலைக்கு மகாபலி எப்படி வருவார் என்பதே? யோசிக்க, யோசிக்க...
நம் சற்குருவின் சத்சங்கத்தில் வேணுகோபால் என்ற ஒரு அடியார் சேர்ந்து வெகுகாலம் பணி ஆற்றிக் கொண்டிருந்தார். வேணுகோபால் என்பது அவருடைய இயற் பெயர் கிடையாது, வர்ணனையின் சுவைக்காக இங்கு அளிக்கப்பட்ட ஒரு பெயரே. சில வருடங்கள் கழித்து அவர் நம் சற்குருவின் சத்சங்கத்திலிருந்து சிறிது சிறிதாக விலகி விட்டார். இருந்தாலும் அவர் பணியிலிருந்து ஓய்வு பெற்று விட்டதால் அவருடைய ‘கவுச்சை’ உணவிற்கு, அதாவது ஆட்டுக்கறி, மீன் போன்ற அசைவ உணவிற்கான பணத்தை நம் சற்குரு அவ்வப்போது அளித்து வந்தார்.
ஆனால், அந்த மூத்த அடியாரோ நம் சற்குருவைப் பற்றி ஊரெங்கும் துர்பிரச்சாரம் செய்து வந்தார். அதைப் பற்றி நம் சற்குரு கண்டு கொள்ளவே இல்லை. ஒரு முறை தந்தை தானத்தில் மதிக்கப்பட வேண்டிய ஒரு அடியார் நம் சற்குருவிடம் வேணுகோபாலின் துர்பிரசாரம் பற்றி கோள் மூட்டினார். சுமார் ஒரு மணி நேரம் அவர் வேணுகோபாலைப் பற்றி எவ்வளவு கூறினாலும் நம் சற்குரு அவை அனைத்தையும் பொறுமையாக கேட்டுக் கொண்டிருந்தாரே தவிர அந்த அடியார் கூறியதற்கு மாறாக ஒரு வார்த்தை கூட கூறவில்லை. அப்போது வேணுகோபாலும் அங்கு வந்து சேர்ந்தார்.
உடனே தனக்கே உரித்தான ஆனந்த சிரிப்புடன், “வாய்யா, வா, இப்போது தானய்யா உன்னைப் பற்றி இவர்களிடம் சொல்லிக் கொண்டிருந்தேன். குரு பக்தி என்றால் என்னவென்று வேணுகோபாலைக் கேட்டுத் தெரிந்து கொள்ளுங்கள் என்று, நீயும் சரியாக வந்து விட்டாய்...”, என்றாரே பார்க்கலாம்.
இதைக் கேட்ட வேணுகோபாலின் முகமும் அவரைப் பற்றி கோள்மூட்டிக் கொண்டிருந்த அந்த அடியாரின் முகமும் ஒரு லிட்டர் விளக்கெண்ணெய் குடித்ததுபோல் ஆகி விட்டது என்பதைக் கூறவும் வேண்டுமோ?
இத்தோடு நின்று விட்டதா என்ன நம் சற்குருவின் கருணை கடாட்சம். வேணுகோபால் சில மாதங்கள் கழித்து இறைவனடி சேர்ந்தபோது நம் சற்குரு குருவின் பெருமையை விளக்கும் ஒரு ரோஜா மலர் மாலையை வேணுகோபாலுக்கு அணிவித்து தன் இறுதி மரியாதையைத் தெரிவித்தார். நம் சற்குருவின் திருக்கரங்களால் இறுதி மரியாதை கிடைக்கப்பெற்றோரை விரல் விட்டு எண்ணி விடலாம். அவர்களில் ஒருவரே சற்குருவிற்கு எதிராக துர்பிரசாரம் செய்த வேணுகோபாலும் ஆவார்.
வேணுகோபாலே நம் கனவிலும் கருதமுடியாத ஒரு உயர்ந்த நிலையை அடைந்தார் என்றால் ஏதோ பெயரளவிற்கு நம் சற்குருவின் கட்டளைகளை நிறைவேற்றும் நம் அடியார்களுக்குக் கூட எத்தகைய உயர்ந்த நிலைகள் எல்லாம் காத்திருக்கும்?
கமலக் கண்ணா நின் தோற்றம்...” என்று மாதா அமிர்தானந்தா கண்ணனைப் புகழ்ந்து பாடுகிறார். ஆரம்ப காலத்தில் அன்னை தன்னை கிருஷ்ண பகவானைப் போல் அலங்கரித்துக் கொண்டு அனைவருக்கும் காட்சி அளித்து வந்தார். மகான்களின் செயல்களுக்கு ஆயிரம் ஆயிரம் காரணங்கள் இருக்கும் அல்லவா? அதில் ஒன்றே நம்மை பிரமிக்க வைக்கும் அன்னையின் பக்தி மழை ஆகும்.
அன்னை அனைவரையும் கிருஷ்ண பகவானாகப் பாவித்தார், பார்த்தார். ஆனால், மக்கள் அன்னையை கிருஷ்ண பகவானாகவோ அல்லது ஏதோ ஒரு உயர்ந்த அவதாரமாக நினைத்துப் போற்றினார்களா? இதற்கு விடை நீங்கள் அறிந்ததே. ஆனால், என்றாவது ஒரு நாள் இப்பிறவியிலோ அல்லது ஏதாவது ஒரு பிறவியிலோ அன்னையின் தரிசனத்தைப் பெற்ற அனைவருமே அன்னையின் உண்மை சொரூபத்தை உணர்ந்து, இறைவனை தங்கள் உள்ளேயே தரிசனம் செய்யும் உயர்ந்த நிலையைப் பெறுவார்கள் என்பதால் அதற்கு முன்னோடியாகவே அன்னையின் தரிசனம் அமைந்தது என்பதே நாம் அறிந்து கொள்ள வேண்டிய ஆன்மீகப் பொக்கிஷமாகும்.
இந்த ஆன்மீகப் பொக்கிஷத்தை நம்முடைய சற்குருவின் கீழ்க்கண்ட நிகழ்ச்சியில் இருந்தும் அறிந்து கொள்ளலாம்.
ஒரு முறை நம் சற்குருவிடம் ஒரு அடியார் வந்தார். “சுவாமி, உங்கள் தலைக்குப் பின்னால் ஒரு சக்கரம் சுற்றுகிறதே, அது என்ன என்று விளக்க வேண்டுகிறேன்…” என்று மிகவும் பணிவுடன் கேட்டார்.

நம் சற்குரு, “அப்படியா அம்மா, (தன்னுடன் இருந்த அடியார்களைச் சுட்டிக காட்டி), இந்தப் பசங்க எல்லாம் அடியேனுடனேயே நீண்ட காலம் இருக்கின்றனர். ஆனால், இவர்கள் யாரும் இந்தச் சக்கரத்தைப் பார்த்தது கிடையாது. நீங்கள் இதை இன்று பார்த்து விட்டீர்கள் என்றால் உங்கள் மூதாதையர்கள் அருளால் உங்களுடைய குரு பக்தி எந்த அளவிற்கு உயர்ந்திருக்கிறது என்பதை தெரிந்து கொள்ளலாம்…”, என்றார்.
தொடர்ந்து, “ஆமாம், அந்தச் சக்கரம் என்ன வண்ணத்தில் உங்களுக்குத் தெரிகிறது?” என்ற கேட்கவே அந்தப் பெண் அடியாரும், “சுவாமி, அது தூய வெள்ளை நிறத்தில் காட்சி அளிக்கிறது…” என்றார். நம் சற்குரு சிரித்துக் கொண்டே, “இதுவே தர்ம சக்கரம் என்பது… கிருஷ்ண பகவான் போன்ற அவதாரங்களின் தலைக்குப் பின்னால் சுழல்வது…”, என்று மேலும் விளக்கம் அளிக்கவே அந்த அடியார் மிகவும் மகிழ்ந்து போனார் என்பதைச் சொல்லவும் வேண்டுமோ?
அந்த அடியார் விடை பெற்றுச் சென்றபின் நம் அடியார்கள் தங்கள் முகத்தில் ஒரு கேள்விக் குறியைத் தொக்க வைத்துக் கொண்டிருந்தனர். “இந்தச் சாதாரண அடியார் தரிசனம் செய்த தர்மச் சக்கரத்தை, நாம் ஏன் இவ்வளவு வருடங்கள் நம் சற்குருவுடன் கூடவே இருந்தும் பார்க்க முடியவில்லை…”, என்பதே அவர்கள் முகபாவம் கேட்காமல் கேட்ட கேள்வி.
அனைத்தையும் உணர்ந்த சற்குரு இந்தச் சாதாரண விஷயத்தை அறியாதவரா என்ன? சிரித்துக் கொண்டே, “யோவ், அந்த அம்மா முகத்தைப் பார்த்தீர்கள் அல்லவா? (அந்தப் பெண் அடியார் மிகவும் கெட்டியான ஒரு கண் கண்ணாடியை அணிந்திருந்தார்.) பகலிலேயே பசு மாடு தெரியாது அந்த அம்மாவுக்கு, இரவில் நான் எருமை மாட்டைக் கண்டு பிடித்து விட்டேன் என்று அவர் சொன்னால் அதை எப்படி நாம் ஒத்துக் கொள்வது?” என்று அர்த்தமுள்ள ஒரு கேள்வியைக் கேட்டார். அதன் பிறகே நம் அடியார்கள் ஒரு நீண்ட பெருமூச்சை விட்டனர்.
உண்மையிலேயே அந்த அடியார் நம் சற்குருவின் தலைக்குப் பின்னால் சுழன்ற தர்ம சக்கரத்தைப் பார்க்கும் அளவிற்கு தகுதியை அப்போது பெறா விட்டாலும் இந்தப் பிறவியிலோ அல்லது எதிர்வரும் ஏதாவது ஒரு பிறவியிலோ நம் சற்குருவின் தர்மச் சக்கரத்தைத் தரிசிக்கும் அளவிற்கு நிச்சயம் உயர்வார் என்பதே நம் சற்குருவின் கருணை கடாட்சம் ஆகும்.
பவள பஸ்மம்
25.11.2023 சனிக் கிழமை அன்று திருஅண்ணாமலை அட்டலிங்க மூர்த்திகளுக்கு குறிப்பாக எமலிங்க மூர்த்திக்கு பவள பஸ்மம் கலந்த பஞ்சாமிர்தத்தால் அபிஷேக ஆராதனைகள் நிகழ்த்தும்படி நம் சற்குருவின் கட்டளையை மேற்கொண்டு அடியார்கள் ஒன்றுகூடி தாங்களாகவே சற்குரு அளித்த ஒரு மந்திரத்தை ஜபித்து பவள பஸ்மத்தை தயார் செய்து அளித்ததை நாம் அறிவோம். சற்குரு அளித்த மந்திரமோ எழுத்து என்ற அட்சர சக்தியைக் கூட்டாது ஒலி வடிவில் அமைந்ததால், அந்த ஒலி அலைகள் மட்டும் அடியார்கள் அமர்ந்திருந்த கோணங்களில் நிரவ, அந்த கோணங்களில் உருவான ‘மங்களஸ்வரூபிணி’ என்ற செவ்வாய் லோக தேவதையின் சக்தியை மட்டும் அக்னி பிரவாகமாக அந்த தூய பவளங்களின் மேல் குவிக்க அந்த பவளங்கள் பஸ்மமான விந்தையைப் பார்த்து நம் அடியார்களே அதிசயித்து விட்டனர்.

உண்மையான அதிசயம் இனிமேல்தான் ஆரம்பமாகிறது. மங்கள ஸ்வரூபிணி தேவதையின் பணி அடியார்கள் கூறிய மந்திர ஒலிகளை ஆறாயிரம் மடங்கு விருத்தி செய்து, அதாவது பவள பஸ்மம் வர்ஷிக்கும் நோய் நிவாரண சக்திகளை ஆறாயிரம் மடங்கு பெருக்கி, பவளங்கள் மேல் குவிப்பதாகும். இந்த 6000 என்பது எங்கோ கேட்டது போல் தோன்றுகிறதா? ஆம், இதுவே திருஅண்ணாமலையில் திகழும் நம் பூமிக்கும் விண்ணில் பிரகாசிக்கும் கொண்டராங்கி மலைக்கும் இடையே உள்ள தூரமாகும். செவ்வாய் கிரகத்தில் உள்ள பிரஜைகளின் உஷ்ணமே 5000 டிகிரி என்றால் மங்களஸ்வரூபிணி வர்ஷிக்கும் உஷ்ணத்தின் அளவு எவ்வளவு அதீதமாக இருக்கும். இத்தகைய ஒரு அதீத உஷ்ணத்தை ஏற்கும் திருஅண்ணாமலை எமலிங்க மூர்த்தி அதை மக்களுக்கு பல்வேறு அனுகிரக சக்திகளாக அளிக்கிறார்.
அவற்றுள் சில...
1. மிக வேகமாக பரவும் தொற்றுநோய்களிலிருந்து. உயிர்க்கொல்லி நோய்களின் கோரப் பிடியிலிருந்து மக்கள் காப்பாற்றப்படுவார்கள்
2. இரசாயன உணவுகளால் உடலில் ஏற்படும் சத்துக் குறைவால் எலும்புகள் பலமிழந்து உடைந்து விடும் நிலையில் இருக்கும்போது
பவள பஸ்மம் ஒன்றே அவர்களுக்கு நிரந்தர தீர்வைத் தரும் ஆயுர்வேத மருந்தாகும்
3. பெண்களின் மாத விடாய் கோளாறுகள் அகலும்
4. தம்பதிகள் இடையே அமையும் உஷ்ண மாறுதல்களால் ஏற்படும் தாம்பத்ய பிரச்னைகளுக்கு தீர்வு கிட்டும்
5. ரச்சுப் பொருத்தம் பாராது நிறைவேறிய திருமணங்களில் ஏற்படும் தோஷங்கள் குறைந்து நல்ல சந்ததிகள் உருவாக இந்த வழிபாடு துணை நிற்கும்.
மனிதக் கற்பனைக்கு எட்டாத இந்த பலன்களை சமுதாயத்திற்கு வர்ஷிக்க நாம் எமலிங்க மூர்த்திக்கு நிறைவேற்றும் அபிஷேகம், தான தர்மங்கள் துணைபுரியும் என்பதே நம் சற்குருவின் வழிகாட்டுதலின் மகத்துவமாகும்.
சனி பரணி சித்தர் என்ற உத்தமரைப் பற்றி நாம் அறிவோம். சனிக் கிழமையும் பரணி நட்சத்திரமும் இணையும் திருநாட்களில் இந்த சித்தர் திருஅண்ணாமலையைக் கிரிவலம் வந்து மக்களுக்கு எல்லாம்
1. மங்காத ஆயுள்
2. மறையாத புகழ்
3. தங்காத நோய் (விரைவில் குணமடையக் கூடிய நோய்)
என்ற மூன்று அனுகிரகங்களையும் இறைவனை நம்பி திருஅண்ணாமலையை கிரிவலம் பக்தர்களுக்கு எல்லாம் அளிக்கிறார். இந்த மகான் அளிக்கும் நோய் நிவாரண சக்திகள், ஆயுள் விருத்தி சக்திகள் திருஅண்ணாமலையில் பரணி நட்சத்திரம் அன்று சனிக் கிழமையுடன் (25.11.2023) இணைவது என்பது கலியுக மக்கள் பெற்ற பெரும்பேறே.
சனிக் கிழமை, பரணி நட்சத்திர இணைப்பில் தோன்றும் மழையில் கிரிவலப் பாதையில், திருத்தலப் பிரகாரங்களில் பொழியும் மழையில் நனைதல் என்பது கிடைத்தற்கரிய பேறே. விருத்தி வர்ஷம் என்ற சிறப்புப் பெயரைப் பெற்றதே இத்தகைய அமிர்த வர்ஷமாகும். பலரும் தற்காலத்தில் இளமையிலேயே தலை முடி நரைத்தல், உடல் சோர்வு, படபடப்பு, தோல் சுருங்குதல் போன்ற முதுமைக்கால விளைவுகளுக்கு பலியாவதால் அவர்கள் வாழ்வும் விரக்தி மனப்பான்மையுடன் கழிகிறது. இத்தகையோர் மேற்கண்ட வழிபாட்டால் பயன்பெறுவர்.
இவ்வாறு சனிக் கிழமை, பரணி நட்சத்திரம், பரணி தீப நாள் என்ற மூன்றும் இணைந்த மழையைப் பெறுதல் என்பது அனைவருக்குமா கிட்டும் என்று உங்களுக்கு சந்தேகம் தோன்றலாம். இத்தகைய இணைப்பில் விளைந்த மழைத்துளிகளால் உருவாவதே கொண்டராங்கி மலை அடிவாரத்தில் அமைய இருக்கும் விருத்தசீர சுமை தாங்கி ஆகும்.
குசல தீபத் தகுதி
பூலோகத்தில் ஒவ்வொரு திருத்தலத்திலும் மட்டும் அல்லாமல் தேவலோகம், கந்தர்வ லோகம், பிரம்மலோகம், திருக்கைலாயம், வைகுண்டம் என எந்த லோகமாக இருந்தாலும் அந்தந்த லோகத்திற்கு உரித்தான வழிபாட்டு முறைகளையும், அடிப்படைத் தகுதிகளையும் நிர்ணயிப்பவர்கள் சித்தர்களே. இம்முறையில் முதன் முதலில் சித்தர்கள் காட்டிய முறையில் கொண்டராங்கியில் தீபம் ஏற்றிய பெருமை சிரஞ்சீவியான அஸ்வத்தாமனையே சேரும்.
அஸ்வத்தாமன் தரித்த சிகையின் பெயர் தேனுபாலகம் என்பது நீங்கள் அறிந்ததே. தற்போது இத்தகைய சிகையை தரிக்கும் வல்லமையை யாரும் பெறாததால் தற்கால கலியுக நிலையை அனுசரித்து சூரிய பிறை என்ற முறையில், அதாவது முன் சிகையை மட்டும் மழித்து உருவான சிகையை உடைய அனைவரும் கொண்டராங்கி குசல தீபத்தை ஏற்றும் தகுதி பெறுகிறார்கள். அத்தகையோர் யக்ஞோபவீதம் என்னும் பூணூல் அணிந்திருப்பது அவசியமே. சாதி, மதம், இனம் என்ற தகுதிகளை இங்கு கருத்தில் கொள்ள வேண்டாம் என்பதே சித்தர்களின் பரந்த நோக்கு.
தேனுபாலகம், சூரிய பிறை என்ற இரண்டு சிகை அமைப்புகளுக்கும் கொண்டராங்கி திருமலையில் துலங்கும் குசல தீபத்திற்கும் உள்ள தொடர்பை ஆத்ம விசாரம் செய்து பார்த்தால் அதனால் கிட்டும் ஆன்மீக விளக்கங்கள் எல்லையற்றவை. ஸ்ரீஆயுர்தேவி திருக்கரங்களில் பொலியும் அத்ரி மகரிஷி முதலாகிய ரிஷிகளின் சிகை அமைப்புகளே நம்மை பிரமிக்க வைக்கும் என்றால் குசல தீப சக்திகளை உணர வைக்கும் இந்த சிகைகளின் தாத்பர்யங்களை நாம் என்று உணர்ந்து தெய்வீகத்தில் அடுத்த அடியை எடுத்து வைப்பது?!
கொண்டராங்கி திருமலையில்
26.11.2023 அன்று உண்ணாமுலையம்மன் திருஅண்ணாமலையான் பெருங்கருணையாலும், நம் சற்குருவின் கனிந்த ஆசியாலும் குசல தீபம் ஏற்றப்பட்டது. இந்த தெய்வீக திருப்பணிக்கு பொருளுதவி அளித்த அடியார்கள், உடல் உழைப்பு நல்கிய உத்தமர்கள், உள்ளத்தால் உருவகித்த உயர்ந்தோர் அனைவரின் திருப்பாதங்களையும் எங்கள் தலையில் தாங்குகிறோம் !
கொண்டராங்கி திருமலையில் குசல தீபத்தை நம் அடியார்கள் ஏற்றிய அரிய காட்சியை இங்குள்ள வீடியோவில் கண்டு இரசிக்கலாம். குசல தீபத்தின் பல சிறப்புகளில் ஒன்றே இங்கு நீங்கள் தரிசனம் செய்யும் சுக்ர ஜோதி சக்திகளாகும். அஸ்வமேதயாகத்தில் தோன்றும் சக்திகளே இவை. ராஜாக்களுக்கு எல்லாம் ராஜாவே சக்கரவர்த்தி, அத்தகைய சக்கரவர்த்திகளால் மட்டுமே இயற்றவல்லதே அஸ்வமேத யாகம். புனிதமான திருமண சம்பந்தங்களில் தோன்றும் இத்தகைய சுக்ர சக்திகளை திருப்புடைமருதூர் திருத்தலத்தில் பூர்ண சனீஸ்வரருக்கு இயற்றிய அபிஷேக ஆராதனைகளின் போது தரிசனம் செய்து இருப்பீர்கள். இத்தகைய அரிதிலும் அரிய அஸ்வமேதயாக சக்திகளை அடியார்களுக்கு அளிப்பதற்காகவே பத்து அஸ்வமேத யாகங்களை பிரம்ம மூர்த்தி நிறைவேற்றிய தசாஸ்வமேத காட் என்னும் கங்கைப் பகுதியில் நம் அடியார்கள் நாள் முழுவதும் நீராடி பலன் பெறுமாறு நம் சற்குரு வழிகாட்டிய அனுகிரகத்தை ஏற்கனவே தெரிவித்திருந்தோம்.
எத்தனையோ ஆண்டுகளுக்கு முன் நடந்த இந்த நிகழ்ச்சியால் இப்போதிருக்கும் அடியார்களுக்கு என்ன பலன் என்று நீங்கள் கேட்பது, கேட்டது நம் சற்குருவின் காதுகளை எட்டியது போலும்! சோபகிருது வருட திருக்கார்த்திகை தீபத்தின்போது கொண்டராங்கி திருமலையில் ஏற்றிய குசல தீபத்தின் போது இத்தகைய சுக்ர ஜோதிகள் வானையே வியாபித்து நின்றது என்றால் நம் சற்குருவின் கருணைக்கு எல்லைதான் ஏது?
இதனால் அடியார்களுக்கு கிட்டும் பலன்களை வார்த்தைகளால் வர்ணிக்க இயலாது என்றாலும் இதன் ஒரு பயனாக நாம் இறைவனின் பிரதிபலிப்பு என்ற உண்மையை உணரும் சந்தர்ப்பம் இதன் மூலம் நமக்குக் கிட்டும். பல நூறு பிறவிகள், ஆயிரம், இலட்சம் பிறவிகளில் இயற்றும் கடும் தவப் பலனாகவே விளையும் இத்தகைய தெய்வீக உணர்வை ஒரு தீப தரிசனத்திலேயே அளிக்கும் மாபெரும் சித்த ஆற்றலைக் கொண்டவரே நம் சற்குரு என்ற இனிய உண்மையை நாம் உணர உதவுவதே கொண்டராங்கி குசல தீபமாகும்.
ஓம் நமசிவாய என்ற அட்சரங்கள் பிரதிபலித்த நிலையில் தோன்றும் இந்த தீப தரிசனத்தை ஆத்ம விசாரத்திற்கு உரிய ஆரம்பப் பாடமாக எடுத்துக் கொண்டு அடியார்கள் தொடர்ந்து முன்னேறி பலன் பெறலாம்.

கொண்டராங்கி குசல தீபம்
1. முதல் நாள் பரணி தீபம்
2. இரண்டாம் நாள் கார்த்திகை தீபம்
3. மூன்றாம் நாள் விஷ்ணு தீபம்
4. நான்காம் நாள் சரண தீபம்
5. ஐந்தாம் நாள் பூதலிங்க தீபம்
என்று அழைக்கப்படுகின்றன. இதே போல் கொண்டராங்கி திருமலையில் மூன்று நாட்கள் தீபங்கள் ஏற்றி வழிபடும்படி நம் சற்குரு அருளியதைத் தொடர்ந்து மூன்று நாட்கள் விளங்கும் தீபங்கள் கீழ்க்கண்ட நாமத்தால் அழைக்கப்படும்.
1. 26.11.2023 கார்த்திகை தீபம் .. கொண்டராங்கி குசல தீபம்
2. 27.11.2023 விஷ்ணு தீபம் .. கொண்டராங்கி அசல தீபம்
3. 28.11.2023 சரண தீபம் .. கொண்டராங்கி ரமண தீபம்
கார்த்திகை நட்சத்திரத்திற்கு அடுத்த நாள் ரோகிணி நட்சத்திர தினத்தன்று பிரகாசிக்கும் தீபமே விஷ்ணு தீபமாகும். ரோகிணி நட்சத்திரம் என்பது நம் சற்குருவின் ஜன்ம நட்சத்திரமாக அமைவதால் ரோகிணியில் நிகழ்த்தும் தெய்வீக வழிபாடுகள் அனைத்துமே சற்குருவின் மேலுள்ள நம்பிக்கையை வலுப்படுத்தும் என்பதில் சற்றும் ஐயமில்லை. அசல என்றால் அசையாத என்பதைக் குறிப்பதால் அசையா குரு நம்பிக்கை விளைய திர ராசியான ரிஷபத்தில் சந்திரன் திகழும்போது மேற்கொள்ளும் அசல தீப வழிபாடுகள் உறுதுணையாக நிற்கும்.
அசல என்றால் அசையாத, மாறாத, மறையாத என்றெல்லாம் பொருளுண்டு. இந்த வார்த்தையின் உன்னதத்தை நம் சற்குருவின் வரலாற்றிலிருந்து அறிந்து கொள்வோமா? நம் சற்குரு திருஅண்ணாமலையானின் திருப்பாதங்களை அடைவதற்கு முந்தைய திர வாரமான சனிக் கிழமை, அசல வாரத்தில் நடந்த ஒரு நிகழ்ச்சி இது. நடக்கவே முடியாமல் தள்ளாடிய நிலையில் இருந்த நம் சற்குரு தன்னுடன் இருக்கும் அடியாரை அழைத்து கையைப் பிடித்துக் கொண்டு நடக்க துணைபுரியுமாறு கேட்டுக் கொண்டார். தன் கையைப் பிடிக்க வந்த அந்த அடியாரின் கைகளை விலக்கி விட்டு, அந்த அடியாரின் கைகளை இறுகப் பற்றிக் கொண்டே தள்ளாடி தள்ளாடி நள்ளிரவு வேலையில் முன்னும் பின்னுமாக ஹாலில் நடந்து கொண்டிருந்தார் நம் சற்குரு.
“என்னை நட நட என்று டாக்டர்கள் கூறுகிறார்கள், அடியேன் எப்படி சும்மா நடக்க முடியும். இப்போது ... ... இருக்கிறான், அடியேன் சொல்வது எல்லாவற்றையும் குறித்துக் கொண்டு அதை புத்தகத்தில் எழுதி விடுவான். (இவ்வாறு பிறந்ததே மைசூர் பஜ்ஜி). நீ அடியேனுடைய கையைப் பிடிக்க வருகிறாய். அதனால் எந்த பிரயோசனமும் இல்லை, ஒரு வேளை நீ அதை விட்டு விடலாம். அடியேன் உன் கையைப் பிடித்துக் கொண்டால் அடியேன் உன் கையை விட்டு விடாமல் பிடித்துக் கொண்டு தைரியமாக நடக்கலாமே?” என்றார்.
தன்னுடைய பாதுகாப்பை கருத்தில் கொண்டு கூறுவதாக அமைந்த இந்த வாக்கியங்கள் நம் சற்குருவிற்கு நம் அடியார்கள் மேலுள்ள கருணையையே சுட்டிக் காட்டுகின்றன. நம் சற்குரு நம் கையை இறுகப் பற்றிக் கொண்டால் நாம் எந்தச் சூழ்நிலையிலும், எந்த ஆபத்துக் காலத்திலும் தைரியமாக நடக்கலாமே? இந்த அனுகிரகத்தை அளிப்பதே கொண்டராங்கி அசல தீபம்.
ரமண என்பது போகத்தைக் குறிக்கும் சொல்லாகும். ரமண என்னும் தமிழ்ச் சொல்லை எழுதும்போது இரமண என்று எழுதுவதே முறை. ஆனால், இந்த வார்த்தையை உச்சரிக்கும்போது அதில் ‘இ’ என்ற எழுத்து மறைந்தே பொலியும். அதனால்தான் போகத்தைக் கடந்து இறைவனை அடையும் பாதையைக் காட்டுவதாக ரமண மகரிஷியின் வழிகாட்டுதல் அமைந்து, திருச்சுழி சிறுவன் வெங்கடராமன் திருஅண்ணாமலை ரமண மகரிஷியாக மலர்ந்தார்.
உலகில் சித்தர்கள் என்றால் ஒன்றும் அனுபவிக்கத் தெரியாத ‘சாமியார்கள்’ என்றே நினைக்கின்றனர். உண்மையில் பெண், பொன், புகழ் என்ற 1008 போகங்களையும் முழுமையாக அனுபவிக்கத் தேவையான உடல் ஆரோக்யம், மனக் கட்டுப்பாடு இவை அனைத்தையும் பூரணமாகப் பெற்ற உத்தமர்களே சித்தர்கள் ஆவர். ஆனால், அவர்கள் சித்தமோ போகங்கள் எதையும் நாடாது சதா சர்வகாலமும் இறைவனின் திருவடிகளிலேயே பதிந்து கிடக்கும். இத்தகைய பக்தி நிலையை அளிக்க வல்லதே ரமண தீபத்தின் மகிமையாகும்.
அன்னை அமிர்தானந்தாவின் வழிகாட்டுதலும் இதை உறுதி செய்யும். “நல்ல நெஞ்சமுடைய பணக்காரர்களிடம் இருக்கும் செல்வமானது மண் விழுந்த அன்னமாகக் கருதப்படுகிறது...”, என்பார் அன்னை. மண் விழுந்த அன்னம் மனிதர்களுக்குப் பயன்படாது என்றாலும் விலங்குகளுக்கும், பறவைகளுக்கும் அவை உணவாக அமையுமே. யானை போன்ற மிருகங்கள் மண் செறிந்த புல்லைத்தான் விரும்பி உண்ணுமே தவிர, சுத்தமாக்கப்பட்ட புல் போன்ற உணவு வகைகளை அவை தீண்டுவதே இல்லை. இதுவே நம் சற்குரு கூறும், “இருந்தும் (அனைத்து செல்வமும் இருந்தாலும்) இல்லாதிரு...” என்ற நிலையாகும்.

பாதாளச் சிறையில் அடைபட்டிருக்கும் மகாபலிச் சக்கரவர்த்தி எப்படி திருஅண்ணாமலை கார்த்திகை தீபத்தை ஒட்டி கிரிவலம் வருவார் என்ற கேள்விக்கு ‘உயர்ந்த தீபம்’ என்பதை தன்னுடைய நாமத்தின் ஒரு பகுதியாகக் கொண்ட ஒரு அடியார் ஓரளவு சரியான பதிலைக் கூறியதால் அவர் சார்பாக கொண்டராங்கி குசல தீபத்திற்கு ஒரு டின் தீப எண்ணெய் வழங்கப்பட்டது என்பதை மகிழ்ச்சியுடன் தெரிவித்துக் கொள்கிறோம். இது சம்பந்தமாக சற்குருவின் பதில் இதோ.
இறைவன் மிகவும் எளியவன், ஆன்மீகமும் மிகவும் எளிமையானதே, நாம்தான் அதை மிகவும் குழப்பிக் கொள்கிறோம். அது போன்றதுதான் இந்த கேள்வியும். ஆயுள் தண்டனை பெற்ற கைதி அனைவருக்கும் ‘பரோல்’ விடுமுறை என்று அளிப்பார்கள். இந்த விடுமுறையில் அவர்கள் தங்கள் சொந்த ஊருக்குச் சென்று தங்கள் மனைவி, மக்கள் போன்ற நெருங்கிய உறவினர்களைப் பார்த்து விட்டு வருவதற்காக அளிக்கப்படுவது இது. சட்டத்தை இயற்றும் அரசாங்கத்திற்கு அதை ரத்து செய்ய, மாற்றி அமைக்க உரிமை இல்லையா என்ன?
இவ்வாறு வருடம் ஒரு முறை ஓணம் பண்டிகை தினத்தன்று தன் நாட்டு மக்களைப் பார்த்து வருவதற்கு பெருமாளிடம் ‘பரோல்’ விடுமுறை கேட்டு அதை அங்கீகரித்தவரே பெருமாள். இதை மாதா அமிர்தானந்தா விளக்குவதாக உள்ள படத்தையே நாம் க்ளூவாக அளித்திருந்தோம்.
மூதாதையர்கள் அவரவர் திவச தினத்தன்று தங்கள் சந்ததிகள் இல்லத்திற்குச் சென்று வரவும், அனைத்து பித்ருக்களுக்கும் மாளய பட்சம் 15 நாட்களிலும் அவரவர் சந்ததிகளின் இல்லங்களுக்கும், பித்ரு முக்தி தலங்களுக்கும், கடலோரப் பகுதிகளுக்கும் சென்று வர ‘பரோல்’ விடுமுறை அளிக்கப்படுவதும் நீங்கள் அறிந்ததே.
பெருமாள் ஒரு அடியால் வானத்தை அளந்து, இரண்டாவது அடியால் பூமியையும் பாதாள லோகத்தையும் அளந்து விட்டு, தன்னுடைய மூன்றாவது அடியை எங்கே வைப்பது என்று மகாபலியை கேட்டபோது மகாபலி தன் தலைமேல் பெருமாளின் திருவடியை வைக்கலாம் என்று கூறினான் அல்லவா? அப்போது மகாபலி பெருமாளின் ‘அடிமை’ என்றுதானே ஆகி விட்டான். எப்படி ஒருவர் தனக்குச் சொந்தமான நூறு ரூபாய் நோட்டை தன் மேல் பாக்கெட்டிலும் வைக்கலாம், கஜானா பெட்டியிலும் வைக்கலாம் என்பது போல் பெருமாள் மகாபலியை ஒரு நாள் என்ன, அவன் ஆயுள் முழுவதும் திருஅண்ணாமலை கிரிவலப் பாதையில் உலவ விடலாமே?
அடுத்து, சாந்தவெளியில் தவமியற்றிக் கொண்டிருக்கும் ஆஞ்சநேயர் தினமும் திருக்கைலாயத்திற்கும் வைகுண்டத்திற்கும் சென்று பெருமாளை தரிசித்து விட்டு வருபவர்தாமே. சித்தர்களின் நாயகரான ஸ்ரீஅகத்திய பெருமான் இவ்வாறு சிரஞ்சீவிகளுடன் சேர்ந்து திருஅண்ணாமலை கார்த்திகை தீபத்தை ஒட்டி திருஅண்ணாமலையை வலம் வருமாறு அழைப்பு விடுத்தால் அதை மறுப்பவரா ஆஞ்சநேயப் பெருமான்?
“அவன் என்னுடைய சீடனே அல்ல, அவனை நான் பார்க்க விரும்பவில்லை...”, என்று மகாபலியை நிராகரிக்கும் சுக்ராச்சாரியார் தன்னுடைய சீடனை மன்னிக்க மாட்டாரா, அப்படி மன்னிப்பதாக இருந்தால் எப்போது மன்னிப்பார்? இந்த கேள்வியை வரும் புத்தாண்டு பரிசிற்கு உரியதாக அளிப்பவரே நம் சற்குரு. இதற்கான சரியான பதிலைக் கூறும் முதல் அடியாருக்கு ஒரு புதிய வயலின் காத்திருக்கிறது. ஏன் வயலின் பரிசு என்பதும் ஒரு ஆத்ம விசாரக் கேள்விதான். இந்த கேள்விக்கான பதில் அடங்கிய படமும் கொண்டராங்கி தீபத்தில் மறைந்துள்ளது.
செம்மேனிநாதர்
நம் ஆஸ்ரமத்தில் ஒரு அண்டாவை எடுக்க வேண்டுமென்றால் சற்குரு, “அந்த அண்டாவை எடு...”, என்று கூறியதே இல்லை. “அவரை இப்படி நகர்த்து...”, என்றுதான் கூறுவார். அதாவது நம் சற்குருவைப் பொறுத்தவரை அசையும் அசையாப் பொருள் அனைத்துமே கடவுள்தான். அதனால்தான் அனைத்திற்கும் இந்த “அவர்” என்ற மரியாதை.
அவ்வாறு இருக்கும்போது கோடிக் கணக்கான மக்களின், ஜீவ ராசிகளின் கர்ம வினைகளைத் தீர்ப்பதற்கு உறுதுணையாக நின்ற தீபக் கொப்பரையை செம்மேனிநாதர் என்று பெயரிட்டு அழைப்பது எத்துணை பொருத்தம்? பொதுவாக தீபக் கொப்பரைகள் படியேறிச் செல்லும்போது சில வகைக் கர்மங்களைத் தீர்க்கின்றன. அவை மீண்டும் படி வழியாக இறங்கி வரும்போது வேறு விதமான கர்ம வினைகளைத் தீர்க்கின்றன என்பதே சித்தர்கள் தெரிவிக்கும் கர்ம இரகசியம்.

இதில் மேலும் ஒரு சிறப்பாக கொண்டராங்கி திருமலை சுமார் 3000 படிகளுடன் அமைந்திருப்பதால் இதன் மேல் ஏறி இறங்கும் செம்மேனிநாதர் சுமார் 3000+3000 = 6000 விதமான கர்மவினைகளைத் தீர்க்கும் அற்புதத்தை நிகழ்த்துகிறார். குறைந்தது ஒரு வருட காலத்திற்கு கொண்டராங்கி திருமலையில் ஏறி இறங்கும் பக்தர்களுக்கு எல்லாம் படிகளின் தீட்சை வழியாக இந்த அனுகிரகம் வழங்கப்படும். மலம் மூத்ராதி கர்ம வினைகளைக் கடந்த ராமானுஜர் திருப்பதி மலைமேல் ஏறி தினமும் சிறுநீர் கழிப்பதற்காக கீழே இறங்கி வரும் அற்புதத்தை நினைத்துப் பாருங்கள், மகான்களின் பெருமை ஓரளவு புரிய வரும்.
“ஒரு குண்டு போட்டு லட்சக் கணக்கான மக்களை அழிப்பது சாதனை அல்ல, ஒரு குண்டு போட்டால் லட்சக் கணக்கான நெல் மூட்டைகள் விழ வேண்டும், அதுவே உண்மையான சாதனை,” என்பார் கோவணாண்டி. சமீபத்தில் நடந்த இஸ்ரேல் யுத்தத்தின்போது ஒரே குண்டில் எத்தனையோ மாடிக் கட்டிடங்கள் தரை மட்டமாக அதனால் லட்சக் கணக்கான மக்கள் உயிரிழந்த வேதனையை நாம் அறிவோம்.
குண்டு வெடிப்பிற்கு உரிய தேவதை செவ்வாய் பகவான்.
செய்தித் தொடர்புக்கு உரிய தேவதை செவ்வாய் பகவான்.
தொற்றுநோய்களை உடல் வெப்பத்தின் மூலம் அழிப்பது செவ்வாய் பகவான்.
கார்த்திகை தீபம் போல் அதீத வெப்பத்தால் தீர்க்க முடியாத கர்ம வினைகளை இறையருளுடன் தீர்ப்பது செவ்வாய் பகவான்.
இவ்வாறு நன்மை தீமை என அனைத்தையும் சாதிக்கும் செவ்வாய் பகவானின் மங்கள சக்திகள் என்ற தீப சக்திகளை மட்டும் இணைத்து பல அற்புதங்களைப் புரிந்தவரே நம் சற்குரு. உதாரணத்திற்காக ஒன்றே ஒன்று. சமீபத்தில் உத்தர்காசி பகுதியில் நிலச்சரிவில், இடிபாடுகளுக்கு இடையே மாட்டிக் கொண்ட 41 தொழிலாளர்கள் அனைவரையும் உயிரோடு மீட்க உதவியதே இந்த மங்கள சக்திகள்.
இந்த தொழிலாளிகளை மீட்க உதவிய நிகழ்ச்சியைப் பற்றி சற்றே ஆத்ம விசாரம் செய்தாலும் நீங்கள் இந்த உண்மையை உணர்ந்து கொள்ளலாம். 41 என்ற எண்ணிக்கையில் விளங்கிய இவர்கள் மீட்கப் பட்டது ஒரு செவ்வாய்க் கிழமை செவ்வாய் அதிபதியான மிருகசீரிஷம் நட்சத்திரம் கூடும் நாள். நல்ல செய்தி பரிமாற்றம், உணவு, மருத்துவ வசதிகள் அளிக்கப் பயன்பட்டது ஒரு இரும்பு குழாய். 41 என்ற புத எண் செவ்வாய்க்கு நட்பு பாவத்துடன் திகழ்வது. உத்தர் என்றால் வட திசை என்று பொருள்.
கொண்டராங்கி குசல தீபத்தில் கேரளா திருச்சூர் வடக்கு நாதர் கோயிலில் இருந்த பெறப்பட்ட இரண்டு கிலோ நெய்யும், வட திசைக்கு உரிய கேரளா குருவாயூரப்பன் கோயில் பிரசாதமாகப் பெறப்பட்ட இரண்டு கிலோ வெண்ணெயும், செவ்வாய் பகவானுக்குரிய குங்குமப்பூ தைலம் கலந்த இரண்டு லிட்டர் தீப எண்ணெய், இவை அனைத்தும் ஒளியைக் கூட்ட கொண்டராங்கி திருமலைக்கு வடக்கில் இருந்த உத்தர்காசி தொழிலாளிகளை உயிருடன் மீட்கும் தெய்வீக சக்தியை அளித்தது. இதனால் ஆனந்தம் அடைந்த மக்கள் கோடியில் இருப்பார்களோ இல்லையோ, நிச்சயம் லட்சக் கணக்கான மக்கள் இந்த உயிர் மீட்புப் பணியால் ஆறுதல், ஆனந்தம் அடைந்திருப்பார்களே.
இதுவே செவ்வாய் பகவான் குண்டு வெடிப்பிற்காக விளையும் அக்னி சக்திகளை மக்களின் ஆனந்தத்திற்காக மாற்றி அமைக்கும் நம் சற்குருவின் வல்லமை. சாதாரண மக்கள் புரிந்து கொள்ளும் நிலையில் ஆறு கிலோ தீப எண்ணெய் இத்தகைய விந்தைகளைப் புரிந்தது என்றால் கிட்டத்தட்ட 1200 கிலோ பசு நெய், மூலிகை எண்ணெய், தேங்காய் எண்ணெய் மூலம் என்னென்ன சாதனைகளை எல்லாம் நம் சற்குரு நமக்காக, மக்கள் சமுதாயம் நலமுடன் வாழ நிறைவேற்றி இருப்பார்.
விருத்தி விருத்த சீர மகாமேரு
வரும் 14.12.2023 வியாழக்கிழமை கொண்டராங்கி திருமலை அடிவாரத்தில் விருத்தி விருத்த சீர மகாமேரு நிர்மாணிக்கப்பட உள்ளது. அன்று காலை சுமார் ஒன்பது மணி அளவில் தோன்ற இருக்கும் இந்த சுமைதாங்கியின் சிறப்பு என்ன? சனிக் கிழமையும் பரணி நட்சத்திரமும் பரணி தீபமும் இணையும் முகூர்த்த வேளையில் தோன்றும் மழை அமிர்த மழை என்பது நாம் அறிந்ததே. இந்த புனித மழையில் நனையும் பேறு எத்தனை பேருக்கு கிட்டும் என்பதால் நம் சற்குரு பெரும் கருணை கொண்டு இந்த முகூர்த்தத்தில் தோன்றிய மழைத் துளிகளை சேகரித்து கொண்டராங்கியில் அமைய இருக்கும் விருத்தி விருத்த சீர மகாமேருவிற்கு அபிஷேகிக்க திருவுள்ளம் கொண்டுள்ளார்.

சந்திர மூன்றாம் பிறை தரிசனம், விருத்தி கரணம், குரு வாரம், குரு ஆட்சி கொள்ளும் மூல நட்சத்திரம் என்ற இந்த இணைப்பில் தோன்றும் மகா மேருவின் பெருமையை வார்த்தைகளால் வர்ணிக்க இயலுமா? இத்தகைய அற்புத முகூர்த்தத்தில் விருத்தி விருத்த சீர மகாமேருவிற்கு சனி பரணி தீர்த்தத்தால் அபிஷேகம் இயற்றும்போது அந்த அமுத துளிகளை ஒரு தென்னம்பாளையில் பிடித்து அதை பக்தர்களுக்கு விருத்த சீர மகாமேரு கும்பாபிஷேக பிரசாதமாக அளிக்க ஏற்பாடு செய்யப்பட்டுள்ளது.
தங்கள் வலது ஆள்காட்டி விரல், கட்டை விரல் நுனிகளால் மட்டும் விருத்த சீர மண்ணை எடுத்து ஒரு வில்வ ஓட்டின் மேல் வைத்து இந்த இரண்டையும் ஒரு வெள்ளி டப்பாவிற்குள் வைத்து இந்த வெள்ளி டப்பாவை விருத்தி விருத்த சீர பிரசாதமாக வீட்டிற்கு எடுத்துச் சென்று அவரவர் இல்ல பூஜை அறையில் வைத்துக் கொள்ள வேண்டும்.
செம்மேனி சூடு என்ற ஒரு வித அதீதமான சூடு வரும் ஆண்டில் நம்மைத் தாக்கி பல உறுப்புகளையும் செயலிழக்கச் செய்யும் அபாயம் உள்ளதாக நம் சற்குரு எச்சரிக்கை விடுக்கிறார். திருநீற்றுப் பதிகத்தை தினமும் ஒரு முறையாவது ஒதி வருவது நலம். கனவில் விந்து வெளியாதல், தூக்கமின்மை, மலச்சிக்கல், இனந்தெரியாத காய்ச்சல் போன்ற பல உடற் கோளாறுகளும் இந்த செம்மேனி சூட்டால் விளையும் ஒரு சில வேதனைகளே. இவற்றிற்கு எல்லாம் நிவாரணம் அளிப்பதே மேற்கூறிய வழிபாடுகள்.
2024ம் ஆண்டு இறுதியில் வில்வ ஓட்டையும், விருத்தசீர மண்ணையும் ஓடும் ஆற்றில் விட்டு விட்டு அந்த வெள்ளி டப்பாவில் குங்குமம் நிறைத்து மற்ற மங்கலப் பொருட்களுடன் சுமங்கலிகளுக்கு தானம் அளித்து விடவும்.
தென்னங்குருத்துடன் விருத்தி விருத்த சீர மகாமேருவை வழிபடுவது சிறப்பு என்பதால் அடியார்கள் தென்னங்குருத்தை இத்திருத்தலத்திற்கு எடுத்து வந்து அதை விருத்தி விருத்த சீர மகாமேருவிற்கு சமர்ப்பிக்கும்படிக் கேட்டுக் கொள்கிறோம். குருத்து என்பது இள வயதை, இளமையைக் குறிப்பதாகும், விருத்த என்பது முதுமையைக் குறிப்பதாகும், மரத்திலிருந்து தானே விழுந்த தென்னம்பாளை இதைக் குறிப்பதே.
மேலும் விருத்த என்றால் வயதான, முதுமையான என்று பொருள், சீர என்றால் க்ஷீர அதாவது இளமையான, பால் மணம் மாறாத என்று பொருள்.
அற்புத சீடன், அருமை குருநாதர் என்ற இரு ஆன்மீகச் சிகரங்களின் தெய்வீக இணைப்பே விருத்தி விருத்த சீர மகாமேரு என்பதற்கு இன்னும் விளக்கம் வேண்டுமா என்ன?
சாதாரணமாகவே கழுதைகளுக்கு திருமணம் நடக்கும்போது தோன்றும் அமுத மழையை ஒரு தென்னம்பாளையில் பிடித்து அதை பிரசாதமாக அளித்தால் அகால மரணம், மிருத்யு தோஷங்கள் அகலும், சிறந்த சந்தான பாக்கியம் கிட்டும் என்பதை நாம் இராவணன் வழிபாட்டின் மூலமாக அறிகின்றோம். இத்தகைய வழிபாடு சனி பரணி சித்தரால் தோற்றுவிக்கப்படும் விருத்தி வர்ஷம் என்ற அமுத மழையுடன் சேரும்போது அதன் பலன்களை கனவிலும் நாம் கருத இயலாது.
தங்கமும் வெள்ளியும் சேரும்போது அதனால் விளையும் மங்கள சக்திகளை மனித மனத்தால் புரிந்து கொள்ள இயலாது என்பதால் நம் சற்குரு வெள்ளி மாங்கல்யத்திற்கு தங்கப் பூச்சு கொடுத்து அத்தகைய மாங்கல்யங்கள சுமங்கலிகளுக்கு தானமாக அளிக்கும்படி சிபாரிசு செய்கிறார். இங்கு நாம் காணும் காஞ்சி கனிந்த கனியின் தரிசனமே இத்தகைய அனுகிரகங்களை அளிக்கவல்லது என்றால் அம்மகானின் பெருமை எப்படிப்பட்டதாகும்?
விருத்தி விருத்த சீர மகாமேரு வழிபாட்டு முறையாக சித்தர்கள் அருள்வது...
1. ஹெல்மெட் என்ற தலைக் கவசத்தை இந்த மகாமேருவின் மேல் வைத்து அணிந்து கொள்வதும், மற்றவர்களுக்கு தானம் அளிப்பதும் சிறப்பு. இதனால் தலைக்கு வந்த ஆபத்து தலைப்பாகையோடு போகும். வண்டி ஓட்டுபவர்கள்தான் இத்தகைய தானம் அளிக்க வேண்டும் என்ற கட்டாயம் கிடையாது. ஆபத்தான சூழ்நிலைகளில் பணிபுரியும் ஆண்களும் பெண்களும் இத்தகைய தான தர்மங்களை நிறைவேற்றி பயன்பெறலாம்.
2. புதிதாக வீடு வாங்குபவர்கள், ஏற்கனவே வீடு வாங்கியவர்கள் தங்கள் வீட்டுப் பத்திரங்களை இந்த மகாமேருவின் மேல் வைத்து பயன்பெறலாம்.
3. மருந்து, மாத்திரை, டானிக்குகள் போன்றவற்றையும் இந்த மகாமேருவின் மேல் வைத்து அதை தன்வந்த்ரீ பிரசாதமாகப் பெற்று பயன் பெறலாம்.
4. புதிதாக வாங்கும் வாகனத்தின் சாவி, டிரைவிங் லைசன்ஸ் போன்றவற்றையும் இந்த மகாமேருவின் மேல் வைத்து பயன்பெறலாம்.
5. புதிய வீணை, வயலின், மிருதங்கம் போன்றவற்றை இந்த மகாமேருவின் மேல் வைத்து வாசிப்பதால் விரையில் நுண்கலைகளில் திறமை பெற இந்த வழிபாடு உதவும்.
6. படிக்கும் குழந்தைகள் தங்கள் புத்தகங்கள், நோட்டுப் புத்தகங்கள், பேனா, பென்சில் போன்றவற்றையும் இதன் மேல் வைத்து படிப்பில் நம்பிக்கையை, திறமையை வளர்த்துக் கொள்ளலாம்.
7. தம்பதிகள் ஒருவர் கையை மற்றவர் பிடித்துக் கொண்டு குறைந்தது 21 முறை இந்த மகாமேருவை வலம் வருவதால் அவர்கள் விதி எப்படி இருந்தாலும் இறுதி வரை ஒருவரை ஒருவர் விட்டுப் பிரியாத ஒற்றுமையுடன் வாழ சற்குருமார்களின் அனுகிரகம் அவர்களுக்குத் துணை நிற்கும்.
8. குசா யந்திரம் பதித்த நைவேத்ய பிரசாத தட்டுகள், எவர்சில்வர், வெள்ளி உலோகங்களில் அமைந்த உணவருந்தும் தட்டுகள் இவற்றையும் மகாமேருவின் மேல் வைத்து பிரசாதமாகப் பெற்றுக் கொள்ளலாம். இரசாயன உணவுகளால் ஏற்படும் விளைவுகளை ஓரளவு தடுக்க உதவுவதே இத்தகைய தட்டுக்கள். ஹோட்டல் போன்ற உணவு விடுதிகளில் உணவேற்கும்போது நேராக இந்த தட்டுகளிலேயே உணவு பெற்று உண்பதால் ஒரளவு செயற்கை இரசாயன பவுடர், வண்ணங்கள் போன்ற தீய விளைவுகளிலிருந்து நிவாரணம் பெறலாம். இத்தகைய தட்டுகளில் பழங்கள் நிரப்பி தானம் அளித்தலும் சிறப்பே.
மாத்ருதேசம்
நம் தலை உச்சியில் உள்ள புனித உச்சிப் பகுதி வெற்றிடம் என்றே பலராலும் கருதப்படுகிறது. எப்படி விலை மதிப்பு இல்லாத பூஜ்யத்தை சூன்யம் என்று அழைக்கிறோமோ அது போல் விலை மதிப்பில்லாத புனிதத்திலும் புனிதமான பகுதியே இந்த வெற்றிடம் ஆகும். புனிதமான இந்த வெற்றிடப் பகுதியே நம் சற்குருவால் மாத்ருதேசம் என்ற இனிய பெயரால் அழைக்கப்படுகிறது. சகஸ்ராரம் என்று ஆயிரமாயிரம் தாமரைகளால் அறிவு செழிக்கும் பகுதியே இந்த மாத்ருதேசம் ஆகும். ஆகாசிக் ரெகார்டு பொலியும் பகுதியும் இதுவே ஆகும்.
மனிதனுடைய ஜாதகம் என்பது இந்த ஒரு பிறவியை மட்டும் குறிப்பது. ஆகாசிக் ரெகார்டு என்பது மனிதப் பிறவிக்கு முன்னால் அந்த உயிர் எடுத்த அனைத்து லட்சக் கணக்கான, கோடிக் கணக்கான பிறவிகளில் விளைந்த, கூடிய கர்ம வினைகளின் தொகுப்பே ஆகும். இந்த ஆகாசிக் ரெகார்டை படிக்கக் கூடியவர்கள், இதில் மாற்றங்களை ஏற்படுத்த வல்லவர்வள் சித்தர்கள் நிலையில் உள்ளவர்கள் மட்டுமே. இறை நாமம் ஜெபித்தல், இறை நாமங்களை பாடுதல் போன்ற இறை காரியங்கள் மட்டுமே சற்குருவின் அருளால் இதில் மாற்றங்களை ஏற்படுத்த முடியும்.
நம் சபையில் ஒரு அடியார் இருந்தார். ஒரு நாள் அவரைப் பார்த்து நம் சற்குரு, “இவன் கொஞ்சம் லேட்டாக வந்து விட்டான்... முன்னமே வந்திருந்தால் இன்னும் எவ்வளவோ மாற்றங்களை இவன் ஆகாசிக் ரெகார்டில் ஏற்படுத்தி இருக்க முடியும். இந்த பிறவியில் கூட இவனுக்கு ஆண் குழந்தையே இல்லை என்பதை மாற்றி ஆண் குழந்தை பெற வழி செய்துள்ளோம்...”, என்று கூறினார்.
இவ்வாறு கொண்டராங்கி மலைப் பகுதியின் உச்சியே மாத்ருதேசம் என்பதாகும். இந்த உச்சியில் இருந்து பெறப்பட்ட குசல தீபம், அசல தீபம், ரமண தீபம் காட்சிகளே மனிதர்களின் ஆகாசிக் ரெகார்டில் மாற்றங்களை குரு அருளால் ஏற்படுத்த வல்லவை என்பதே இவற்றின் மகிமைகளாகும். இந்த தீபங்களை தரிசிக்கும் பாக்கியத்தை அனைவரும் பெறாவிட்டாலும் இங்குள்ள வீடியோவில் அந்த தீபங்களை தரிசித்து சோபகிருது வருட முடிவிற்குள் எத்தனை தடவை முடியுமோ அத்தனை முறை கொண்டராங்கி திருமலை அர்ச்சுன வியூகத்தில் ஏறி இங்குள்ள தீப மேடையில் அகல் தீபம் ஏற்றி வழிபடுவதால் எத்தனையோ அனுகிரகங்களை பெறுவர் என்பது உறுதி.
மாத்ரு தேசப் பகுதியின் மற்றோர் அம்சமாவது காலத்தையும் நேரத்தையும் இணைக்கும் பாங்கு ஆகும். ஒரு முறை சுவாமி விவேகானந்தரிடம் ஒருவர், “கர்ம வினைகளால் பாதிக்கப்படாமல் இருந்த மனித ஆன்மா எப்போது முதலில் கர்மத்தின் பாதிப்புகளுக்கு ஆட்பட்டது?” என்று கேட்டார். அதற்கு சுவாமிகள், “ஏன் எதற்கு எப்போது... என்ற கேள்விகள் அனைத்துமே கால தேசத்திற்கு உட்பட்டவையே. காலம் தேசம் என்ற இரண்டையும் தாண்டிச் சென்றால்தான் இந்த கேள்விக்கு விடையளிக்க இயலும்...”, என்று கூறினார்.
இவ்வாறு காலம் தேசம் என்ற இரண்டு கோட்பாடுகளையும் கடந்து சென்று தியானத்தில் இலயிக்க உதவுவதே மாத்ருதேசம் என்ற உணர்வுப் பகுதியும் ஆகும். உதாரணமாக, 9994805951 என்ற ஒரு பத்து இலக்க செல்போனை அடிக்கடி பயன்படுத்துவதால் எண் சக்திகள் விரயமாகி அதனால் மனித வாழ்க்கையில் சொல்லொணா வேதனைகள் ஏற்படுகின்றன என்பதே சித்தர்களின் அறிவுரை, அறவுரை.
ஆனால், செல்போன்கள் இல்லாத ஒரு வாழ்க்கையை மனித குலம் இப்போது கனவிலும் கருத முடியாது என்ற நிலை உருவாகி விட்டதால் இதற்கு ஒரளவு நிவாரணம் அளிப்பதாக அமைவதே எண்ணையும் எழுத்தையும் இணைக்கும் மாத்ருதேச வழிபாட்டு முறை ஆகும். இம்முறையில் மேலே உள்ள செல்போனிலிருந்து நீங்கள் அழைக்கப்பட்டால் அல்லது அந்த எண்ணுக்கு உரியவரை நீங்கள் அழைத்தால், அந்த எண்ணுக்கு உரிய நியூமராலஜி எண்ணையும் அதற்குரிய தேவதையையும் நீங்கள் வழிபட்டால் செல்போனால் விளையும் துன்பங்களிலிருந்து ஓரளவு நிவாரணம் பெறலாம்.

கொண்டராங்கி திருமலை
மேற்கூறிய உதாரண செல்போனுக்கு உரித்தான நவகிரக தேவதை புதன் (9994805951=5), அதிதேவதை பெருமாள். இந்த இரண்டு மூர்த்திகளுக்கு உரிய காயத்ரீ மந்திரங்களான
தந்நோ புத பகவான் பிரசோதயாத்
2. ஓம் நாராயணாய வித்மஹே வாசுதேவாய தீமஹி
தந்நோ புண்டரீகாக்ஷாய பிரசோதயாத்
என்று ஒரு முறையேனும் ஓதுதல் நலம். அல்லது அவரவர்கள் அறிந்த புத, பெருமாள் காயத்ரீ மந்திரங்களை ஒதுவதும் ஏற்புடையதே.
அவசரமான உலகில் இதெல்லாம் சாத்தியமா என்ன என்று நீங்கள் கேட்பது காதில் விழத்தான் செய்கிறது. செல்போனில் அழைப்பு வரும்போது இவ்வாறு உடனடியாக, துரிதமாகச் செயல்படுவது என்பது பலருக்கும் சாத்தியம் இல்லை என்றாலும், செல்போனில் பேசியவுடன் சாவதானமாக அமர்ந்து இந்த காயத்ரீ மந்திரங்களை கூறுவது என்பது அனைவருக்கும் சாத்தியம்தானே.
இதையும் நடைமுறைப்படுத்த முடியாதவர்கள் ஒரு நாளின் காரியங்கள் நிறைவேறியவுடன் படுக்கைக்குச் செல்லும் முன் நித்யக் கடமைகளில் ஒன்றாக இதை இணைத்துத்தான் ஆக வேண்டும். இவ்வாறு எண்ணையும் எழுத்தையும் இணைக்கும் மாத்ருதேச வழிபாட்டின் பலன்களை நீங்கள் நிறைவேற்றித்தான் பலன் காண இயலும். வார்த்தைகளை மிஞ்சிய வர்ணஜாலம் இது!
சாதாரணமாக ஒரு வார செல்போன் பேச்சால் குவியும் கர்மங்களைக் களையவே ஒரு வருடம் திருஅண்ணாமலையைக் கிரிவலமாக வர வேண்டும் என்றால் ஒரு மனிதன் தன் வாழ்நாளில் செல்போனால் மட்டும் சேர்த்துக் கொள்ளும் கர்மங்கள்தான் எத்தனை எத்தனை? இந்த ஒரு வாரக் கர்மாவையும் ஒரே ஒரு கிரிவலத்தில் மாய்க்கக் கூடிய பெருந்தகையே நம் சற்குரு. ஆனால், மேற்கூறிய வழிபாட்டை தங்கள் செல்போன் பேச்சுடன் இணைத்துக் கொள்வோரின் கர்மங்கள் மட்டுமே நம் சற்குருவால் கணக்கில் எடுத்துக் கொள்ளப்படும். எனவே சற்குருவைச் சரணடைந்தோர் சாதிப்பதை வேறு எந்த மனிராலும் சாதிக்கவே முடியாது. தேடுங்கள், நாடுங்கள், உத்தம சற்குருவை ! சரண் அடையுங்கள் அவர்தம் திருப்பாதங்களில்!
நீங்கள் பயன்படுத்தும் செல்போன் எண்களுக்குரித்தான தேவதைகளையும் அதிதேவதைகளையும் வழிபடுவதால் கிட்டும் மற்றோர் பலனும் சுவையானதே. எண்களுக்கு உரித்தான தேவதைகளும் அதிதேவதைகளும் திருத்தலங்களில் நூறு கால் மண்டபங்களாக, ஆயிரங்கால் மண்டபங்களாக, அர்த்த மண்டபங்களாக எழுந்தருளி உள்ளன. நாம் திருத்தலங்களில் மூலவரை வணங்கி பிரார்த்தனையை சமர்ப்பிக்கும்போது இந்த பிரார்த்தனைகள் எதுவுமே மூலவரைச் சென்று அடைவதில்லை.
பொதுவாக, இவை எல்லாம் மனித உடல் ஆரோக்யம், குழந்தைகளின் படிப்பு, அவர்கள் வேலை வாய்ப்பு, திருமணம் போன்ற லௌகீக பிரார்த்தனைகளாகவே இருப்பதால் அவை எவையும் துவார பாலகர்களையோ, அர்த்த மண்டபத்தில் உள்ள தேவதைகளையோ தாண்டிச் செல்வதே இல்லை. அர்த்த மண்டபம் என்றால் பொருள் சம்பந்தமான பிரார்த்தனைகளை செவிமடுக்கும் தேவதைகள் உறையும் மண்டபம் என்ற பொருளும் உண்டு. அதனால் நம் தகுதியைப் பொருத்து, அதாவது இதற்கு உரித்தான புண்ணிய சக்தியைப் பொருத்து, இந்த பிரார்த்தனைகள் எல்லாம் இந்த தேவதைகளாலேயே நிறைவேற்றப்படுகின்றன.
நாம் செல்போனுக்கு உரித்தான எண் தேவதைகளையும், அதி தேவதைகளையும் வணங்குவதை பழக்கப்படுத்திக் கொண்டால் சிறிது சிறிதாக அவர்களுடன் நேரடியாக பேசும் சக்தியையும், வல்லமையையும் பெறுவோம். இந்த வழிபாடு கனிய கனிய, லௌகீக பிரார்த்தனைகள் குறைய குறைய, நாம் அர்த்த மண்டபம் தாண்டி மூலத்தானத்தில் உறையும் மூலவருடனே தொடர்பு கொள்ளும் அந்த ஆனந்த நிலையையும் அடைவோம்.
இது ஏதோ கற்பனை என்று எண்ண வேண்டாம். நம் சற்குரு திருஅண்ணாமலையாருடன் நேரே பேசும் அந்த இனிய காட்சியை நேரில் தரிசிக்கும் பாக்யத்தைப் பெற்ற அடியார்கள் இன்றும் நம்மிடையே உண்டு. நம் சற்குரு திருஅண்ணாமலை பரம்பொருளுடன் உரையாடும் அந்த இனிய காட்சியில் எண்ணும் இல்லை, எழுத்தும் இல்லை, வார்த்தைகளும் இல்லை, அனைத்தும் கடந்த துரியாதீத ஆனந்தம் ஒன்று மட்டுமே அங்கு நிரவி, விரவி, பொங்கி நிற்கும் !!
✦ ✦ ✦ ஓம் ஸ்ரீகுருவே சரணம் ✦ ✦ ✦
